ବିଜେପି ବିରୋଧରେ ବିରୋଧୀଙ୍କ ଚୂଡାନ୍ତ ରଣନୀତି: କଂଗ୍ରେସର ଘନଘନ ବୈଠକ, ବାଦ୍ ପଡିଲା ଆପ୍

127

କନକ ବ୍ୟୁରୋ :  ବିଜେପିକୁ ଗାଦିରୁ ହଟାଇବାକୁ ଜୋରଦାର ଲାଗିପଡିଛନ୍ତି ବିରୋଧୀ । ଆଜି ପୁନର୍ବାର ଏକ ଭର୍ଚୁଆଲ ବୈଠକରେ ଯୋଗଦେଇ ଶାସକ ଦଳ ବିରୋଧରେ ଚୂଡାନ୍ତ ରଣନୀତି ନିର୍ଦ୍ଧାରଣ କରିବେ କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଦୀ । ଏଥିରେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ, ତାମିଲ ନାଡୁ ମୁଖ୍ୟମନ୍ତ୍ରୀ ଏମକେ ଷ୍ଟାଲିନ୍, ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ ଠାକରେ, ଜାତୀୟ କଂଗ୍ରେସ ଦଳର ସଭାପତି ଶରଦ ପୱାରଙ୍କ ବରିଷ୍ଠ ନେତା ଏଥିରେ ଯୋଗ ଦେଉଛନ୍ତି । କିନ୍ତୁ ଏହି ବୈଠକକୁ ଆପ୍ ମୁଖ୍ୟ ତଥା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରୀୱାଲ କିମ୍ବା ତାଙ୍କ ଦଳର କାହାକୁ ନିମନ୍ତ୍ରଣ କରାଯାଇନଥିବା କଂଗ୍ରେସର ଜଣେ ନେତା ଗଣମାଧ୍ୟମକୁ କହିଛନ୍ତି । ଏହି ବୈଠକରେ ମୋଦୀ ସରକାର ବିରୋଧରେ ଚୂଡାନ୍ତ ରଣନୀତି ପ୍ରସ୍ତୁତ କରାଯିବ । ଏହାସହ ଦରଦାମ ବୃଦ୍ଧି, ପେଗାସସ୍ ଗୁଇନ୍ଦାଗିରି, କୋଭିଡ୍ -୧୯ କାର୍ଯ୍ୟକ୍ରମରେ ଅନିୟମିତତା, ବେକାରୀ ସମସ୍ୟା, ଅର୍ଥନୈତିକ ଦୂରାବସ୍ଥା ପରି ଏକାଧିକ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଉପରେ ଆଲେଚନା ହେବ । ଏସବୁ ପ୍ରସଙ୍ଗକୁ ଉଠାଇ ଆଗାମୀ ନିର୍ବାଚନ ପୂର୍ବରୁ ବିଜେପି ସରକାରଙ୍କ ମୁଖା ଖୋଲିବାକୁ ବିରୋଧୀ ଏକାଠି ହେଉଥିବା କହିଛନ୍ତି ସିପିଆଇଏମ୍ ସାଧାରଣ ସମ୍ପାଦକ ସୀତାରାମ ୟେଚୁରୀ । ଏହସହ ଜନତା ଭୋଗୁଥିବା ବିଭିନ୍ନ ସମସ୍ୟାକୁ ଢାଲ କରି ଆଗକୁ ୫ଟି ରାଜ୍ୟରେ ହେବାକୁ ଥିବା ବିଧାନସଭା ନିର୍ବାଚନରେ ବିଜେପିକୁ ହରାଇବାକୁ ବିରୋଧୀ ଏକାଠି ହୋଇଥିବା ମଧ୍ୟ ସେ କହିଛନ୍ତି ।ସୂଚନା ମୁତାବକ, ଗତ ମୌସୁମୀ ଅଧିବେଶନରେ ଏସବୁ ପ୍ରସଙ୍ଗ ଉଠାଇ ଉଭୟ ଗୃହରେ ହୋହାଲ୍ଲା କରିଥିଲେ । ଫଳରେ ଗୃହକାର୍ଯ୍ୟକୁ ଏକାଧିକ ଥର ବନ୍ଦ କରିବାକୁ ପଡିଥିଲା । ଉପରୋକ୍ତ ବିଷୟ ଉପରେ ସଂସଦରେ ଠିକ ଭାବେ ଆଲୋଚନା ହୋଇପାରିନଥିବାରୁ ବିରୋଧୀ ଅସନ୍ତୋଷ ପ୍ରକାଶ କରିଥିଲେ ।