ଭୂତାଣୁ ମାଡୁଛି, ଭୋକ ବି ବଢୁଛି… ଦୋକାନ ଅଛି ହେଲେ ନାହାନ୍ତି ଗ୍ରାହକ । କରୋନା ପାଇଁ ରୋଜଗାର କମୁଥିବାରୁ ବଢୁଛି ଛୋଟ ବେପାରୀଙ୍କ ଚିନ୍ତା । କେମିତି ପୂରିବ ପେଟ, ଜୀବୀକା ନଥିଲେ କଣ ବଞ୍ଚିବ ଜୀବନ ? ମହାମାରୀ ମାଡରେ ଘାଇଲା ମଣିଷ…
କନକ ବ୍ୟୁରୋ: ମହାମାରୀ ମାଡରେ ମଣିଷ ଘାଇଲା । କରୋନା ପାଟିରେ ରୋଜଗାର ପଶିଲା । ରୋଜଗାର କମୁଛି, ଚିନ୍ତା ବଢୁଛି । ଗୋଟିଏ ପଟେ କରୋନା ବଢିଚାଲିଥିବା ବେଳେ ବଞ୍ଚିବାର ରାହା ମଧ୍ୟ ମଉଳି ଯାଉଛି । କେମିତି ପେଟ ପୂରିବ ? କେମିତି ପରିବାର ଚଳିବ? ଆଉ ଜଳିଟ ପରିସ୍ଥିତିରେ କେମିତି ଜୀବନ ବଞ୍ଚିଯିବ? ଏସବୁ ଚିନ୍ତାରେ ଘାରି ହେଉଛି ମଣିଷ । କିଏ ରୋଜଗାର ହରାଉଛି ତ କିଏ କାମଧନ୍ଦା ପାଉନି । କରୋନା ମାଡରେ ଦୋହଲିଯାଇଛି ମଣିଷର ଆର୍ଥିକ ଅଣ୍ଟା…
Kanak News is now on WhatsApp
Join and get latest news updates delivered to you via WhatsApp
ପୂର୍ଣ୍ଣ ଦାସ ଦୁର୍ଗା, ନବରଙ୍ଗପୁର ଉମରକୋଟର ଜଣେ ଫୁଟ୍ ପାଥ୍ ବ୍ୟବସାୟୀ । ରାସ୍ତା କଡରେ ଏକ ଗଛ ମୂଳରେ ବଞ୍ଚିବାର ବାଟ ଖୋଜୁଛନ୍ତି । ରଙ୍ଗବେରଙ୍ଗର ଭଳିକି ଭଳି ପୋଷାକର ପସରା ମେଲାଇ ଗ୍ରାହକଙ୍କ ବାଟ ଚାହିଁ ରହିଥାନ୍ତି । ଅଳ୍ପ ଦାମରେ ଆକର୍ଷଣୀୟ ପୋଷାକ ନେବାକୁ ମଧ୍ୟ ବାଟରେ ଯାଉଥିବା ଲୋକ ଅଟକି ଯାଆନ୍ତି । ଆଉ ବାଛି ବାଛି ଦୁର୍ଗାଙ୍କ ପାଖରୁ ମନ ପସନ୍ଦର ପୋଷାକ ନିଅନ୍ତି । ହେଲେ ଏବେ କରୋନା ପାଇଁ କମିଛି ବେପାର । ଭୂତାଣୁ ଭୟ ପାଇଁ ଆଉ ଆଗଭଳି ଭିଡ ହେଉନି କି ବିକ୍ରି ହେଉନି । ଯେଉଁଥିପାଇଁ ଭାଙ୍ଗି ପଡିଛନ୍ତି ଦୁର୍ଗା…
ନିଜ ଦୁଃଖ କଥା କହୁକହୁ କାନ୍ଦି ପକାଉଛନ୍ତି ଦୁର୍ଗା । ପୂର୍ବରୁ ଯେଉଁ ବ୍ୟବସାୟ ହୁଏ ସେଥିରେ କଷ୍ଟେମଷ୍ଟେ ଚଳିଯାଆନ୍ତି ମାଆପୁଅ । ହେଲେ ଏବେ ମାଆ ଆରପାରିରେ । ବିବାହ କରିନଥିବାରୁ ଏକା ଏକା ସଙ୍ଘର୍ଷ କରି ବଞ୍ଚୁଛନ୍ତି । ଆଉ ଯାହା ବେପାର ହେଉଛି ସେଥିରୁ ସାହୁକାରକୁ ଦେଲାପରେ ବଞ୍ଚିବା ପାଇଁ ବି ପାଖରେ ପଇସା ରହୁନି । ତେଣୁ ବାଧ୍ୟ ହୋଇ କେବେ କେବେ ସେ ବିସ୍କୁଟ୍ କି ପାଣି ପିଇ ରହିଯାଆନ୍ତି ତ କେବେ ଉପାସ ଶୋଇପଡନ୍ତି ।
ସେପଟେ ଲକଡାଉନ ସମୟରେ ସିନା ବଡବଡ ବ୍ୟବସାୟୀମାନେ ବର୍ତ୍ତିଗଲେ ହେଲେ ହଇରାଣ ହୋଇଗଲେ ଛୋଟଛୋଟ ବେପାରୀ । ଖାଲି ଦୁର୍ଗା ନୁହଁନ୍ତି, ଅନେକ ଲୋକଙ୍କ ଅବସ୍ଥା ଏବେ ଏମିତି । କାହା ପାଖରେ ପଇସା ନାହିଁ ତ କାହା ଘରେ ଚାଉଳ ନାହିଁ । କରୋନା କଟକଣା ପାଇଁ ୪/୫ ମାସ ହେବ ଲୋକେ ଘରେ ଥିବାରୁ ରୋଜଗାର ହରାଇଛନ୍ତି । ପରିବାର ପୋଷିବାକୁ କିଛି ପନ୍ଥା ନଥିବାରୁ ବଢୁଛି ମାନସିକ ଚିନ୍ତା । ବେରୋଜଗାର ବଢୁଥିବାରୁ ବିଷାଦଗ୍ରସ୍ତ ହେଉଛନ୍ତି ଯୁବପିଢି । ତେବେ ସ୍ଥିତି ସୁଧୁରିଲା ବେଳକୁ ସୁସ୍ଥ ଥିବ ତ ମଣିଷର ମାନସିକ ସ୍ଥିତି ? କରୋନ ପାଇଁ ହୋଇଥିବା କ୍ଷତି ଭରିପାରିବ ତ ମଣିଷ ?