ବସ୍ତିରୁ ଭୁବନେଶ୍ୱର ଟପ୍ପର । ଶ୍ରମିକ କାମ କରି ବଡ ସଫଳତା । ଧନ ନୁହେଁ, ପାଠ ପାଇଁ ଦରକାର ପଡେ ମନ । ସଂଘର୍ଷ ଭିତରେ ସଫଳତା ପାଇଲେ ବର୍ଷା, ରାଣୀ ଆଉ ଶୁଭ୍ରଜିତ୍ ।
କନକ ବ୍ୟୁରୋ: ପରୀକ୍ଷା ତ ଅନେକ ଦିଅନ୍ତି । ସଫଳତା ତ ଅନେକ ପାଆନ୍ତି । ହେଲେ କାଗଜ, କଲମର ଏ ଜୀବନ ଭିତରେ ସଂଘର୍ଷର ଉତ୍ତର ଦେଇ ସଫଳତା ପାଇବାର ସ୍ୱପ୍ନ ବୋଧହୁଏ ଖୁବ୍ କ୍ୱଚିତ୍ ଲୋକ ଦେଖିଥାନ୍ତି । ଏ ହେଉଛି ସେମିତି କିଛି ଖବର…
Kanak News is now on WhatsApp
Join and get latest news updates delivered to you via WhatsApp
କହନ୍ତି ଜୀବନର ପାଦେ ପାଦେ ପ୍ରତି କ୍ଷଣରେ ପରୀକ୍ଷା ଦେଇ ପାସ୍ କରିବାକୁ ପଡେ । ପରୀକ୍ଷା ହିଁ ଆମର ପରୀକ୍ଷା ନିଏ । ହେଲେ ସେ ସବୁ ପରୀକ୍ଷାରେ ଆଜି ଏମାନେ ପାସ୍ କରିଛନ୍ତି । ସଂଘର୍ଷକୁ ମାତ୍ ଦେଇ ଏମାନେ ପାଇଛନ୍ତି ସଫଳତା ।
ବର୍ଷାରାଣୀ ସ୍ୱାଇଁ । ଘର ଭୁବନେଶ୍ୱର ବେହେରା ସାହି ବସ୍ତିରେ । ଚଳିତ ଯୁକ୍ତ ଦୁଇ ବିଜ୍ଞାନ ପରୀକ୍ଷାରେ ବର୍ଷା ୬୦୦ ମାର୍କରୁ ୫୬୪ ମାର୍କ ରଖି ହେଇଛନ୍ତି ଭୁବନେଶ୍ୱର ଟପ୍ପର । ତେବେ ଗରିବ ପରିବାରରେ ଜନ୍ମ ହେଇଥିଲେ ବି ପିଲାଟି ବେଳରୁ ପାଠପଢା ପ୍ରତି ଆଗ୍ରହ ଦେଖାଇଥିଲେ ବର୍ଷା । ବାପା ମାର୍କେଟରେ ପଙ୍ଖା କାମ କରି ଯାହା ଯେତିକି ରୋଜଗାର କରୁଥିଲେ । ସେଇଥିରେ ତାଙ୍କ ପଢା ଖର୍ଚ୍ଚ ଉଠୁଥିଲା । ଆଉ ଏବେ ସେହି ସଂଘର୍ଷ ଭିତରୁ ଏତେ ବଡ ସଫଳତା ପାଇବା ପରେ ଆଗକୁ ସେ ଡାକ୍ତର ହେବାକୁ ଇଚ୍ଛା ରଖିଛନ୍ତି ।
