କନକ ବ୍ୟୁରୋ: ବିଜେଡି ଦ୍ୱିତୀୟ ପର୍ଯ୍ୟାୟ ପ୍ରାର୍ଥୀ ତାଲିକା ଜାରି କରିଛି । ଦ୍ୱିତୀୟ ପର୍ଯ୍ୟାୟରେ ୨୭ ବିଧାନସଭା ଓ ୫ ଲୋକସଭା ଆସନ ପାଇଁ ପ୍ରାର୍ଥୀ ଘୋଷଣା ହୋଇଛି । ବର୍ତ୍ତମାନ ସୁଦ୍ଧା ବିଜେଡି ୯୯ ବିଧାନସଭା ଆସନ ଓ ୨୦ ଲୋକସଭା ଆସନରେ ପ୍ରାର୍ଥୀଙ୍କ ନାଁ ଘୋଷଣା କରି ସାରିଛି । କେବଳ ବାଲେଶ୍ୱର ଲୋକସଭା ବାକି ରହିଛି । ତେବେ ଯେଉଁ ଯେଉଁ ଆସନଗୁଡିକରେ ଟିକେଟକୁ ନେଇ ଅଧିକ ବିବାଦ ରହିଛି । ସେଠାରେ ପ୍ରାର୍ଥୀ ଘୋଷଣା କରାଯାଇନାହିଁ । ଏବେ ବି ସେହି ଆସନଗୁଡିକରେ ଟିକେଟ ବଣ୍ଟନ ପାଇଁ କସରତ ଚାଲିଛି । ବହୁ ଆଶାୟୀ ଥିବାରୁ ସେମାନଙ୍କୁ ବୁଝାସୁଝା କରି ଜଣଙ୍କ ପ୍ରାର୍ଥୀତ୍ୱ ଉପରେ ସହମତି ଆଣିବାକୁ ଶୀର୍ଷ ନେତୃତ୍ୱ ଉଦ୍ୟମ କରୁଛନ୍ତି । ତେବେ ମିଳୁଥିବା ସୂଚନା ମୁତାବକ, ଏଇ ସପ୍ତାହରେ ଆଉ କିଛି ଆସନରେ ପ୍ରାର୍ଥୀ ଘୋଷଣା ହେବାର ସମ୍ଭାବନା ରହିଛି ।
ଆଗାମୀ ୨୦୨୪ ସାଧାରଣ ନିର୍ବାଚନ ପାଇଁ ବିଜୁ ଜନତା ଦଳର ଆଉ ୫ଟି ଲୋକସଭା ଏବଂ ୨୭ଟି ବିଧାନସଭା କ୍ଷେତ୍ର ପାଇଁ ପ୍ରାର୍ଥୀଙ୍କ ନାମ ପ୍ରକାଶ ପାଇଛି। ନବୀନ ଓଡ଼ିଶାର ବିକାଶ ପ୍ରକ୍ରିୟାକୁ ଆହୁରି ତ୍ୱରାନ୍ୱିତ କରିବାକୁ ଆଗେଇ ଆସନ୍ତୁ। ବିଜୁ ଜନତା ଦଳର ପ୍ରାର୍ଥୀଙ୍କ ପ୍ରତି ଆଶୀର୍ବାଦ ରଖନ୍ତୁ। #BJDWithOdisha pic.twitter.com/ywaUkbyjum
— Biju Janata Dal (@bjd_odisha) April 3, 2024
ଗୁରୁତ୍ୱପୂର୍ଣ୍ଣ କଥା ହେଲା, ଦ୍ୱିତୀୟ ତାଲିକାରେ ୭ ମହିଳା ସ୍ଥାନ ପାଇଥିବାବେଳେ ପ୍ରତାପ ଜେନାଙ୍କ ସମେତ ୭ ବିଧାୟକଙ୍କ ଟିକେଟ କଟିଛି । ଦଳ ବଦଳ ନେତାଙ୍କୁ ବି ଟିକେଟ ଦେଇଛି ବିଜେଡି । ୭ ମହିଳା ପ୍ରାର୍ଥୀଙ୍କ ମଧ୍ୟରୁ ୪ଜଣ ବିଧାୟକ ରିପିଟ୍ ହୋଇଛନ୍ତି । ଅନ୍ୟ ଜଣେ ମହିଳାଙ୍କୁ ତାଙ୍କ ସ୍ୱାମୀଙ୍କ ସ୍ଥାନରେ ଟିକେଟ ମିଳିଛି । ବର୍ତ୍ତମାନ ସୁଦ୍ଧା ବିଜେଡି ୯୯ଜଣ ପ୍ରାର୍ଥୀଙ୍କ ନାଁ ଘୋଷଣା କରିସାରିଲାଣି । ଘୋଷିତ ପ୍ରାର୍ଥୀଙ୍କ ମଧ୍ୟରେ ମନ୍ତ୍ରୀ ଅଶୋକ ପଣ୍ଡାଙ୍କ ନାଁ ରହିଛି, ସେ ଭୁବନେଶ୍ୱର-ଏକାମ୍ର ଆସନରୁ ନିର୍ବାଚନ ଲଢିବେ । ବ୍ରଜରାଜନଗରରୁ ଅଳକା ମହାନ୍ତି, ଝାରୁସୁଗୁଡାରୁ ଦୀପାଳି ଦାସ ଓ ବ୍ରହ୍ମପୁରରୁ ରମେଶ ଚନ୍ଦ୍ର ଚ୍ୟାଉ ପଟ୍ଟନାୟକ ପ୍ରାର୍ଥୀ ହୋଇଛନ୍ତି । ଭୁବନେଶ୍ୱର ଉତ୍ତରରୁ ସୁଶାନ୍ତ ରାଉତଙ୍କ ପୁଣି ଟିକେଟ ମିଳିଛି । ଜଗତସିଂହପୁରୁ ପ୍ରଶାନ୍ତ ମୁଦୁଲି ପ୍ରାର୍ଥୀ ହେବେ । ଯଶୀପୁର ଆସନରୁ ପୂର୍ବତନ ଜିଲ୍ଲା ପରିଷଦ ସଭ୍ୟ ଚକ୍ରଧର ହେମ୍ବ୍ରମ ପ୍ରାର୍ଥୀ ହୋଇଛନ୍ତି । ସେହିପରି ସୋର ମ୍ୟୁନିସିପାଲଟି ଅଧ୍ୟକ୍ଷ ମାଧବ ଧଡାଙ୍କୁ ବିଜେଡି ଟିକେଟ ମିିଳଛି ।