ଶୀତଳଷଷ୍ଠୀ ପାଇଁ ଉତ୍ସବମୁଖର ସମ୍ବଲପୁର । ମହାଦେବ ଓ ପାର୍ବତୀଙ୍କ ବିବାହ ପାଇଁ ଦେବ ନିମନ୍ତ୍ରଣ ଶେଷ । ଆଜି ପତରପେଣ୍ଡି ଉତ୍ସବ ।
କନକ ବ୍ୟୁରୋ: ସମ୍ବଲପୁରରେ ଶୀତଳ ଷଷ୍ଠୀର ଦ୍ୱିତୀୟ ଦିନରେ ଦେବ ନିମନ୍ତ୍ରଣ ସମ୍ପନ୍ନ ହୋଇଛି । ମହାଦେବ ଓ ଜଗତଜନନୀଙ୍କ ବିବାହରେ ସାମିଲ ହେବାପାଇଁ ନୃସିଂହ ଠାକୁର ନିମନ୍ତ୍ରଣ କରିଛନ୍ତି ୩୩ କୋଟି ଦେବା ଦେବୀଙ୍କୁ । ବାବା ବାଲୁଙ୍କେଶ୍ୱରଙ୍କ ତରଫରୁ ଭଗବାନ ନୃସିଂହ, ସହରରେ ଥିବା ସମସ୍ତ ଦେବାଦେବୀ ମନ୍ଦିର ବୁଲି ଗୁଆ, ମିଠେଇ, ହଳଦୀ ଓ ନିମନ୍ତ୍ରଣ ପତ୍ର ବା ନିଉତା ପ୍ରଦାନ କରିଥିଲେ । ବାଲୁଙ୍କେଶ୍ୱର ବାବାଙ୍କ ବରଯାତ୍ରୀରେ ସାମିଲ ହେବା ଠାରୁ ଆରମ୍ଭ କରି ନଗର ପରିକ୍ରମା ପର୍ଯ୍ୟନ୍ତ ସମସ୍ତ କାର୍ଯ୍ୟକ୍ରମରେ ଯୋଗ ଦେବା ସହ ନବବିବାହିତ ଦେବଦମ୍ପତ୍ତିଙ୍କୁ ଆଶୀର୍ବାଦ କରିବା ପାଇଁ ସବୁ ଦେବାଦେବୀଙ୍କୁ ସାଦର ନିମନ୍ତ୍ରଣ କରିଥିଲେ ଭଗବାନ ନୃସିଂହ ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
ରଙ୍ଗୀନ ଆଲୋକମାଳାରେ ସୁସଜ୍ଜିତ ରଥରେ ବସି ଭଗବାନ ନୃସିଂହ, ସହର ମଧ୍ୟରେ ଥିବା ସମସ୍ତ ମନ୍ଦିରର ପୂଜକଙ୍କୁ ଗୁଆ, ହଳଦୀ ମିଠେଇ ଦେଇ ବନ୍ଧୁ ନିମନ୍ତ୍ରଣ କରିଥିଲେ । ରାତି ୯ଟା ସମୟରେ ପ୍ରଭୁ ନୃସିଂହ ଠାକୁରଙ୍କୁ ବାଡ଼ଗ୍ରାହୀ ମାନେ ସୁସଜ୍ଜିତ କରି ରଥା ରୂଢ କରିଥିଲେ । ଏହାପରେ ନୃସିଂହ ଠାକୁରଙ୍କୁ ପୂଜାର୍ଚ୍ଚନା କରାଯାଇ ମହା ଆଳତୀ କରାଯାଇଥିଲା । ଆଜି ଝାଡୁଆପଡା, ମୋଡ଼ିପଡ଼ା, ବଡ଼ବଜ଼ାର ଏବଂ ଅନ୍ୟ ପୂଜା କମିଟି ମାନଙ୍କର ପତରପେଣ୍ଡି ଉତ୍ସବ ଅନୁଷ୍ଠିତ ହେବ ।