ନିର୍ବାଚନ ଲଢୁଛନ୍ତି ଫିଲ୍ମଷ୍ଟାର । ଜାଣନ୍ତୁ କେଉଁ କେଉଁ ଅଭିନେତା ଓହ୍ଲାଇଛନ୍ତି ନିର୍ବାଚନ ମୈଦାନକୁ

କନକ ବ୍ୟୁରୋ :  ସାଧାରଣ ନିର୍ବାଚନ ତାରିଖ ଘୋଷଣା ହେବା ପରେ ସାରା ଦେଶରେ ଏବେ ନିର୍ବାଚନୀ ଉଷ୍ମତା । ବିଭିନ୍ନ ରାଜନୈତିକ ଦଳ ନିଜ ନିଜ ସପକ୍ଷରେ ଜନମତକୁ ଆଣିବା ପାଇଁ ବିଭିନ୍ନ ପନ୍ଥା ଆପଣାଇଛନ୍ତି । ତେବେ ନିର୍ବାଚନ ମଇଦାନକୁ ଚଳଚ୍ଚିତ୍ର ତାରକା ଏବଂ ଖେଳାଳିମାନେ ଆସିବା କିଛି ନୂଆ କଥା ନୁହେଁ। ପ୍ରତି ଥର ନିର୍ବାଚନରେ କିଛି ନୂଆ ମୁହଁ ଦେଖିବାକୁ ମିଳୁଛି। ଲୋକପ୍ରୀୟ ଫିଲ୍ମଷ୍ଟାରମାନଙ୍କୁ ବିଭିନ୍ନ ଦଳ ପକ୍ଷରୁ ନିର୍ବାଚନ ଲଢ଼ିବାର ସୁଯୋଗ ମିଳୁଛି ଏବଂ ନିର୍ବାଚନ ପ୍ରଚାରରେ ମଧ୍ୟ ସେମାନଙ୍କୁ ଅସ୍ତ୍ର ଭାବେ ବ୍ୟବହାର କରାଯାଉଛି। ତେବେ ପ୍ରଥମେ କଂଗ୍ରେସ ଦ୍ବାରା ଏହି ଟ୍ରେଣ୍ଡ୍ ଆରମ୍ଭ ହୋଇଥିଲା। ଏବେ ବିଜେପି ଏବଂ ଟିଏମସି ସମେତ ଅନ୍ୟ ଦଳଗୁଡ଼ିକ ମଧ୍ୟ ସେଲିବ୍ରିଟିଙ୍କୁ ନିର୍ବାଚନ ମଇଦାନକୁ ଆଣୁଛନ୍ତି।

୧୯୯୧ରେ ରାମାୟଣ ସିରିଏଲ ସୀତା ଚରିତ୍ରରେ ଅଭିନୟ କରିଥିବା ଦୀପିକା ଚିଖାଲିଆଙ୍କୁ ବିଜେପି ପ୍ରାର୍ଥୀ କରିଥିଲା। ସେ ବରୋଦାରୁ ନିର୍ବାଚନ ଲଢ଼ିଥିଲେ। ସେହିପରି ରାମାୟଣରେ ରାବଣ ଭୂମିକା ନିର୍ବାହ କରିଥିବା ଗୁଜରାଟୀ ଅଭିନେତା ଅରବିନ୍ଦ ତ୍ରିବେଦୀ ମଧ୍ୟ ବିଜେପି ଟିକେଟରେ ନିର୍ବାଚନ ଲଢ଼ିଥିଲେ। ୧୯୯୧ରେ ପୂର୍ବ ବଲିଉଡ୍ ସୁପରଷ୍ଟାର ରାଜେଶ ଖାନ୍ନାଙ୍କୁ ପ୍ରାର୍ଥୀ କରିଥିଲା କଂଗ୍ରେସ। ମହାଭାରତରେ କୃଷ୍ଣ ଚରିତ୍ରରେ ଥିବା ନୀତୀଶ ଭରଦ୍ବାଜଙ୍କୁ ବିଜେପି ୧୯୯୬ରେ ପ୍ରାର୍ଥୀ କରିଥିଲା। ବିନୋଦ ଖାନ୍ନା ମଧ୍ୟ ବିଜେପି ଦ୍ବାରା ରାଜନୀତିକୁ ଆସିଥିଲେ।

ସେହିପରି କେ ସତ୍ୟନାରାୟଣ (ଟିଡିପି), କୃଷ୍ଣମ୍ ରାଜୁ (ବିଜେପି), ଅମ୍ବରିଶ (ଜନତା ଦଳ ଏବଂ କଂଗ୍ରେସ), ଶତ୍ରୁଘ୍ନ ସିହ୍ନା (ବିଜେପି), ରାଜ ବବ୍ବର (ଏସପି/କଂଗ୍ରେସ), ଜୟା ପ୍ରଦା (ଏସପି), ଗୋବିନ୍ଦା (କଂଗ୍ରେସ), ଧର୍ମେନ୍ଦ୍ର (ବିଜେପି), ରାମ୍ୟ ଦିବ୍ୟା ସ୍ପନ୍ଦନା (କଂଗ୍ରେସ), ବିଜୟା ଶାନ୍ତି (ଟିଆରଏସ୍) , ସନ୍ଧ୍ୟା ରାୟ (ଟିଏମସି), ହେମା ମାଳିନୀ (ବିଜେପି), ପରେଶ ରାୱଲ (ବିଜେପି), ବାବୁଲ ସୁପ୍ରିୟୋ (ବିଜେପି) ଦୀପକ ଦେବ ଅଧିକାରୀ (ଟିଏମସି), କିରନ ଖେର (ବିଜେପି), ମନୋଜ ତିୱାରୀ (ବିଜେପି) ପ୍ରାର୍ଥୀ ଭାବେ ନିର୍ବାଚନ ଲଢ଼ିଛନ୍ତି।