କନକ ବ୍ୟୁରୋ: ମୁଣ୍ଡ ଉପରେ ବନ୍ଧୁକ, ସୁଦାନରେ ଦିନକୁ ଦିନ ଭୟଙ୍କର ହେଉଥିବା ଗୃହଯୁଦ୍ଧ ଭିତରେ ପ୍ରତିମୁହୂର୍ତରେ ରହିଥିଲା ମୃତ୍ୟୁର ଭୟ । କେବେ କଣ ଘଟିବ, ତାକୁ ଆକଳନ କରିବା ଥିଲା ମୁସ୍କିଲ୍ । ୮ଘଂଟା ଧରି ଗନ୍ ପଏଣ୍ଟରେ ରହିଥିଲେ ବାଲେଶ୍ୱର ସୋର ଅଞ୍ଚଳର ଶିବପ୍ରସାଦ ଜେନା । ଭୁବନେଶ୍ୱର ବିମାନ ବନ୍ଦରରେ ପହଞ୍ଚିା ପରେ ବଖାଣିଛନ୍ତି ଅଙ୍ଗେଲିଭା କାହାଣୀ । ଏକ ଷ୍ଟିଲ୍ କମ୍ପାନୀରେ କାମ କରୁଥିଲେ ଶିବପ୍ରସାଦ । ୮ଘଂଟାରୁ ଅଧିକ ସମୟ ଗନ୍ ପଏଣ୍ଟରେ ରଖିବା ସହ ତାଙ୍କ ଠାରୁ ଟଙ୍କା ଆଉ ମୋବାଇଲ୍ ଲୁଟି ନେଇଥିଲେ ବିଦ୍ରୋହୀ ।
Kanak News is now on WhatsApp
Join and get latest news updates delivered to you via WhatsApp
ସୁଦାନରେ ହିଂସା ଲାଗି ରହିଥିବା ବେଳେ ସେଠାରେ ରହୁଥିବା ଭାରତୀୟଙ୍କ ସମସ୍ୟା ମଧ୍ୟ ଦିନକୁ ଦିନ ବଢ଼ିବାରେ ଲାଗିଥିଲା । ଦିନକୁ ଗୋଟିଏ ଓଳି ଖାଇବା ବି ମୁସ୍କିଲ ହେଇ ପଡିଥିଲା । ଯାହା ଟଙ୍କା ଆଉ ଖାଇବା ସାମଗ୍ରୀ ଥିଲା, ତାହା ମଧ୍ୟ ଲୁଟି ନେଇଥିଲେ ଆକ୍ରମଣକାରୀ । କେନ୍ଦ୍ର ସରକାରଙ୍କ ଅପରେସନ କାବେରୀ ଜରିଆରେ ସେମାନଙ୍କୁ ଉଦ୍ଧାର କରାଯାଇଛି । ସ୍ୱତନ୍ତ୍ର ବିମାନ ଯୋଗେ ଦିଲ୍ଲୀ ଅଣାଯାଇଥିବା ବେଳେ ଆଜି ସକାଳେ ବିମାନ ଯୋଗେ ଦିଲ୍ଲୀରୁ ଭୁବନେଶ୍ୱରରେ ପହଞ୍ଚିିଛନ୍ତି ୬ ଜଣ ଓଡ଼ିଆ ।
ଗୁଳିଗୋଳା ବର୍ଷଣ, ଗ୍ରେନେଡ୍ ବିସ୍ଫୋରଣର ଛାତିଫଟା ଶବ୍ଦ ଯେତେବେଳେ କାନରେ ବାଜୁଥିଲା, ସେତେବେଳେ ଆହୁରି ବଢ଼ୁଥିଲା ଭୟ । ଏବେ ଭାରତ ଫେରି ଆସିବା ପରେ ସେମାନଙ୍କ ଦେହରେ ଜୀବନ ପସିଛି । ପାଖାପାଖି ଅଢ଼େଇ ହଜାର ଭାରତୀୟଙ୍କୁ ଫେରାଇ ଅଣାଯାଇଛି । ପ୍ରାୟ ୫ ହଜାର ଭାରତୀୟ ସୁଦାନରେ ଫସି ରହିଥିଲେ । ପର୍ଯ୍ୟାୟକ୍ରମେ ସମସ୍ତଙ୍କୁ ଫେରାଇ ଅଣାଯିବ ବୋଲି କହିଛି ବୈଦେଶିକ ମନ୍ତ୍ରାଳୟ ।