କନକ ବ୍ୟୁରୋ: ମାଆ ମୁର୍ଚ୍ଛା ଯାଉଛି, ବାପା ବାକଶୂନ୍ୟ ହୋଇଛନ୍ତି… ଆଈର ପାଟିକୁ ଶବ୍ଦ ଆସୁନି, ମାଉସୀ ବି ମଥାରେ ହାତ ଦେଇ ବସିଛନ୍ତି । ଆଉ ପୂରା ପରିବାର ମଥାପିଟି କାନ୍ଦୁଛି । ପରିବାରର ଭବିଷ୍ୟତ ଯେତେବେଳେ ଅନ୍ଧକାର ହୋଇଯାଉଛି । ପୁଅକୁ ଯେତେବେଳେ ରାଜଧାନୀର ଡ୍ରେନ ମାରିଦେଇଛି । ସେତେବେଳେ ଲୁହ, କୋହ, କାନ୍ଦ, ସମବେଦନା ଆଉ ଛାତିଥରା ଚିତ୍କାରରେ ଫାଟି ପଡୁଛି ରାଜଧାନୀରର କଳିକନ୍ଦି । ଶବ୍ଦହୀନ ସ୍ମାର୍ଟସିଟି, ଆଉ ସ୍ତବ୍ଦ ହୋଇଛି ସାରା ଓଡିଶା…
Kanak News is now on WhatsApp
Join and get latest news updates delivered to you via WhatsApp
ଜ୍ୟୋତିର ଜୀବନ ଯିବା ପରେ ପରିବାରକୁ ସହାୟତା ଘୋଷଣା କରିଛନ୍ତି ସରକାର । ୪ ଲକ୍ଷ ଟଙ୍କାର ସହାୟତା ରାଶି ପ୍ରଦାନ ନେଇ ମନ୍ତ୍ରୀ ଅଶୋକ ପଣ୍ଡା ସୂଚନା ଦେବା ମାତ୍ରେ ହିଁ ତାତି ଯାଇଛନ୍ତି ଲୋକେ । ଆଉ ସ୍ମାର୍ଟସିଟିର ଏ ସାଙ୍ଘାତିକକାଣ୍ଡ ପାଇଁ ହଇଚଇ ହୋଇପଡିଛି ସୋସିଆଲ ମିଡିଆ । ଫେସବୁକ, ଟ୍ୱିଟରରେ ନିଜ ମତାମତ ରଖି ସରକାର ଏବଂ ବିଛଣାରେ ଶୋଇଥିବା ବିଏମସି ଉପରେ ମନଇଚ୍ଛା ବର୍ଷିଛନ୍ତି ୟୁଜର୍ସ ।
ପାଣିରେ ଭାସିଯାଇ ପୁଅ ପ୍ରାଣ ହରାଇବା ପରେ ଜ୍ୟୋତି ଜୀବନର ମୂଲ୍ୟ କଣ ୪ ଲକ୍ଷ ବୋଲି ଅନେକ ଲୋକ ପ୍ରଶ୍ନ ଉଠାଇଛନ୍ତି । ତକ୍ରାଳୀନ ମେୟରଙ୍କ ଉଦ୍ଦେଶ୍ୟରେ ସୋସିଆଲ ମିଡିଆରେ ଜଣେ ୟୁଜର୍ସ ହରେକୃଷ୍ଣ ସାହୁ ରାଜାର ବାପାଙ୍କ ଅସହାୟତାକୁ ବଖାଣିଛନ୍ତି । ଜଣେ ବାପା ପାଇଁ ପୁଅ ବଡ, ପଇସା ନୁହେଁ ? ପୁଅର ମୃତ୍ୟୁ ବାବଦକୁ ମିଳୁଥିବା ୪ ଲକ୍ଷ ଟଙ୍କା ତାଙ୍କୁ ନଦେଇ ପ୍ରଶାସନ ସିମେଣ୍ଟ ବାଲିରେ ସ୍ଲାବ ତିଆରି କରୁ । ଆଉ ଭୁବନେଶ୍ୱରର ସବୁ ମୁକୁଳା ଡ୍ରେନ ଉପରେ ଢାଙ୍କୁଣି ପକାଉ । ହୁଏତ ଏହି ଟଙ୍କାରେ କାମ ହେଲେ ଅନେକ ପୁଅ ମରଣ ମୁହଁରୁ ମୁକ୍ତିପାଇଯିବେ…
ଭିନ୍ନ ଭିନ୍ନ ପୋଷ୍ଟରେ ଅନେକ ସାମ୍ବାଦିକ, ସାଧାରଣ ଲୋକ ବିଏମସିର ବେପରୁଆପଣ, ପୁଅର ଜୀବନର ମୂଲ୍ୟକୁ ସରକାର ୪ ଲକ୍ଷରେ ତଉଲୁଥିବାରୁ ତାକୁ ସମାଲୋଚନା କରିଛନ୍ତି । ଅସରାଏ ବର୍ଷାରେ ଭୁବନେଶ୍ୱର ଅହରହ ଭାସୁଥିବାରୁ ଆଗାକୁ ପିଲାଙ୍କୁ ଘର ବାହାରକୁ ଛାଡୁଥିଲେ ଏମିତି ପୋଷାକ ପିନ୍ଧାଇ ଛାଡିବାକୁ ସୋସିଆଲ ମିଡିଆରେ ୟୁଜର୍ସ କଡା ସମାଲୋଚନା କରିଛନ୍ତି ।
ତେବେ ପାଣିରେ ଭାସିଯିବାର ପାଖାପାଖି ୧୯ ଘଣ୍ଟାର ଅପରେସନ ପରେ ଡ୍ରେନ ନିକଟ ଏକ ବୁଦା ମୂଳରୁ ମିଳିଛି ଜ୍ୟୋତିପ୍ରକାଶଙ୍କ ମୃତଦେହ । ଆଉ ଡ୍ରେନ ପାଇଁ ପୁଅର ମୃତ୍ୟୁ ପରେ ହୃଦୟଥରା ଘଟଣାରେ ରାଜନୀତିର ରଙ୍ଗ ମାରିବାକୁ ଆରମ୍ଭ ହୋଇଛି ପ୍ରୟାସ । ମୃତ୍ୟୁ ପରେ ପୁରୀ ସ୍ୱର୍ଗଦ୍ୱାରରେ ରାଜା ସିନା ପଞ୍ଚଭୂତରେ ଲୀନ ହୋଇଛି, ହେଲେ ଏ ଅଭାବନୀୟ ଘଟଣା ଅନେକ ପ୍ରଶ୍ନ ଛାଡିଯାଇଛି…