ସୌମ୍ୟରଞ୍ଜନ ପାଣିଗ୍ରାହୀଙ୍କ ମୃତ୍ୟୁକୁ ବିତିଲା ୧୨ ଦିନ । ଡିସିପିଙ୍କୁ ଭେଟିଲେ ସୌମ୍ୟଙ୍କ ପରିବାର ଲୋକ

କନକ ବ୍ୟୁରୋ : ଯୁବ ବ୍ୟବସାୟୀ ସୌମ୍ୟରଞ୍ଜନ ପାଣିଗ୍ରାହୀଙ୍କ ମୃତ୍ୟୁକୁ ୧୨ ଦିନ ବିତି ଯାଇଛି । ହେଲେ ଏପର୍ଯ୍ୟନ୍ତ ପୁଲିସ ପକ୍ଷରୁ କିଛି ପଦକ୍ଷେପ ନିଆଯାଉନଥିବା ପରିବାର ଲୋକ ଅଭିଯୋଗ କରିଛନ୍ତି । ଦିନ ଯେତେ ଗଡ଼ୁଛି ସେତିକି ନୂଆ ନୂଆ ତଥ୍ୟ ମଧ୍ୟ ସାମ୍ନାକୁ ଆସୁଛି ।

ମୃତ୍ୟୁ ସମୟରେ ତାଙ୍କ ମୃତ୍ୟୁର କାରଣ ଜଣେ ଯୁବତୀ ବୋଲି ସୁସାଇଡ ନୋଟରେ ଲେଖିଥିଲେ ସୌମ୍ୟ । ଏପରିକି ଯୁବତୀଙ୍କ ସହ ଏବଂ ତାଙ୍କ ମାଆଙ୍କ ସହ କଥା ହେବାର କଲ ରେକର୍ଡ ମଧ୍ୟ ସାମ୍ନାକୁ ଆସିଛି । ଘଟଣାକୁ ୧୨ ଦିନ ହେଲାଣୀ ହେଲେ ଏପର୍ଯ୍ୟନ୍ତ କୌଣସି କାର୍ଯ୍ୟନୁଷ୍ଠାନ ହେଉନଥିବାରୁ ଆଜି ଡିସିପିଙ୍କୁ ଭେଟିବାକୁ ଯାଇଛନ୍ତି ସୌମ୍ୟଙ୍କ ପରିବାର ଲୋକ ।

ଇନ୍‌ଫୋସିଟି ଥାନା ନନ୍ଦନବିହାରର ମଡେଲ୍ ସୌମ୍ୟଙ୍କ ସୁଇସାଇଡ୍ ନୋଟ୍‌ରେ ପ୍ରେମିକାଙ୍କ ପ୍ରତାରଣା ଓ ନିର୍ଯାତନା କଥା ସ୍ପଷ୍ଟ ରହିଛି। ଏମିତିକି ନିଷ୍ଠୁର ପ୍ରେମିକା ବିରୋଧରେ ମାମଲା କରିବା ପାଇଁ ମଧ୍ୟ ସୁଇସାଇଡ୍ ନୋଟ୍‌ରେ ସେ ଉଲ୍ଲେଖ କରିଛନ୍ତି। ଏଣେ ପୁଅର ଆତ୍ମହତ୍ୟା ପାଇଁ ପରିବାର ଲୋକମାନେ ପ୍ରେମିକା ଓ ତାଙ୍କ ମା’ଙ୍କୁ ଦାୟୀ କରି ପୁଲିସ ନିକଟରେ ବୟାନ ମଧ୍ୟ ଦେଇଛନ୍ତି। ଏହା ସତ୍ତ୍ବେ ପୁଲିସ କାହିଁକି ଆତ୍ମହତ୍ୟା ପାଇଁ ଉସୁକାଇବା ଆଇପିସି ଦଫା-୩୦୬ରେ ମାମଲା ରୁଜୁ କରୁନାହିଁ ?

ଏହା ପଛରେ କାରଣ କ’ଣ, ତାହା ଜଣାପଡ଼ୁନାହିଁ। ଆଇନଜୀବୀ ଚିତ୍ତରଞ୍ଜନ ଦାଶ କହିଛନ୍ତି ସୌମ୍ୟ ଆତ୍ମହତ୍ୟା କରିଥିବା ରୁମ୍ ଛାନଭିନ୍ କରିବା ସମୟରେ ସୁଇସାଇଡ୍ ନୋଟ୍‌କୁ ପୁଲିସ ଜବତ କରିଥିଲା । ଏମିତି କ୍ଷେତ୍ରରେ ପୁଲିସ ନିଜ ତରଫରୁ ମଧ୍ୟ ଆଇପିସି ଦଫା-୩୦୬ରେ ମାମଲା ରୁଜୁ କରି ତଦନ୍ତ କରିପାରିବ। ସେହିପରି ଅଡିଓ ଟେପ୍ ଆଦି ମିଳିବା ପରେ ପୁଲିସ ମାମଲା ରୁଜୁ କରିବା କଥା ।