କନକ ବ୍ୟୁରୋ : ଜମି ବିକ୍ରି ଟଙ୍କା ନ ମିଳିବାରୁ ନୃସଂଶ କାଣ୍ଡ ଭିଆଇଛି ବଡ଼ ପୁଅ । ନିଜ ବାପ-ମାଙ୍କୁ ଅତି ନିର୍ମମ ଭାବେ ପନିକିରେ ହାଣି ହତ୍ୟା କରିଛି । ମୃତକ ହେଲେ କୃଷ୍ଣଚନ୍ଦ୍ର ସିଂହ (୬୪) ଓ ତାଙ୍କ ପତ୍ନୀ ଲୀଳାବତୀ (୫୮) । ଏମିତି ଅଭାବନୀୟ ଘଟଣା ଘଟିଛି ନୂଆଗାଁ ବ୍ଲକ ଅନ୍ତର୍ଗତ ଲିମଡା ପଞ୍ଚାୟତ ବିଶିପୁର ଗାଁରେ । ହତ୍ୟାକାରୀ ପୁଅ ଘଟଣା ପରେ ଘରୁ ଫେରାର ହୋଇ ଯାଇଛି । ବିଶ୍ରା ପୁଲିସ ଦୁଇଟି ଶବ ଜବତ କରି ଘଟଣାର ତଦନ୍ତ ଚଳାଇଛି ।
Kanak News is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ମୁତାବକ ବିଶିପୁର ଗାଁରେ କୃଷ୍ଣଚନ୍ଦ୍ର ସିଂ, ପତ୍ନୀ ଲୀଳାବତୀ, ବଡ ପୁଅ ଜୟ (୪୦), ସାନ ପୁଅ ସୋମେନ (୩୫) ପରିବାର ସହ ରହନ୍ତି । ଗତ ୨୨ ଦିନ ତଳେ କୃଷ୍ଣଚନ୍ଦ୍ର କିଛି ଜମି ବିକି ଥିଲେ । ଜମି ବିକ୍ରି ଟଙ୍କାର ଭାଗ ବଡ଼ ପୁଅ ଜୟକୁ ମିଳି ନ ଥିଲା, ଯାହାକୁ ନେଇ ଜୟ ବାପା-ମା’ଙ୍କ ସହ ଝଗଡା କରୁଥିଲା ।
ଆଜି ସକାଳ ପ୍ରାୟ ୯ଟାରେ ଏହି କଥାକୁ କେନ୍ଦ୍ରକରି ଜୟ ବାପା-ମା’ ଙ୍କୁ ଗାଳିଗୁଲଜ କରିଥିଲା । ସାନ ପୁଅ ସୋମେନ ବିରୋଧ କରିବାରୁ ଉତ୍ତେଜିତ ହୋଇ ଜୟ ଘରୁ ପନକି ଆଣି ଉଭୟ ବାପା-ମାଙ୍କୁ ପ୍ରଣାନ୍ତକ ଆକ୍ରମଣ କରିଥିଲେ । ଫଳରେ ଘଟଣାସ୍ଥଳରେ ବାପା-ମାଙ୍କର ମୃତ୍ୟୁ ହୋଇ ଯାଇଥିଲା । ବାପା – ମା ମୃତ୍ୟୁ ହୋଇ ଯିବାରୁ ଗିରଫ ଭୟରେ ଜୟ ଘରୁ ଫେରାର ହୋଇ ଯାଇଥିଲା । ସାନ ପୁଅ ସୋମେନ ହତ୍ୟାକାଣ୍ଡ ସମ୍ପର୍କରେ ବିଶ୍ରା ଥାନାକୁ ସୂଚନା ଦେବା ସହ ଲିଖିତ ଏତଲା ଦେଇଥିଲେ ।