ୟେସ ବ୍ୟାଙ୍କରେ ମହପ୍ରଭୁଙ୍କ ଟଙ୍କା ଜମା ପ୍ରସଙ୍ଗ: ଅର୍ଥସଚିବ କହିଲେ, ରିଜର୍ଭ ବ୍ୟାଙ୍କ ସହ ହୋଇଛି ଆଲୋଚନା, ସୁରକ୍ଷିତ ଥିବା ଆଶ୍ୱସନା ଦେଇଛି ଆରବିଆଇ
କନକ ବ୍ୟୁରୋ: ୟେସ୍ ବ୍ୟାଙ୍କରେ ଜମା ହୋଇଥିବା ମହାପ୍ରଭୁଙ୍କ କୋଟି କୋଟି ଟଙ୍କା ସୁରକ୍ଷିତ ତ? ଏହାକୁ ନେଇ ସାରା ରାଜ୍ୟରେ କମ୍ପନ ସୃଷ୍ଟି ହେବା ପରେ ରାଜ୍ୟ ସରକାର ଏହି ଘଟଣାକୁ ନେଇ ତନାଘନା ଆରମ୍ଭ କରିଛନ୍ତି । ଅର୍ଥ ସଚିବ କହିଛନ୍ତି, ଜଗନ୍ନାଥଙ୍କ ଟଙ୍କା ନେଇ ଶ୍ରୀମନ୍ଦିର ପ୍ରଶାସନ ଆରବିଆଇ ସହିତ କଥା ହୋଇଛି । ସେ ନିଜେ ମଧ୍ୟ ଆରବିଆଇ ସହିତ କଥା ହୋଇଛନ୍ତି ଓ ଚିଠି ଲେଖିଛନ୍ତି । ସବୁ ଜମାକାରୀଙ୍କ ଟଙ୍କା ସୁରକ୍ଷିତ ଥିବା ରିଜର୍ଭ ବ୍ୟାଙ୍କ ଆଶ୍ୱସନା ଦେଇଛନ୍ତି । ସରକରୀ ବିଭାଗ ଘରୋଇ ବ୍ୟାଙ୍କରେ ଟଙ୍କା ରଖିବାକୁ ମନା କରାଯାଇଥିଲା । ଯେଉଁ ବିଭାଗ ରଖିଛନ୍ତି ତାଙ୍କ ରିସ୍କରେ ରଖିଥିବେ । ସବୁଠାରୁ ବଡ କଥା ହେଉଛି , ରାଜ୍ୟ ସରକାରଙ୍କ ନିର୍ଦ୍ଦେଶକୁ ଅମାନ୍ୟ କରି ବିଭିନ୍ନ ସଂସ୍ଥା ଓ ଅଫିସର ସରକାରୀ ଅର୍ଥ ଜମା କରୁଥିବା ଘଟଣାକୁ ଗମ୍ଭୀରତାର ସହିତ ନେଇଛନ୍ତି ଅର୍ଥ ବିଭାଗ । କେଉଁ ବିଭାଗ କେଉଁ କେଉଁ ବ୍ୟାଙ୍କରେ କେତେ ଟଙ୍କା ଜମା କରିଛନ୍ତି ତାର ତଥ୍ୟ ଦେବାକୁ ନିର୍ଦ୍ଦେଶ ଦିଆଯାଇଛି ।
Kanak News is now on WhatsApp
Join and get latest news updates delivered to you via WhatsApp
ୟେସ୍ ବ୍ୟାଙ୍କରେ ଜମା ହୋଇଥିବା ମହାପ୍ରଭୁଙ୍କ କୋଟି କୋଟି ଟଙ୍କା ସୁରକ୍ଷିତ ନଥିବା ଖବର ସାମନାକୁ ଆସିବା ପରେ ସରକାରଙ୍କୁ ଘେରିଛି ବିଜେପି । ବିଜେପି ନେତା ପୃଥ୍ୱୀରାଜ ହରିଚନ୍ଦନ ସାମ୍ବାଦିକ ସମ୍ମିଳନୀ କରି ସରକାରଙ୍କୁ ପ୍ରଶ୍ନ କରିଛନ୍ତି । ପଚାରିଛନ୍ତି ବ୍ୟାଙ୍କ ବୁଡିବାକୁ ବସିଥିବା ଜାଣିବା ସତ୍ୱେ କାହିଁକି ୟେସ୍ ବ୍ୟାଙ୍କରେ ଜଗନ୍ନାଥଙ୍କ ଟଙ୍କା ରଖିଲେ ସରକାର । ସରକାର ମହାଭୁଲ କରିଛନ୍ତି । ପ୍ରଭୁ ଜଗନ୍ନାଥଙ୍କ ଟଙ୍କାକୁ ହଡପ କରିଛନ୍ତି । ଏବେ ଏହାର ଉତର ଦାୟିତ୍ୱ କିଏ ନେବ । ଦେବୋତ୍ତର ବିଭାଗ ନା ମନ୍ତ୍ରୀ । ଡିପୋଜିଟ୍ ସ୍ୱାପିଙ୍ଗରେ ଅନିୟମିତତା ହୋଇଛି । ତେଣୁ ଏହାର ନିରପେକ୍ଷ ସଂସ୍ଥା ଦ୍ୱାରା ତଦନ୍ତ କରିବା ସହ ଶ୍ୱେତପତ୍ର ପ୍ରକାଶ କରିବାକୁ ସେ ଦାବି କରିଛନ୍ତି ।
ସେପଟେ ଏ ନେଇ ପିସିସି ସଭାପତି ନିରଞ୍ଜନ ପଟ୍ଟନାୟକ ବି ପ୍ରତିକ୍ରିୟା ରଖିଛନ୍ତି । ସେ କହିଛନ୍ତି, ବେସରକାରୀ ବ୍ୟାଙ୍କରେ ଟଙ୍କା ରଖିବାର ଆଇନ ନାହିଁ । କେଉଁ ପରିସ୍ଥିତିରେ ଟଙ୍କା ରଖାଗଲା ତାର ତଦନ୍ତ ହୋଇ କାର୍ଯ୍ୟାନୁଷ୍ଠାନ ନିଆଯିବା ଦରକାର । ୩ ମାସ ହେଲା ୟେସ ବ୍ୟାଙ୍କର ଅବସ୍ଥା ଜଣାପଡିଲାଣି ତିରୁପତି ମନ୍ଦିର ଟଙ୍କା ନେଇ ଆସିଲାଣି ଏମାନେ ଭୃକ୍ଷେପ କରିନାହାନ୍ତି । ଏହା ଭିତରେ ଗୁଢ ରହସ୍ୟ ଅଛି । ମୁଖ୍ୟମନ୍ତ୍ରୀଙ୍କ ସମ୍ପତି ସୁରକ୍ଷିତ କି ନାହିଁ ତାହା ସରକାର ଜଣାନ୍ତୁ ବୋଲି ଦାବି କରିଛନ୍ତି ପିସିସି ସଭାପତି ।