ଟଙ୍କା ସରିଗଲା ବୋଲି ପୁରୀରେ ବାପାକୁ ଛାଡି ଚାଲିଗଲା ପୁଅ : ଦୟାନଦୀରେ ଫିଙ୍ଗିଲା ଗୀତା, ଭାଗବତ, ପୂଜାପାଠ ବହି ; ଆଧାର କାର୍ଡ ବି ଗଲା
କନକ ବ୍ୟୁରୋ : ବ୍ୟାଙ୍କରେ ବାପାଙ୍କ ଜମା ଟଙ୍କା ଦେଖି ପୁଅ ପାଖରେ ରଖିଥିଲା । ଟଙ୍କା ସରିଲା ପରେ ଦୟା ନଦୀରେ ଫିଙ୍ଗିଦେଲା ଗୀତା, ଭାଗବତ, ପୂଜାପାଠ ବହି ସହ ଆଧାର କାର୍ଡ । ଶେଷରେ ଗାଡିରେ ଆଣି ବାପାକୁ ପୁରୀରେ ଛାଡିଦେଲା । ଏଭଳି ଘଟଣା ଦେଖିବାକୁ ମିଳିଛି ପୁରୀରେ । ଗତକାଲି ଗୁଣ୍ଡିଚାମନ୍ଦିରକୁ ଲାଗିଥିବା ନୃସିଂହଙ୍କ ଚକଡାରେ ବସିଥିବା ବୃଦ୍ଧଙ୍କ ଏଭଳି ଦୁର୍ଦ୍ଦଶା ଉପସ୍ଥିତ ଲୋକଙ୍କ ଛାତି ଥରାଇଦେଇଛି । ନୃସିଂହ ମନ୍ଦିର ଚକଡାରେ ବସିଥିଲେ ଏହି ୮୪ ବର୍ଷିୟ ବୃଦ୍ଧ । ତାଙ୍କ ନାଁ ଧନେଶ୍ୱର ବେହୁରା । ଘର କଟକ ଜିଲ୍ଲା ନିଆଳି ଥାନା ପହାଙ୍ଗା ଅନ୍ତର୍ଗତ ପେଠିବୁଡା ସାହିରେ । ଏକୁଟିଆ ବି ଠିଆ ହୋଇପାରୁନାହାନ୍ତି ଧନେଶ୍ୱର । ମୁହଁ ସାରା ପାଚିଲା ଦାଢି ସାଙ୍ଗକୁ ପେଜୁଆ ଆଖି ଚାରିଆଡକୁ ଘୁରି ବୁଲୁଥାଏ । ଧନେଶ୍ୱରକୁ ତାଙ୍କ ପୁଅ ପୁରୀରେ ଛାଡି ଚାଲିଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଧନେଶ୍ୱରଙ୍କ କହିବା କଥା ହେଲା, ସେ ଦୀର୍ଘ ବର୍ଷ ଧରି ପୁରୀରେ ରହିଆସୁଛନ୍ତି । ମନ୍ଦିରର ପୂଜକ ଭାବେ କାମ କରୁଥିଲେ । ପାଖରେ ୫୦ରୁ ୬୦ ହଜାର ଟଙ୍କା ଥିଲା । ପୁଅ ଆସି ଘରକୁ ଡାକିନେଇଥିଲା । କିନ୍ତୁ ଟଙ୍କା ନେବା ପରେ ଆଣି ପୁରୀରେ ଛାଡିଦେଇଛି । ଏହା ସହ ଗୀତା, ଭାଗବତ ଆଧାରକାର୍ଡକୁ ଦୟାନଦୀରେ ପିଙ୍ଗିଦେଇଛି । କୋହଭରା କଣ୍ଠରେ ଏହା କହିଛନ୍ତି ଧନେଶ୍ୱର ।ସ୍ୱେଚ୍ଛାସେବୀ ଖବର ଶୁଣି ପଂହଚିଥିଲେ । ପରେ ପୁଲିସ ଭ୍ୟାନ ଆସି ଧନେଶ୍ୱରଙ୍କୁ ଉଦ୍ଧାର କରି ନୀଳାଦ୍ରି ନିଳୟରେ ରଖାଯାଇଛି ।