କେନ୍ଦ୍ରମନ୍ତ୍ରୀଙ୍କ ଜନ୍ମଦିନ ଅବସରରେ ବଣ୍ଟାଯାଉଥିଲା ରାସନ୍ … ସାମାଜିକ ଦୂରତାକୁ ଭୁଲିଲେ ଲୋକେ । ସୋସିଆଲ୍ ମିଡିଆରେ ବିଧାୟକ ମାଗିଲେ କ୍ଷମା ।
କରୋନା ଘଡ଼ିରେ ସଂକ୍ରମଣକୁ ରୋକିବା ପାଇଁ ସାମାଜିକ ଦୂରତାକୁ ଅସ୍ତ୍ର କରିଛନ୍ତି ସରକାର । କିଛି ଲୋକ ଏହାକୁ ମାନୁଥିବା ବେଳେ ଆଉ କିଛି ଏହାକୁ ଫୁ’ କରି ଉଡାଉଛନ୍ତି । କିନ୍ତୁ ଭୋକରେ ପେଟ ପୋଡିଯାଉଥିବା ଲୋକ କ’ଣ ବା ବୁଝିବ ସାମାଜିକ ଦୂରତାର ମୂଲ୍ୟ! ଏଭଳି ଏକ ଚିତ୍ର ଦେଖିବାକୁ ମିଳିଛି ମଧ୍ୟପ୍ରଦେଶର ଇନ୍ଦୋରରେ ।
Kanak News is now on WhatsApp
Join and get latest news updates delivered to you via WhatsApp
ନିକଟରେ କେନ୍ଦ୍ରମନ୍ତ୍ରୀ ନରେନ୍ଦ୍ର ସିଂହ ତୋମାରଙ୍କ ଜନ୍ମଦିନ ଅବସରରେ ଇନ୍ଦୋରର ପୂର୍ବ ବିଧାୟକ ସୁଦର୍ଶନ ଗୁପ୍ତା ଗରିବଙ୍କୁ ରାସନ୍ ବାଣ୍ଟିବା କାର୍ଯ୍ୟକ୍ରମ ଆୟୋଜନ କରିଥିଲେ । ସେ କିଛି ସମୟ ଗରିବ ଲୋକଙ୍କ ଗହଣରେ ଅଟକିଥିଲେ । କିନ୍ତୁ ସେ ଯିବାପରେ ସାମାଜିକ ଦୂରତାକୁ ଛାଟ ମାରିବା ପରି ଅବସ୍ଥା ଉତ୍ପର୍ଣ୍ଣ ହୋଇଥିଲା ।
ଆପଣଙ୍କୁ କହିରଖୁଛୁ , ଭାଇରସ୍ ସଂକ୍ରମଣରେ ଅଧିକ ପ୍ରଭାବିତ ରାଜ୍ୟ ତାଲିକାରେ ମଧ୍ୟପ୍ରଦେଶ ମଧ୍ୟ ଆସୁଛି । କେନ୍ଦ୍ରମନ୍ତ୍ରୀଙ୍କ ଜନ୍ମଦିନରେ ଖାଦ୍ୟସାମଗ୍ରୀ ବଣ୍ଟନ ପାଇଁ ୨୦୦୦ ଗରିବ ପରିବାରକୁ ଡକାଯାଇଥିଲା । ରାସନ୍ ବାଣ୍ଟିବା ସମୟରେ ଲୋକଙ୍କ ମଧ୍ୟରେ ଠେଲାପେଲା ଦେଖିବାକୁ ମିଳିଲା । ରାସନ୍ ପାଇବା ଆଶାରେ ସାମାଜିକ ଦୂରତା ଭୁଲି ଲୋକଙ୍କ ମଧ୍ୟରେ ପ୍ରବଳ ଗହଳି ଦେଖିବାକୁ ମିଳିଲା । ଅଧିକ ରାସନ୍ ମିଳିବା ଆଳରେ ଯେ ଯେତେ ପାରିଲା ଖାଦ୍ୟ ପ୍ୟାକେଟ୍ ବୋହି ନେଇଗଲା । ଏହାର ଭିଡିଓ ସୋସିଆଲ୍ ମିଡିଆରେ ଭାଇରାଲ୍ ହେବା ପରେ ବିଧାୟକ ଏନେଇ କ୍ଷମାପ୍ରାର୍ଥନା କରିଥିଲେ । ସେ ଲୋକଙ୍କୁ ସାମାଜିକ ଦୂରତା ମଧ୍ୟରେ ବସାଇ ଟୋକନ୍ ବ୍ୟବସ୍ଥା କରି ଖାଦ୍ୟସାମଗ୍ରୀ ବାଣ୍ଟୁଥିଲେ କିନ୍ତୁ ପରେ ଅବ୍ୟବସ୍ଥା ଉତ୍ପର୍ଣ୍ଣ ହେବାରୁ ସେ କ୍ଷମା ମାଗିଥିଲେ ।