ଟିମ୍ ଇଣ୍ଡିଆର ପୂର୍ବତନ କ୍ରିକେଟର ଭଜି ମାଗିଥିଲେ ସାହାଯ୍ୟ, ସହାୟତାର ହାତ ବଢାଇଲେ ହୃଦୟର ହିରୋ । ହରଭଜନଙ୍କ ପାଖରେ ରେମଡିସିଭିର ଇଞ୍ଜେକସନ୍ ପହଞ୍ଚାଇଦେଲେ ସୋନୁ ସୁଦ୍ ।
କନକ ବ୍ୟୁରୋ : ରାଇନାଙ୍କ ପରେ ହରଭଜନ । ସୋନୁ ଶୁଣିଲେ, ସାହାଯ୍ୟ କଲେ । ଭଜି ମାଗିଲେ ସାହାଯ୍ୟ, ଆଉ ସାହାଯ୍ୟର ହାତ ବଢାଇଲେ ଶ୍ରମିକଙ୍କ ଭଗବାନ ସୋନୁ ସୁଦ୍ । ପୁଣି ହୃଦୟ ଜିଣିଲେ ହୃଦୟର ହିରୋ । ଭାରତୀୟ ଦଳର ପୂର୍ବତନ କ୍ରିକେଟର ହରଭଜନ ସିଂହଙ୍କୁ ସାହାଯ୍ୟର ହାତ ବଢାଇଲେ ସୋନୁ ସୁଦ୍ । ବିପଦ ବେଳର ବନ୍ଧୁ ସାଜି ଭଜିଙ୍କ ପାଖକୁ ପଠାଇଲେ ରେମଡିସିଭିର ଇଞ୍ଜେକସନ୍ ।
Kanak News is now on WhatsApp
Join and get latest news updates delivered to you via WhatsApp
କରୋନାର ଦ୍ୱିତୀୟ ଲହର ସଂକ୍ରମଣ, ହୁ ହୁ ହୋଇ ବଢିଚାଲିଥିବା ବେଳେ, ଚିକିତ୍ସା ପାଇବା ପାଇଁ ଲୋକେ ଡହଳବିକଳ ହେଉଛନ୍ତି । ଏଭଳି ସମୟରେ ବେଡ୍, ଅକ୍ସିଜେନ୍ ଆଉ ଔଷଧର ବି ଅଭାବ ଦେଖାଯାଉଛି । ତେବେ ଗତକାଲି କର୍ଣ୍ଣାଟକର ଏକ ହସ୍ପିଟାଲରେ ଚିକିତ୍ସିତ ହେଉଥିବା ଜଣେ ରୋଗୀଙ୍କ ପାଇଁ ଏକ ରେମଡିସିଭିର ଇଞ୍ଜେକସନ୍ ଆବଶ୍ୟକ ଥିବା ଟ୍ୱିଟ୍ କରିଥିଲେ ଭାରତୀୟ ଦଳର ପୂର୍ବତନ କ୍ରିକେଟର ହରଭଜନ ସିଂହ ।
ଆଉ ହରଭଜନଙ୍କ ଟ୍ୱିଟ୍ ଦେଖିବା ମାତ୍ରେ ସଙ୍ଗେ ସଙ୍ଗେ ଏହାର ଉତର ଦେଇଥିଲେ ସୋନୁ । ଆଉ କହିଥିଲେ ଆପଣଙ୍କ ପାଖରେ ରେମଡିସିଭିର ଇଞ୍ଜେକସନ୍ ପହଂଚିଯିବ । କିଛି ସମୟ ଭିତରେ ରୋଗୀଙ୍କ ପାଖରେ ଇଞ୍ଜେକସନ୍ ପହଂଚିଯାଇଥିଲା । ଆଉ ହୃଦୟର ହିରୋଙ୍କୁ ହୃଦୟରୁ ଧନ୍ୟବାଦ ଜଣାଇଥିଲେ ହରଭଜନ ସିଂହ । ଟ୍ୱିଟ୍ କରି ଲେଖିଛନ୍ତି, ମୋ ଭାଇ ସୋନୁଙ୍କୁ ଅଶେଷ ଅଶେଷ ଧନ୍ୟବାଦ, ଭଗବାନ ସୋନୁଙ୍କୁ ଅଧିକ ଶକ୍ତି ଦିଅନ୍ତୁ ଆଉ ଆଶୀର୍ବାଦ କରନ୍ତୁ ।
