ହାଡ ଭାଙ୍ଗୁଛି ଜାଡ, ଶୀତରେ ଥରୁଛି ସାରା ଓଡିଶା…ଦାରିଙ୍ଗିବାଡିରେ ବରଫବର୍ଷା…ଘର, ଅଗଣା ଗଛପତ୍ର ସବୁଠି ଢାଙ୍କି ରହିଛି ଧଳା ଆସ୍ତରଣ
କନକ ବ୍ୟୁରୋ: ଦାରିଙ୍ଗିବାଡିରେ ତୁଷାରପାତ । ବାଲିଗୁଡା-ଦାରିଙ୍ଗିବାଡି ଓ ସିମନବାଡିରେ ତୁଷାରପାତ ହୋଇଛି । ଓଡିଶାର କାଶ୍ମୀର କୁହାଯାଉଥିବା ଏହି ଦାରିଙ୍ଗିବାଡିରେ ଚଳିତ ବର୍ଷ ଏହା ପ୍ରଥମ ତୁଷାରପାତ । ଘର, ଅଗଣା, ଗଛ ପତ୍ର ସବୁଠି ଧଳା ଆସ୍ତରଣ ବସି ଯାଇଛି । ସେପଟେ ସୁନ୍ଦରଗଡ଼ କୋଇଡ଼ାରେ ପ୍ରବଳ ଥଣ୍ଡା ଅନୁଭୁତ ହେବା ସହ ତୁଷାରପାତ ହୋଇଛି । ଦୁଇଦିନ ହେଲା କୋହଲା ପାଗ ସାଙ୍ଗକୁ ତୁଷାରପାତ ହେବା ଦ୍ୱାରା ଜନଜୀବନ ଅସ୍ତବ୍ୟସ୍ତ ହୋଇପଡ଼ିଛି ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
ସକାଳୁ ସକାଳୁ ଗଛପତ୍ର, ଘର ଦ୍ୱାର, ଖୋଲା ପଡ଼ିଆ, ଗାଡି, ମଟର ଉପରେ ତୁଷାରପାତର ଧଳା ଆସ୍ତରଣ ଘୋଡ଼ାଇ ହୋଇ ରହିଛି । ଶୀତରେ ଘରୁ ବାହାରିବା ମଧ୍ୟ କଷ୍ଟକର ହୋଇପଡ଼ିଛି । କୋଇଡ଼ା ବ୍ଲକର ଟେନସା, କାଲଟା, ପାଟମୁଣ୍ଡା, ସାନଇନ୍ଦିପୁର, ମାଲଦା, ଜାମୁଢି ଭଳି ପ୍ରମୁଖ ସ୍ଥାନରେ ତୁଷାରପାତ ହୋଇଛି । ତୁଷାରପାତ ଏବଂ ପ୍ରବଳ ଥଣ୍ଡା ଯୋଗୁଁ ଦିନରେ ତାପମାତ୍ରା କମୁଛି । ଆଗକୁ ଆହୁରୀ ଶୀତ ବଢିବା ନେଇ ସୂଚନା ରହିଥିବା ବେଳେ ସ୍ଥାନୀୟ ବାସିନ୍ଦା ଚିନ୍ତାରେ ଅଛନ୍ତି । ସେହିଭଳି ପଶ୍ଚିମ ଓଡିଶାରେ ମଧ୍ୟ ଶୀତର ପ୍ରକୋପ ଅଧିକ ଅନୁଭୂତ ହେଉଛି । ଥଣ୍ଡାର ପ୍ରକୋପ ରେକର୍ଡ ଭାଙ୍ଗିଛି । ଶୀତ ଲହରି ଯୋଗୁଁ ହନ୍ତସନ୍ତ ହେଉଛନ୍ତି ସାଧାରଣ ଲୋକ । ବିଶେଷ କରି ଘର ଦ୍ୱାର ନଥିବା ନରାଶ୍ରୟଙ୍କ ଅସୁବିଧା ବଢ଼ାଇ ଦେଇଛି ଶୀତ । ଏହି ଜାଡରୁ ରକ୍ଷା ପାଇବା ପାଇଁ ବିଭିନ୍ନ ସ୍ଥାନରେ ନିଆଁ ଜାଳି ସେକି ହେଉଛନ୍ତି ।
