ଏଲଏସିରେ ଗଲୱାନ ଭଳି ସ୍ଥିତି ନ କରିବାକୁ ଭାରତ-ଚୀନ ମଧ୍ୟରେ ସହମତି ସୂଚନା : ସୁତ୍ର ଅନୁସାରେ, ଦୁଇ ପକ୍ଷ ପରଷ୍ପର ଉପରେ ରଖିବେ ନଜର, କୋରକମାଣ୍ଡର ସ୍ତରୀୟ ବୈଠକରେ ନିଷ୍ପତି
କନକ ବ୍ୟୁରୋ : ଲଦାଖରେ ଗଲୱାନ ଘାଟି ବିବାଦ ମାମଲା । ଭାରତ ଚୀନ୍ ଗଲୱାନ ଓ ହଟସ୍ପ୍ରିଙ୍ଗ ଅଂଚଳକୁ ଫେରିବାକୁ ସହମତ ହୋଇଥିବା ସୂଚନା ମିଳିଛି । ଏପରି ହେଲେ ଦୁଇ ଦେଶ ମଧ୍ୟରେ ଲାଗି ରହିଥିବା ସୀମା ବିବାଦ ଏବେ ଥଣ୍ଡା ପଡିବାର ବାଟ ଖୋଲିଯିବ । ଦୁଇ ଦେଶର ପ୍ରତିରକ୍ଷା ଅଧିକାରୀ ସ୍ତରୀୟ ଆଲୋଚନା ପରେ ଏଥିରେ ସମାଧାନର ବାଟ ବାହାର କରିଥିବା ଅନ୍ତର୍ଜାତୀୟ ଗଣମାଧ୍ୟମରେ ଖବର ଆସିଛି । ଏହି ଆଲୋଚନା ପରେ ପୂର୍ବ ଲଦାଖରେ ଥିବା ଗଲୱନ ଘାଟି ଏବଂ ଗୋଗ୍ରା ହଟସ୍ପ୍ରିଙ୍ଗ୍ ଅଂଚଳରୁ ଦୁଇ ଦେଶ ସେନା ପ୍ରତ୍ୟାହାର କରିନେବାକୁ ସହମତ ହୋଇଥିବା ଜଣାପଡିଛି ।
Kanak News is now on WhatsApp
Join and get latest news updates delivered to you via WhatsApp
ଚୁସୁଲ ଠାରେ ଦୁଇ ଦେଶର ପ୍ରତିରକ୍ଷାମଣ୍ଡଳି ଆଲୋଚନାରେ ଭାରତ ପକ୍ଷରୁ ୧୪ କର୍ପସ୍ କମାଣ୍ଡର ଲ୍ୟୁଟନାଂଟ ଜେନେରାଲ ହରିନ୍ଦର ସିଂ ଏବଂ ଦକ୍ଷିଣ ଝିଝାଙ୍ଗ ମିଲିଟାରୀ ମୁଖ୍ୟ ମେଜର ଜେନେରାଲ ଲିଉ ଲିନ୍ ଅଂଶଗ୍ରହଣ କରିଥିଲେ । ୧୨ ଘଂଟାରୁ ୧୪ ଘଂଟା ଧରି ଆଲୋଚନା ହୋଇଥିଲା । ଜୁନ୍ ୬ ତାରିଖ ପରେ ଏହା ଥିଲା ତୃତୀୟ ବୈଠକ । ତେବେ ବିବାଦୀୟ ଲଦାଖ ସୀମା ଅଂଚଳରୁ ଦୁଇ ଦେଶର ସେନା ପ୍ରତ୍ୟାହାର ଏକ ବଡ ଜଟିଳ ପ୍ରକ୍ରିୟା ରହିବ । କାରଣ ଫିଙ୍ଗର ୪ ରୁ ଫିଙ୍ଗର ୮ ମଧ୍ୟରେ ପ୍ରାୟ ୮ କିଲୋମିଟର ଅଂଚଳକୁ ନେଇ ଦୁଇ ଦେଶ ମଧ୍ୟରେ ବିବାଦ ରହିଛି । ଗତ ଜୁନ୍ ୧୫ ତାରିଖ ରାତିରେ ଚୀନ୍ ସେନାର ବର୍ବର ଆକ୍ରମଣରେ ୨୦ ଭାରତୀୟ ଯବାନ ସହିଦ ହୋଇଥିଲେ । ଏହି ଆଲୋଚନା ପରେ ଦୁଇ ଦେଶ ସେନା ପ୍ରତ୍ୟାହାର କରିବେ ।
କିନ୍ତୁ ଆଗାମୀ ୭୨ ଘଂଟା ପାଇଁ ଉଭୟ ସେନା ପରଷ୍ପର ଉପରେ ନଜର ରଖିବେ । ପୂର୍ବ ଲଦାଖର ଗଲୱାନ ଏବଂ ହଟ ସ୍ପ୍ରିଙ୍ଗ୍ ଅଂଚଳର ପାଟ୍ରୋଲିଂ ପଏଂଟ ୧୪, ୧୫ ଏବଂ ୧୭ ଏ ଅଂଚଳରୁ ହିଁ ଦୁଇ ଦେଶ ସେନା ପ୍ରତ୍ୟାହାର କରିବେ । ପର୍ଯ୍ୟାୟ କ୍ରମେ ଦୁଇ ଦେଶର ସୀମା ପ୍ରାୟ ଅଢେଇ କିମିରୁ ୩ କିମି ଯାଏଁ ପଛକୁ ଫେରିବେ ବୋଲି ସହମତ ହୋଇଥିବା ଜଣାପଡିଛି । ଏହି ସୈନ୍ୟ ପ୍ରତ୍ୟାହାର ପରେ ଲାଇନ୍ ଅଫ୍ ଆକଚୁଆଲ୍ କଂଟ୍ରୋଲରୁ ଚୀନ୍ ଏହାର ନିର୍ମାଣ ହଟାଇବା ନେଇ ରାଜି ହୋଇଥିବା ସୂଚନା ମିଳିଛି । ତେବେ ଏହା ଜଟିଳ ପ୍ରକ୍ରିୟା ହୋଇଥିବାରୁ ପ୍ରତିରକ୍ଷା ସହିତ କୁଟନୈତିକ ସ୍ତରୀୟ ଅଧିକ ଦ୍ୱିପାକ୍ଷିକ ଆଲୋଚନା ଆବଶ୍ୟକ ଥିବା ଜାତୀୟ ଗଣମାଧ୍ୟମରେ ରିପୋର୍ଟ ପ୍ରକାଶ ପାଇଛି ।