୪ ମାସ ପରେ ବି କୁନି ଝିଅ ପିହୁର ମିଳୁନି ପତା । ଯାଜପୁର ବିଞ୍ଝାରପୁର ଅଞ୍ଚଳରୁ ନିଖୋଜ ହୋଇ ଯାଇଥିବା ନେଇ ଅଭିଯୋଗ କରିଛନ୍ତି ପରିବାର ଲୋକ 

472

କନକ ବ୍ୟୁରୋ : ନୟାଗଡ ଜିଲ୍ଲାର ପରୀ ହତ୍ୟାକାଣ୍ଡ ଘଟଣାକୁ ନେଇ ରାଜ୍ୟ ରାଜନୀତିର ସୃଷ୍ଟି ହୋଇଥିବା ଝଡ ଥମିବାର ନାଁ ନେଉନଥିବା ବେଳେ ଯାଜପୁର ଜିଲା ବିଂଝାରପୁର ମଧୁସୁଦନପୁର ଗାଁରୁ ଗୋଟେ ୨ ବର୍ଷର ଶିଶୁ କନ୍ୟା ୪ ମାସ ହେଲା ନିଖୋଜ ହୋଇଯାଇଛି । ନିଜ ମାମୁଁ ଘରକୁ ଆସିଥିବା ଏହି ଶିଶୁ ଗାଁ ଦାଣ୍ଡରେ ଖେଳୁଥିବା ସମୟରେ କେହି ଉଠାଇନେଇଥିବା ଅଭିଯୋଗ କରିଛନ୍ତି ପରିବାର ଲୋକେ ।

ଏପରିକି ଜଣେ ଅଜଣା ବ୍ୟକ୍ତି ଶିଶୁଟିକୁ ବାଇକ ଯୋଗେ ନେଇଥିବା ପରିବାର ଲୋକେ ବିଂଝାରପୁର ଥାନାରେ ଲିଖିତ ଅଭିଯୋଗ କରିବା ପରେ ମଧ୍ୟ ପୋଲିସ ଅପରାଧୀଙ୍କୁ ଧରିବାରେ ବିପଂଳ ହୋଇଛି । ସେପଟେ ଶିଶୁ ନିଖୋଜ ଘଟଣାରେ ହସ୍ତକ୍ଷେପ  କରିଛି ଜିଲା ଶିଶୁ ସୁରକ୍ଷା ୟୁନିଟ୍ । ଘଟଣାକୁ ଗୁରୁତର ସହିତ ନେଇ ଶିଶୁକୁ ଖୋଜିବା ପାଇଁ ଯାଜପୁର ଏସପିଙ୍କୁ ଚିଠିଲେଖିଛନ୍ତି ଜିଲା ଶିଶୁ ସୁରକ୍ଷା ଅଧିକାରୀ ।

ନୟାଗଡର ପରୀ ପରେ ଯାଜପୁରର ପିହୁ । ପରୀ ହତ୍ୟାକାଣ୍ଡକୁ ନେଇ ରାଜ୍ୟ ରାଜନୀତି ହୁଲୁସ୍ତୁଲ ହେଉଥିବା ବେଳେ ଯାଜପୁର ବିଂଝାରପୁର ଥାନା ଅନ୍ତର୍ଗତ ମଧୁସୁଦନପୁର ଗାଁରେ ୨ ବର୍ଷର ଶିଶୁ କନ୍ୟା ପିହୁ ୪ ମାସ ହେଲେ ନିଖୋଜ ରହିଛି । ପିହୁ ମାମୁଁ ଘରେ ରହୁଥିବା ବେଳେ ଅଗଷ୍ଟ ୯ ତାରିଖ ଅପରାହ୍ଣରେ ଗାଁ ଦାଣ୍ଡରେ ଖେଳୁଥିଲା । ସେହି ସମୟରେ କେହି ଅପହରଣ କରି ନେଇଥିବା  ଅଭିଯୋଗ କରିଛନ୍ତି ପରିବାର ଲୋକେ । ଘଟଣା ସଂପର୍କରେ ଥାନାରେ ଲିଖିତ ଅଭିଯୋଗ କରାଯାଇଥିଲେ ମଧ୍ୟ ଏଯାଏଁ ପିହୁର ପତା ପାଉନି ପୁଲିସ ।

ଅଭିଯୋଗ ଅନୁସାରେ, ପିହୁକୁ କେହି ଜଣେ ବାଇକରେ ନେଇ ଯାଉଥିବା କିଛି ବ୍ୟକ୍ତି ଦେଖିଛନ୍ତି । ଏ କଥା ପୋଲିସକୁ ମଧ୍ୟ କୁହାଯାଇଛି । ତଥାପି ପିହୁ ନିଖୋଜ ଘଟଣାରେ ପୁଲିସ କୌଣସି ଠୋସ ପଦକ୍ଷେପ ନେଇନାହିଁ । ସେପଟେ କୁନି ଝିଅ ନିଖୋଜ ଘଟଣାରେ ହସ୍ତକ୍ଷେପ କରିଛି ଜିଲ୍ଲା ଶିଶୁ ସୁରକ୍ଷା ୟୁନିଟ୍ । ଜିଲା ଶିଶୁ ସୁରକ୍ଷା ଅଧିକାରୀ ପିହୁଙ୍କ ପରିବାରକୁ ଭେଟିବା ସହ ତୁରନ୍ତ କୁନି ଝିଅକୁ ଉଦ୍ଧାର କରିବା ପାଇଁ ଯାଜପୁର ଏସପିଙ୍କୁ ଲିଖିତ ଭାବେ ଜଣାଇଛନ୍ତି । ଯାଜପୁର ଏସ୍ପି ବିଂଝାରପୁର ଥାନାରେ ପହଂଚି ଘଟଣାର ତଦନ୍ତ ସ୍ଥିତି ସଂପର୍କରେ ଅନୁଧ୍ୟାନ କରିଛନ୍ତି ।

ପିହୁ ନିଜ ମାମୁଁ ଘରେ ରହୁଥିବା ବେଳେ ଏପରି ଅପହରଣର ଶିକାର ହୋଇଛି । ତୁରନ୍ତ ଅଭିଯୁକ୍ତଙ୍କୁ ଗିରଫ କରି ପିହୁକୁ ଉଦ୍ଧାର କରାନଗଲେ ପରିବାର ଲୋକେ ଆତ୍ମହତ୍ୟା କରିବେ ବୋଲି ଚେତାବନୀ ଦେଇଛନ୍ତି ।

Comments are closed.