ଏପଟେ ଅସହ୍ୟ ଜାଡରେ ଥରୁଛି ସାରା ଓଡିଶା । ରାତି ବଢ଼ିଲେ ବଢ଼ୁଛି ଥଣ୍ଡା । ତାସାଙ୍ଗକୁ ସକାଳୁ ସକାଳୁ ଶୀତ ଲହରୀ ବହିବା ଯୋଗୁଁ ଥଣ୍ଡାର ପ୍ରକୋପ ଆହୁରି ଅଧିକ ଅନୁଭୂତ ହେଉଛି । ମୟୂରଭଂଜଠୁ ମାଲକାନଗିରି, ସମ୍ବଲପୁରରୁ ଜଗତସିଂହପୁର ଯାଏଁ ସବୁଠି ପ୍ରବଳ ଥଣ୍ଡା ଅନୁଭୂତ ହେଉଛି । ଆସନ୍ତା ତିନି ଦିନ ଯାଏ ରାଜ୍ୟରେ ଜାରି ରହିବ ଶୀତ ଲହରୀ । ଏଥିପାଇଁ ପାଣିପାଗ କେନ୍ଦ୍ର ପକ୍ଷରୁ ୧୮ଟି ଜିଲ୍ଲାକୁ ଅରେଞ୍ଜ ୱାର୍ଣ୍ଣିଂ ଜାରି କରାଯାଇଛି । ଅରେଞ୍ଜ ୱାର୍ଣ୍ଣିଂ ଜାରି କରଯାଇଥିବା ଜିଲ୍ଳା ଗୁଡିକ ହେଉଛି ସୁନ୍ଦରଗଡ, ଦେବଗଡ, କେନ୍ଦୁଝର, ଅନୁଗୁଳ, ମୟୂରଭଞ୍ଜ, ଝାରସୁଗୁଡା, ସମ୍ବଲପୁର, ବରଗଡ, ଢ଼େଙ୍କାନାଳ, ବାଲେଶ୍ୱର, ଭଦ୍ରକ, କଟକ, ଖୋର୍ଦ୍ଦା, ପୁରୀ,ନୟାଗଡ, ବୌଦ୍ଧ, ସୋନପୁର,ବଲାଙ୍ଗୀର ।
ଏହି ସବୁ ଜିଲ୍ଲାରେ ଶୀତ ଲହରି ପ୍ରବାହିତ ହେବ । ସେହିପରି ଉତରଓଡିଶାର ଆଭ୍ୟନ୍ତରୀଣ ଅଂଚଳ, ବାଲେଶ୍ୱର, କଟକ, ସୋନପୁର, ବୌଦ୍ଧ ଓ ବଲାଙ୍ଗୀରରେ ପ୍ରବ ଥଣ୍ଡା ଅନୁଭୂତ ହେବ । ଏହା ସହିତ କନ୍ଧମାଳ, କଳାହାଣ୍ଡି, କୋରାପୁଟ ଓ ବଲାଙ୍ଗୀର ଜିଲ୍ଳାର କେତେକ ସ୍ଥାନରେ ଘନ କୁହୁଡି ପଡିବାର ଆଶଙ୍କା ରହିଛି । ସେଥିପାଇଁ ଏହିସବୁ ଜିଲ୍ଲାକୁ ମଧ୍ୟ ୟେଲୋ ୱାର୍ଣ୍ଣିଂ ଜାରି କରାଯାଇଛି । ସେପଟେ ଅସହ୍ୟ ଥଣ୍ଡା ଯୋଗୁଁ ଦିଲ୍ଲୀ, ଉତରପ୍ରଦେଶ ସମେତ ୬ ରାଜ୍ୟରେ ରେଡ୍ ଆଲର୍ଟ ଜାରି କରିଛି ପାଣିପାଗ ବିଭାଗ ।