ସଙ୍କଟ ବେଳେ କେମିତି ସାହାଯ୍ୟ କରୁଛନ୍ତି ସୋନୁ ସୁଦ୍ । କ୍ଷୀରବାଲା କହିଲେ ମହାମାରୀର ମସିହାଙ୍କ କାହାଣୀ, ଭିଡିଓ ସେୟାର କଲେ ସୋନୁ ।
କନକ ବ୍ୟୁରୋ : ସଙ୍କଟ ବେଳେ କେମିତି ସାହାଯ୍ୟ କରୁଛନ୍ତି ସୋନୁ ? କ୍ଷୀରବାଲା କହିଲେ ମହାମାରୀର ମସିହାଙ୍କ କାହାଣୀ । ସୋନୁ ସୁଦ, ଏବେ ଏହା କେବଳ ଏକ ନାଁ ନୁହେଁ, କୋଟି କୋଟି ଲୋକଙ୍କ ନିଶ୍ୱାସ, ବିଶ୍ୱାସ ଆଉ ହୃଦୟରେ ସାଇତା ହୋଇ ରହିଥିବା ସୁନ୍ଦର ସ୍ମୃତି ଟିଏ । ଗତ ୧୪ ମାସ ହେଲାଣି କଷ୍ଟ ଦେଇଚାଲିଛି କରୋନା । ଆଉ ସଙ୍କଟ ସମୟରେ ଅସହାୟ, ଦୁଃଖି ଦରିଦ୍ରଙ୍କ ଦେବଦୂତ ସାଜିଛନ୍ତି ସୋନୁ ସୁଦ୍ । ତେବେ ସମସ୍ତଙ୍କ ମନରେ ନିହାତି ଭାବେ ଜାଣିବାକୁ ଇଚ୍ଛା ରହିଥିବ, ଯେ ଜଣେ ମଣିଷ କୋଟି କୋଟି ଲୋକଙ୍କ ହୃଦୟ କେମିତି ଜିଣିଲେ । କେମିତି ଏତେ ଲୋକଙ୍କୁ ସାହାଯ୍ୟ କରୁଛନ୍ତି ସୋନୁ ।
Kanak News is now on WhatsApp
Join and get latest news updates delivered to you via WhatsApp
ଯଦି ଏଭଳି ପ୍ରଶ୍ନର ଉତର ଆପଣ ଜାଣିବାକୁ ଚାହୁଁଛନ୍ତି, ତେବେ ସୋନୁ ସୁଦଙ୍କ ସହ ଗୋଟିଏ ଦିନ ରହିକି ଦେଖନ୍ତୁ । ଏକଥା ଆମେ କହୁନୁ, ନିଜ ଇନଷ୍ଟାଗ୍ରାମ ପେଜରେ ଏକ ଭିଡିଓ ସେୟାର କରି କ୍ୟାପସନରେ କିଛି ଏମିତି ଲେଖିଛନ୍ତି ସୋନୁ ।
ଏହି ଭିଡିଓରେ ଆପଣ ଯାହାଙ୍କୁ ଦେଖୁଛନ୍ତି, ସେ ହେଉଛନ୍ତି ସୋନୁଙ୍କ କ୍ଷୀରବାଲା ଗୁଡୁ ଭାଇ । ସୋନୁ ତାଙ୍କୁ ପଚାରୁଛନ୍ତି, ମୁଁ ଯେଉଁ ନମ୍ବରଟା ଆପଣଙ୍କୁ ଦେଇଥିଲି, ସେଥିରେ ଯେଉଁ କଲ୍ ସବୁ ଆସୁଛି, ଆପଣ ସମସ୍ତଙ୍କ କଥା ଶୁଣୁଛନ୍ତି କି ନାହିଁ । ସୋନୁଙ୍କ ପ୍ରଶ୍ନର ଉତର ଦେଇ କ୍ଷୀରବାଲା କହୁଛନ୍ତି, ସାହାଯ୍ୟ ପାଇଁ କେତେବେଳେ ରାତି ୧ଟାରେ କଲ୍ ଆସୁଛି, କେତେବେଳେ ରାତି ୪ଟାରୁ ବି । ଏପରିକି ସେ ବିରକ୍ତି ପ୍ରକାଶ ମଧ୍ୟ କରୁଛନ୍ତି । ସୋନୁ କହୁଛନ୍ତି, ତାଙ୍କ ପାଖକୁ ବି କଲ୍ ଆସୁଛି, ସେ ବି ଧୈର୍ଯ୍ୟର ସହ ଲୋକଙ୍କ କଥା ଶୁଣୁଛନ୍ତି । ସୋନୁଙ୍କୁ ଉତର ଦେଇ ଗୁଡୁ କହୁଛନ୍ତି, ମୋର ଆପଣଙ୍କ ଭଳି କାପାସିଟି ନାହିଁ ।
ତେବେ ଏହି ଭିଡିଓକୁ ସେୟାର କରି କ୍ୟାପସନରେ ସୋନୁ ଲେଖିଛନ୍ତି, ମୋ କ୍ଷୀରବାଲା ଗୁଡୁ ବି ହାତ ଟେକିଦେଇଛନ୍ତି । ସେ ଆଉ ବୋଝ ସମ୍ଭାଳିପାରୁନାହାନ୍ତି । ଯିଏବି ଏହା ଜାଣିବାକୁ ଚାହୁଁଛନ୍ତି, ଯେ ମୁଁ କେମିତି ଏତେ ଲୋକଙ୍କୁ ସାହାଯ୍ୟ କରୁଛି, ସେମାନେ ଆସନ୍ତୁ, ମୋ ସହ ଗୋଟିଏ ଦିନ ରହିକି ଦେଖନ୍ତୁ ।
ଦିନର ୨୪ ଘଂଟାରୁ ୨୨ ଘଂଟା ଧରି ଅହରହ ଲୋକଙ୍କୁ ସାହାଯ୍ୟ କରିବା କାମ କରୁଛନ୍ତି ସୋନୁ । ସେ କହିଛନ୍ତି ଦିନକୁ ତାଙ୍କୁ ୪୦ ହଜାରରୁ ୫୦ ହଜାର ରିକ୍ୱେଷ୍ଟ ଆସୁଛି । ସୋନୁ କୁହନ୍ତି, ଯଦି ସମୁଦ୍ରରେ କେହି ବୁଡିଯାଉଛି, ତେବେ ସାହାଯ୍ୟ ପାଇଁ ସମୁଦ୍ର ଭିତରକୁ ଡେଇଁବାକୁ ପଡିବ । ସମୁଦ୍ରର ଢେଉ ଆଉ ଲହରି ଆପଣଙ୍କୁ ପହଁରା ଶିଖାଇଦେବ । ସତରେ, ପରଦାର ଏହି ଖଳନାୟକ, ସତ ଜୀବନରେ କିନ୍ତୁ ନାୟକ ସାଜିଛନ୍ତି । ଆଉ ସେଇଥିପାଇଁ ତ କୋଟି କୋଟି ଭାରତୀୟଙ୍କ ହୃଦୟ ଭିତରେ ସ୍ୱତନ୍ତ୍ର ଜାଗାଟିଏ କିଣିପାରିଛନ୍ତି ହୃଦୟର ହିରୋ ସୋନୁ ସୁଦ୍ । ଆଉ ପୂରା ଦୁନିଆ ଆଜି ସୋନୁଙ୍କୁ ସାଲ୍ୟୁଟ୍ କରୁଛି ।