କନକ ବ୍ୟୁରୋ : ଆପଣ ସିମ୍ କାର୍ଡ କିଣିବାକୁ ଚାହୁଁଥିଲେ ଆପଣ ନିଶ୍ଚିତ ଏହି ଖବର ଉପରେ ନଜର ରଖନ୍ତୁ । ଭାରତୀୟ ଦୂର ସଂଚାର ବିଭାଗ ସିମ୍ କାର୍ଡ କିଣିବା ଉପରେ ଥିବା ପୁରୁଣା ନିୟମର ପରିବର୍ତ୍ତନ କରିଛନ୍ତି । ଦୂରସଂଚାର ବିଭାଗ (ଡିଓଟି) କହିଛନ୍ତି କି ଦେଶରେ କୌଣସି ନାବାଳକ କିମ୍ବା ନାବାଳିକାଙ୍କୁ ନେଟୱର୍କ କମ୍ପାନୀମାନେ ସିମ୍ କାର୍ଡ ବିକ୍ରି କରିପାରିବେ ନାହିଁ । ଅର୍ଥାତ ୧୮ ବର୍ଷରୁ କୌଣସି ବି ବ୍ୟକ୍ତି ଦେଶର କୌଣସି ଟେଲିକମ୍ ଅପରେଟରଙ୍କ ଠାରୁ ସିମ୍ କାର୍ଡ କିଣିପାରିବେ ନାହିଁ । ଦୂର ସଂଚାର ବିଭାଗ କହିଛି କୌଣସି ଟେଲିକମ ଅପରେଟର ନାବାଳକ/ନାବାଳିକାଙ୍କୁ ସିମ୍ କାର୍ଡ ବିକ୍ରି କରିବା ଅର୍ଥ ଦୂରସଂଚାର ଆଇନ ଉଲଙ୍ଘନ କରିବା ।
ନୂଆ ସିମ୍ କିଣିବା ବେଳେ ଗ୍ରାହକଙ୍କୁ ଏକ କଷ୍ଟମର ଅଧିଗ୍ରହଣ ଫର୍ମ (ସିଏଏଫ) ପୁରଣ କରିବାକୁ ପଡିବ । ଏହା ସାଧାରଣତ ଟେଲିକମ କମ୍ପାନୀ ଓ ଗ୍ରାହକଙ୍କ ମଧ୍ୟରେ ଏକ ବୁଝାମଣା । ଏବେ ଏହି ଫର୍ମରେ ସଂଶୋଧନ କରାଯାଇଛି । ଏବେ ସିମ୍ କାର୍ଡ କିଣିବାକୁ ହେଲେ ବ୍ୟକ୍ତିଙ୍କର ବୟସ ସର୍ବନିମ୍ନ ୧୮ ବର୍ଷରୁ ଅଧିକ ହୋଇଥିବା ଆବଶ୍ୟକ । ଏହାସହ ମାନସିକ ବିକାରଗସ୍ତ ଲୋକଙ୍କୁ ସିମ୍ କାର୍ଡ ବିକ୍ରି କରିପାରିବେ ନାହିଁ ଟେଲିକମ୍ କମ୍ପାନୀମାନେ ।
ଅନ୍ୟପଟେ ପୂର୍ବରୁ ଜଣେ ବ୍ୟକ୍ତି ନିଜ ନାମରେ ମନଇଚ୍ଛା ସିମ୍ କାର୍ଡ କିଣିପାରୁଥିବା ବେଳେ ଏବେ ନୂଆ ନିୟମ ମୁତାବକ ଜଣେ ବ୍ୟକ୍ତି ନିଜ ନାମରେ ସର୍ବାଧିକ ୯ ଟି ସିମ୍ କାର୍ଡ କିଣିପାରିବ । ହେଲେ ଜଣେ ବ୍ୟକ୍ତି ବି ନିଜ ନାମରେ ୧୮ ଟି ସିମ୍ କାର୍ଡ କିଣିପାରିବ ମାତ୍ର ସେଥିମଧ୍ୟରୁ ସେ ୯ ଟି ମୋବାଇଲରେ ଓ ଅନ୍ୟ ୯ ଟି ମେସିନ-ମେସିନରେ ବ୍ୟବହାର କରିପାରିବ ।
Kanak News is now on WhatsApp
Join and get latest news updates delivered to you via WhatsApp
ନୂଆ ନିୟମ ମୁତାବକ ଏବେ ଜଣେ ସିମ୍ କାର୍ଡ ନେବା ପାଇଁ ଫିଜିକାଲ ସ୍ଥାନରେ ଡିଜିଟାଲ କେୱାଇସି ଦେବାକୁ ହେବ । ଏଥିରେ ଗ୍ରାହକଙ୍କୁ କିଛି ବି ପ୍ରମାଣପତ୍ର ଦେବାକୁ ପଡିବ ନାହିଁ । ଏହାସହ ପୋଷ୍ଟପେଡ୍ ସିମ୍ କୁ ପ୍ରିପେଡରେ ବଦଳାଇବାକୁ ବି କିଛି ପ୍ରମାଣ ଦେବାକୁ ହେବ ନାହିଁ । ନେଟୱର୍କ ପ୍ରୋଭାଇଡର କମ୍ପାନୀ ଆପ୍ ମାଧ୍ୟମରେ ଗ୍ରାହକ ନିଜେ କେୱାଇସି ଭରି ପାରିବ । ଏଥିପାଇଁ ଗ୍ରାହକଙ୍କୁ ମାତ୍ର ୧ ଟଙ୍କା ଦେୟ ଦେବାକୁ ହେବ ।