ଜଣେ ବସ୍ତି ଝିଅର ସଫଳତାର ଜାଣିବା ପରେ ଏବେ ନଜର ପକାନ୍ତୁ, ଜଣେ ଦିନ ମଜୁରିଆ ଛାତ୍ରୀର ସଫଳତାର କାହାଣୀ ଉପରେ । କେନ୍ଦୁଝର ଜିଲ୍ଲା ହାଟଡିହି ବ୍ଲକ ସଙ୍ଗମ ଗାଁର ଝିଅ ରାଣୀ ହେମ୍ବ୍ରମ । ପରିବାରର ରୋଜଗାର କହିଲେ, ଶୂନ ଆଉ ତା ଭିତରେ ପରୀକ୍ଷା କଥା ପଚାରୁଛି କିଏ? ଅନ୍ୟ କିଏ ହେଇଥିଲେ ବୋଧହୁଏ ପଢାରେ ଡୋରି ବାନ୍ଧି ପରୀକ୍ଷାକୁ ଭୁଲିଯାଇଥାନ୍ତେ । ହେଲେ ରାଣୀ କିନ୍ତୁ ଭିନ୍ନ ଥିଲେ । ପାଠପଢା ପାଇଁ ସେ ସାଜିଥିଲେ ଦିନ ମଜୁରିଆ । ପର ଘରେ ଶ୍ରମିକ ହେଇ କାମ କରି ସେ ପାଠ ପଢିଥିଲେ ଆଉ ପରୀକ୍ଷା ବି ଦେଇଥିଲେ । ଏଥର ବାହାରିଥିବା ରେଜଲ୍ଟରେ ସେ ଏବେ ରଖିଛନ୍ତି ୮୧ ପ୍ରତିଶତ ମାର୍କ । ଆଉ ଆଗକୁ ସେ ବି ଡାକ୍ତର ହେବାକୁ ଇଚ୍ଛା ରଖିଛି ।
ବର୍ଷା ଆଉ ରାଣୀ ଭଳି ଶୁଭ୍ରଜିତ ବି କିଛି କମ୍ ସଂଘର୍ଷ ଦେଖିନାହାଁନ୍ତି । ଝାଟି ମାଟିର ଘର ଆଉ ଦିନରେ ସୂର୍ଯ୍ୟ ଦିଶୁଥିବା ଏହି ଘରୁ ସେ ହେଇଛନ୍ତି ବିଜ୍ଞାନ ପରୀକ୍ଷାରେ ବ୍ଲକ୍ ଟପ୍ପର । ବାଲେଶ୍ୱର ଭୋଗରାଇ ବ୍ଲକ ଦୁବସାହିରେ ରହୁଥିବା ଶୁଭ୍ରଜିତଙ୍କ ପରିଚୟ ସେ ହେଉଛନ୍ତି ଜଣେ ଚଷା ବାପାର ଟପ୍ପର ପୁଅ । ଏଥର ପରୀକ୍ଷାରେ ସେ ମୋଟ ୬ ଶହରୁ ୫୬୫ ନମ୍ବର ରଖି ହେଇଛନ୍ତି ବ୍ଲକ୍ ଟପ୍ପର । ଯାହା ଆଜି ଏ ବାପା ମାଆଙ୍କ ଦୁଇ ଜଣଙ୍କ ମୁଣ୍ଡକୁ ଗର୍ବରେ ଉଚ୍ଚା କରିଦେଇଛି ।
ଦର୍ଶକ ବନ୍ଧୁ ସଫଳତା ତ ଅନେକ ପାଇଥାନ୍ତି । ହେଲେ ଏମିତି କିଛି ଲୋକଙ୍କ ସଫଳତା ସବୁଦିନ ପାଇଁ ମନେ ରହିଯାଏ । ବର୍ଷା ରାଣୀ ଆଉ ଶୁଭ୍ରଜିତଙ୍କ ଏ ସଫଳତାର କାହାଣୀ ନିଶ୍ଚୟ ଅନ୍ୟମାନଙ୍କୁ ସଂଘର୍ଷ ଭିତରେ ବି ସ୍ୱପ୍ନ ଦେଖିବାକୁ ବାଧ୍ୟ କରିବ ।