ସେହିପରି କିଛି ଦିନ ତଳେ ସୁରେଶ ରାଇନାଙ୍କୁ ମଧ୍ୟ ସାହାଯ୍ୟ କରିଥିଲେ ସୋନୁ । ମେରଠରେ ଚିକିତ୍ସିତ ହେଉଥିବା ରାଇନାଙ୍କ ଆଣ୍ଟିଙ୍କୁ ଅକ୍ସିଜେନର ଆବଶ୍ୟକତା ଥିଲା । ତାଙ୍କ ଫୁସଫୁସରେ ସଂକ୍ରମଣ ହୋଇଥିଲା । ଏଥିପାଇଁ ରାଇନା ଟ୍ୱିଟ୍ କରି ଏକ ଅକ୍ସିଜେନ୍ ସିଲିଣ୍ଡର ଯୋଗାଇଦେବାକୁ ସାହାଯ୍ୟ ମାଗିଥିଲେ । ଆଉ ରାଇନାଙ୍କ ପୋଷ୍ଟ ଦେଖିବା ପରେ ସାଙ୍ଗେ ସାଙ୍ଗେ ସାହାଯ୍ୟ ପାଇଁ ଆଗେଇ ଆସିଥିଲେ ସୋନୁ । ଆଉ ୧୦ ମିନିଟ୍ ଭିତରେ ସୁରେଶ ରାଇନାଙ୍କ ଆଂଟିଙ୍କ ପାଖରେ ଅକ୍ସିଜେନ୍ ପହଂଚାଇଦେଇଥିଲେ ସୋନୁ ସୁଦ୍ ।
ସୋନୁ ସୁଦ, ଏବେ ଏହା କେବଳ ଏକ ନାଁ ନୁହେଁ, କୋଟି କୋଟି ଲୋକଙ୍କ ନିଶ୍ୱାସ, ବିଶ୍ୱାସ ଆଉ ହୃଦୟରେ ସାଇତା ହୋଇ ରହିଥିବା ସୁନ୍ଦର ସ୍ମୃତି ଟିଏ । ଗତ ୧୪ ମାସ ହେଲାଣି କଷ୍ଟ ଦେଇଚାଲିଛି କରୋନା । ଆଉ ସଙ୍କଟ ସମୟରେ ଅସହାୟ, ଦୁଃଖି ଦରିଦ୍ରଙ୍କ ଦେବଦୂତ ସାଜିଛନ୍ତି ସୋନୁ ସୁଦ୍ । ଦେଶର କୋଣ ଅନୁକୋଣରୁ ଯିଏ ଯେଉଁଠୁ ବି ସାହାଯ୍ୟ ମାଗୁଛି, ବିପଦ ବେଳର ବନ୍ଧୁ ସାଜି ସାହାଯ୍ୟର ହାତ ବଢାଉଛନ୍ତି ମହାମାରୀର ମସିହା ସୋନୁ ସୁଦ୍ । ସତରେ, ପରଦାର ଏହି ଖଳନାୟକ, ସତ ଜୀବନରେ କିନ୍ତୁ ନାୟକ ସାଜିଛନ୍ତି । ଆଉ ସେଇଥିପାଇଁ ତ କୋଟି କୋଟି ଭାରତୀୟଙ୍କ ହୃଦୟ ଭିତରେ ସ୍ୱତନ୍ତ୍ର ଜାଗାଟିଏ କିଣିପାରିଛନ୍ତି ହୃଦୟର ହିରୋ ସୋନୁ ସୁଦ୍ । ଆଉ ପୂରା ଦୁନିଆ ଆଜି ସୋନୁଙ୍କୁ ସାଲ୍ୟୁଟ୍ କରୁଛି ।