ଟଏଲେଟ୍ ସିଟରୁ ୧୦ ଗୁଣ ଅଧିକ ଅପରିଷ୍କାର ଆପଣଙ୍କ ସ୍ମାର୍ଟଫୋନ୍ ! ୧୭ ହଜାର ବ୍ୟାକ୍ଟେରିଆଙ୍କୁ ଜାବୁଡ଼ି ଧରିଥାଏ ମୋବାଇଲ୍ .. 

ସ୍ମାର୍ଟଫୋନ୍ ବ୍ୟବହାର କଲା ବେଳେ କେବେ ଚିନ୍ତା କରିଛନ୍ତି କି ଆପଣଙ୍କ ଫୋନରେ କେତେ ବ୍ୟାକ୍ଟେରିଆ ଆଡ୍ଡା ଜମାଇ ବସିଛନ୍ତି? ରିପୋର୍ଟ ମୁତାବକ , ବ୍ୟବହୃତ ଟଏଲେଟ୍ ସିଟରୁ ଅଧିକ ଅପରିଷ୍କାର ଆପଣଙ୍କ ସ୍ମାର୍ଟଫୋନର ସ୍କ୍ରିନ୍ । ଲେଖଟି ପଢି ଅଜବ ଲାଗୁଥିବ ନିଶ୍ଚୟ କିନ୍ତୁ ଏହା ଶତପ୍ରତିଶତ ସତ ଆଜ୍ଞା । ବୈଜ୍ଞାନିକ ଗବେଷଣା କରି ଏହାକୁ ପ୍ରମାଣ ମଧ୍ୟ କରିଛନ୍ତି ।

ସ୍ମାର୍ଟଫୋନକୁ ଆପଣ କେଉଁଠି କେଉଁଠି ବ୍ୟବହାର କରନ୍ତି? ଖାଇବା ସମୟରେ ବେଳେବେଳେ ଷ୍ଟ୍ରଲ୍ କରୁ କିମ୍ବା ଟଏଲେଟ୍ ସିଟରେ ବସି ମଧ୍ୟ କିଛି ଲୋକ ମୋବାଇଲ୍ ବ୍ୟବହାର କରନ୍ତି । କିଛି କାମକୁ ବାଦ୍ ଦେଲେ ଅନ୍ୟ ସବୁକ୍ଷେତ୍ରରେ ସ୍ମାର୍ଟଫୋନ୍ ଆମ ସାଙ୍ଗରେ ଥାଏ । ଆମ ନିତିଦିନିଆ ଜୀବନରେ ଏକ ଗୁରୁତ୍ୱପୂର୍ଣ୍ଣ ଭୂମିକା ନିଭାଇଲାଣି ଏହି ସ୍ମାର୍ଟଫୋନ୍ । କହିବାକୁ ଗଲେ, ଶରୀରର ଏକ ଅଙ୍ଗ ହୋଇଗଲାଣି ମୋବାଇଲ୍ । କିନ୍ତୁ କେବେ ଭାବିଛନ୍ତି ଏହି ସ୍ମାର୍ଟଫୋନକୁ ସାଙ୍ଗ କରୁକରୁ ଆମେ ଶରୀରକୁ ଅବହେଳା କରୁନାହୁଁ ତ? ମୋବାଇଲ୍ ଡିଭାଇସରେ କେତେ ବ୍ୟାକ୍ଟେରିଆ ଘର କରି ରହିଛନ୍ତି ଏହାର ଅନୁମାନ ଆପଣଙ୍କ ଭାବନାଶକ୍ତିରୁ ମଧ୍ୟ ଅଧିକ । ଶୁଣିବେ ଯଦି ଆଉ ସ୍ମାର୍ଟଫୋନକୁ ମୁହଁ ପାଖକୁ ନେବାକୁ କିମ୍ବା ହାତରେ ଧରିବାକୁ ଡ଼ରିବେ ।

ଆପଣଙ୍କ ହ୍ୟାଣ୍ଡସେଟ୍ ବ୍ୟାକ୍ଟେରିଆଙ୍କ ବ୍ରିଡିଙ୍ଗ୍ ଗ୍ରାଉଣ୍ଡ କହିଲେ କିଛି ଅତ୍ୟୁକ୍ତି ହେବ ନାହିଁ । ଏରିଜୋନା ବିଶ୍ୱବିଦ୍ୟାଳୟର ବୈଜ୍ଞାନିକଙ୍କ ଗବେଷଣା ଅନୁସାରେ , ଟଏଲେଟ୍ ସିଟ୍ ଠାରୁ ୧୦ ଗୁଣା ଅଧିକ ଅପରିଷ୍କାର ହେଉଛି ସ୍ମାର୍ଟଫୋନ୍ । ୧୭ ହଜାର ବ୍ୟାକ୍ଟେରିଆଙ୍କୁ ନିଜ ସ୍କ୍ରିନରେ ଜାବୁଡ଼ି ଧରିଥାଏ ହ୍ୟାଣ୍ଡସେଟ୍ । ତେଣୁ ଏଥିରୁ ବଂଚିବା ପାଇଁ ପ୍ରତିଦିନ ନିଜ ମୋବାଇଲକୁ ସଫା କରନ୍ତୁ । ବଜାରରେ ମୋବାଇଲ୍ ସଫା କରିବା ୟୁଭି ଲାଇଟ୍ ଯୁକ୍ତ ବିଭିନ୍ନ ପ୍ରକାର ପ୍ରଡକ୍ଟ ଉପଲବ୍ଧ ରହିଛି , ଯାହା ବ୍ୟାକ୍ଟେରିଆଙ୍କୁ ମାରିଥାଏ । ଭୁଲରେ ବି ପାଣିରେ ମୋବାଇଲ୍ ସଫା କରନ୍ତୁ ନାହିଁ । ସ୍ମାର୍ଟଫୋନ୍ ସାନିଟାଇଜେସନ୍ ପାଇଁ ଫୋନ୍ କ୍ଲିନିଙ୍ଗ୍ କିଟ୍ ମାଧ୍ୟମରେ ସଫା କରନ୍ତୁ ।