ଲକଡ଼ାଉନ୍ ସମୟରେ ଘରଠାରୁ ଦୂରରେ ଫସିରହିଥିବା ପ୍ରବାସୀ ଶ୍ରମିକ ତଥା ଅନ୍ୟ ଅସହାୟ ଲୋକଙ୍କୁ ସହାୟତାର ହାତ ବଢାଇ ଚର୍ଚ୍ଚାକୁ ଆସିଥିବା ବଲିଉଡ୍ ଅଭିନେତା ସୋନୁ ସୁଦ୍ ଲୋକଙ୍କୁ ସତର୍କ କରାଇଛନ୍ତି । ସେ ଟ୍ୱିଟରରେ ଲୋକଙ୍କୁ ସତର୍କ କରାଇଛନ୍ତି । ସୋନୁଙ୍କ ନାଁରେ ଆକାଉଣ୍ଟ୍ ଖୋଲି ଟଙ୍କା ମାଗୁଥିବା ଅସାମାଜିକ ଲୋକଙ୍କ ଠାରୁ ଦୂରେଇ ରହିବାକୁ ସେ କହିଛନ୍ତି । ସେ ଟ୍ୱିଟ୍ କରି ଶ୍ରମିକଙ୍କୁ ନିଃଶୁଳ୍କରେ ସେବା ଯୋଗାଇଥିବା କଥା କହିଛନ୍ତି । ସୋନୁ ନିଜ ଟ୍ୱିଟର ହ୍ୟାଣ୍ଡଲରେ ଲେଖିଛନ୍ତି , “ବନ୍ଧୁଗଣ , ଶ୍ରମିକଙ୍କୁ ଆମେ ଯେଉଁ ସେବା ଯୋଗାଉଛୁ ତାହା ସମ୍ପୁର୍ଣ୍ଣ ନିଃଶୁଳ୍କ ଅଟେ । ଯଦି ମୋ ନାଁ ନେଇ କୌଣସି ବ୍ୟକ୍ତି ଆପଣଙ୍କୁ ଟଙ୍କା ମାଗୁଛନ୍ତି ତେବେ ତାଙ୍କୁ ମନା କରନ୍ତୁ ଏବଂ ତୁରନ୍ତ ନିକଟସ୍ଥ ଥାନାରେ ରିପୋର୍ଟ କରନ୍ତୁ ।” ଏଠାରେ ଆପଣଙ୍କୁ କହିରଖୁଛୁ ଯେ ସୋନୁ ସ୍ୱୟଂ ଖର୍ଚ୍ଚରେ ବସର ଆୟୋଜନ କରୁଛନ୍ତି । ସେ ସୋସିଆଲ୍ ମିଡିଆ ମାଧ୍ୟମରେ ଲୋକଙ୍କ ସହ ସଂପର୍କ କରି ସହାୟତା କରୁଛନ୍ତି ।

Advertisment

 ତାଙ୍କର ଏଭଳି ମହତ୍ କାର୍ଯ୍ୟକୁ ସବୁରି ମହଲରେ ପ୍ରଶଂସା କରାଯାଉଛି । ଲୋକେ ତାଙ୍କୁ ଗରିବଙ୍କ ମସିହା ବୋଲି ବି କହୁଛନ୍ତି । ତାଙ୍କର ଏହି କାମ ପାଇଁ ମହାରାଷ୍ଟ୍ର ରାଜ୍ୟପାଳ ଭଗତ ସିଂହ କୋଶ୍ୟାରୀ ସୋନୁଙ୍କୁ କାର୍ଯ୍ୟାଳୟ ଡକାଇଥିଲେ । ସେ କିଭଳି ଭାବେ ଲୋକଙ୍କୁ ଖାଦ୍ୟସାମଗ୍ରୀ ପହଁଚାଇବା ସହ ଘରକୁ ପଠାଇବାରେ ସହାୟତା କରୁଛନ୍ତି ତାହା ଜଣାଇଥିଲେ । ମହାରାଷ୍ଟ୍ର ରାଜ୍ୟପାଳ ଅଭିନେତାଙ୍କ କାମର ଖୁବ୍ ପ୍ରଶଂସା କରିବା ସହ ତାଙ୍କୁ ସହଯୋଗ କରିବା ପାଇଁ ପ୍ରତିଶୃତି ଦେଇଛନ୍ତି ।