କନକ ବ୍ୟୁରାେ: ଟି-୨୦ ବିଶ୍ୱକପ୍ ପରେ ଟି-୨୦ ମ୍ୟାଚରେ ଆଉ ଭାରତର ନେତୃତ୍ୱ ନେବେନି ଅଧିନାୟକ ବିରାଟ କୋହଲି । ଏନେଇ ସେ କିଛି ଦିନ ତଳେ ଘୋଷଣା କରିଥିଲେ । ଆଉ ଆଜି ଏନେଇ ପ୍ରତିକ୍ରିୟା ପ୍ରକାଶ କରିଛନ୍ତି ବିସିସିଆଇ ଅଧ୍ୟକ୍ଷ ସୌରଭ ଗାଙ୍ଗୁଲି । ଗାଙ୍ଗୁଲିଙ୍କ କହିବା ମୁତାବକ, ବିରାଟଙ୍କ ଏହି ନିଷ୍ପତ୍ତି ତାଙ୍କୁ ମଧ୍ୟ ଆଶ୍ଚଯ୍ୟ କରିଥିଲା ।
Kanak News is now on WhatsApp
Join and get latest news updates delivered to you via WhatsApp
ଖାଲି ସେତିକି ନୁହେଁ, ଗାଙ୍ଗୁଲି ଆହୁରି ମଧ୍ୟ କହିଛନ୍ତି ଯେ, ଦୀର୍ଘ ସମୟ ଧରି ଏନେଇ କୌଣସି ଚର୍ଚ୍ଚା ହୋଇନଥିଲା । ହେଲେ ଇଂଲଣ୍ଡ ଗସ୍ତ ପରେ ବିରାଟ ଏନେଇ ନିଷ୍ପତ୍ତି ନେଇଥିଲେ । ଯାହାକି ତାଙ୍କର ସମ୍ପୂର୍ଣ୍ଣ ବ୍ୟକ୍ତିଗତ ନିଷ୍ପତ୍ତି ଥିଲା । ତେବେ ବିସିସିଆଇ ତରଫରୁ ଅଧିନାୟକ ପଦ ଛାଡିବା ନେଇ ବିରାଟଙ୍କ ଉପରେ କୌଣସି ଚାପ ନଥିଲା ବୋଲି ସେ କହିଛନ୍ତି ।
ସେହିପରି ବିରାଟଙ୍କ ଫର୍ମକୁ ନେଇ ମଧ୍ୟ ଗାଙ୍ଗୁଲି କହିଛନ୍ତି, ସେ ବି ମଣିଷ , ମେସିନ୍ ନୁହଁନ୍ତି । ବିରାଟ ସବୁଥର ଶତକ ମାରିପାରିବେ ନାହିଁ । ସବୁବେଳେ ଫର୍ମ ବ୍ୟାଟ୍ସମ୍ୟାନଙ୍କ ସହିତ ରୁହେନାହିଁ । ହେଲେ ଯେହେତୁ ତାଙ୍କ କ୍ୟାରିୟର ବହୁତ ଲମ୍ବା ତେଣୁ ଏହି ଗ୍ରାଫ୍ କେବେ କେବେ ଉପରକୁ ଯିବ ତ କେବେ କେବେ ତଳକୁ ଖସିବ ବୋଲି ଗାଙ୍ଗୁଲି କହିଛନ୍ତି ।
ସୂଚନାଯୋଗ୍ୟ ଯେ, ଗତ ଦୁଇ ବର୍ଷ ହେଲା ବିରାଟଙ୍କ ବ୍ୟାଟରୁ ସେଭଳି କୌଣସି ଆଖିଦୃଶିଆ ସ୍କୋର ଆସିନାହିଁ । ଯାହାକୁ ନେଇ ସେ ଅନେକ ଥର ସମାଲୋଚକଙ୍କ ସମାଲୋଚନାର ଶିକାର ହୋଇସାରିଲେଣି । ଗତ କିଛି ଦିନ ତଳେ ସେ ବିଶ୍ୱକପ୍ ପରେ ଟି-୨୦ରେ ଟିମ୍ ଇଣ୍ଡିଆର କ୍ୟାପଟେନ୍ ପଦ ଛାଡିବା ନେଇ ଘୋଷଣା କରିଥିଲେ । ଆଉ ଏହାକୁ ନେଇ ଏବେ ପ୍ରଥମ ଥର ପାଇଁ ପ୍ରତିକ୍ରିୟା ରଖିଛନ୍ତି ବିସିସିଆଇ ଅଧ୍ୟକ୍ଷ ସୌରଭ ଗାଙ୍ଗୁଲି ।