ସାବଧାନ୍ ! ଆପଣଙ୍କ ନିକଟକୁ ବି ଆସିପାରେ ଏହି ନମ୍ବରରୁ ଫୋନ୍ କଲ୍, ଉଠାଇବା ମାତ୍ରକେ ମୋବାଇଲରୁ ଚାଲିଯାଉଛି ନେଟୱର୍କ ଆଉ ଧଡାଧଡ୍ ବ୍ୟାଙ୍କରୁ ଆପ୍ରୁଭ୍ ହୋଇଯାଉଛି ଲୋନ୍ ! ନମ୍ବର କି ଆକାଉଂଟ ବ୍ଲକ୍ କଲେ ବି ଖାତାରୁ ଗାଏବ ହୋଇଯାଉଛି ଟଙ୍କା
କନକ ବ୍ୟୁରୋ: ମହାମାରୀ କାଳରେ ବି ମାତିଛନ୍ତି ଲୁଟେରା । କେତେବେଳେ ଏଟିଏମ ଅପଡେଟ୍ ତ ପୁଣି କେତେବେଳେ ଆଧାର ଲିଙ୍କ କରାଇଦେବା ନାଁରେ ଲୋକଙ୍କୁ ଲୁଟୁଛନ୍ତି ଠକ । ଡିଜିଟାଲାଇଜେସନ କ୍ଷେତ୍ରରେ ଦେଶ ଆଗକୁ ବଢି ଚାଲିଛି ସତ ହେଲେ ସାଇବର ଅପରାଧ କିନ୍ତୁ ଥମିବାର ନାଁ ନେଉ ନାହିଁ । ତେବେ ଦେଶବ୍ୟାପୀ ବର୍ତ୍ତମାନ କରୋନା ସଂକଟ ଜାରି ରହିଥିବା ବେଳେ ବି ନିଜ ମନ୍ଦ ପ୍ରବୃତିରୁ ମୁହଁ ଫେରାଇନାହାନ୍ତି ଏଭଳି କିଛି ଅସମାଜିକ ଯୁବକ । ମହାମାରୀ ସଂକଟ ଭିତରେ ଏବେ ଏଭଳି ଏକ ଖବର ସାମ୍ନାକୁ ଆସିଛି ଯାହାକୁ ଜାଣିଲା ପରେ ଆପଣଙ୍କ ପାଦ ତଳୁ ବି ମାଟି ଖସିଯିବ ।
Kanak News is now on WhatsApp
Join and get latest news updates delivered to you via WhatsApp
ଦିଲ୍ଲାର ଜଣେ ମହିଳାଙ୍କ ନିକଟକୁ ସିମ କାର୍ଡକୁ ୩ଜିରୁ ୪ଜି ଅପଗ୍ରେଡ୍ କରାଇଦେବା ନାଁରେ ଏକ ଫୋନ କଲ୍ ଆସିଥିଲା । ଆଉ ଏହି ଚକ୍କରରେ ମହିଳାଙ୍କ ଖାତାରୁ ୧୨ ଲକ୍ଷ ଟଙ୍କା ଲୁଟିନେଇଥିଲେ ଦୁବୃର୍ତ୍ତ । ଆପଣ ଜାଣି ଆଶ୍ଚର୍ଯ୍ୟ ହେବେ କି ଏହି ଟଙ୍କା ବ୍ୟାଙ୍କରୁ ଲୋନ ଜରିଆରେ ହିଁ ଚଳୁକରିନେଇଥିଲା ଠକ । ତେବେ ବଡ କଥା ହେଉଛି ଏସଂକ୍ରାନ୍ତ ମହିଳା ଜଣକ ବ୍ୟାଙ୍କ କର୍ତ୍ତୃପକ୍ଷଙ୍କ ନିକଟରେ ଅଭିଯୋଗ କରିବା ସତ୍ୱେ ବି କୌଣସି ଲାଭ ମିଳିନଥିଲା ବରଂ ବ୍ୟାଙ୍କ କିସ୍ତି ଭରିବାକୁ କହିଥିଲା । ଏପଟେ, ଘଟଣାର ତଦନ୍ତ କରିବା ବଦଳରେ କେବଳ ଏକ ରିପୋର୍ଟଟିଏ ଲେଖି ଦେଇ ହାତ ଯୋଡି ବସିଯାଇଛି ପୋଲିସ୍ ।
ତେବେ ମହିଳାଙ୍କ ଅଭିଯୋଗ ଅନୁସାରେ, ସିମ ଅପଗ୍ରେଡ୍ କରାଇଦେବା ନାଁରେ ତାଙ୍କ ନିକଟକୁ ଏକ ଫୋନ କଲ୍ ଆସିଥିଲା । ଏହାପରେ ହଠାତ୍ ତାଙ୍କ ମୋବାଇଲର ନେଟଓର୍କ ଚାଲିଯାଇଥିଲା । ତେଣୁ ସେ ବ୍ୟସ୍ତ ହୋଇ ସିମ ବ୍ଲକ୍ କରିବାକୁ କଷ୍ଟମର କେୟାକୁ ଫୋନ କରିଥିଲେ ମାତ୍ର ଉକ୍ତ ନମ୍ବରଟି ତାଙ୍କର ନୁହେଁ ବୋଲି କଷ୍ଟମର କେୟାର ପକ୍ଷରୁ କୁହାଯାଇଥିଲା । ତେବେ କିଛି ସମୟ ପରେ ଇଂଟରନେଟ ବ୍ୟାଙ୍କିଂ ପାସଓାର୍ଡ ଚେଂଜିଂ ନେଇ ଏକ ମେସେଜ ତାଙ୍କ ପାଖକୁ ଆସିଥିଲା । ଏନେଇ ମହିଳା ଜଣକ ବ୍ୟାଙ୍କ ସହ ଯୋଗାଯୋଗ ମଧ୍ୟ କରିଥିଲେ କିନ୍ତୁ ସେତେବେଳକୁ ବହୁତ ଡେରୀ ହୋଇଯାଇଥିଲା । କାରଣ ଦୁବୃତ୍ତ ଜଣକ ମହିଳାଙ୍କ ନାଁରେ ବ୍ୟାଙ୍କରୁ ୧୨ ଲକ୍ଷ ଟଙ୍କାର ପର୍ସନାଲ ଲୋନ ଅନଲାଇନରେ ଉଠାଇନେଇଥିଲେ । ବଡ କଥା ହେଉଛି ବ୍ୟାଙ୍କ ମଧ୍ୟ ବିନା କୌଣସି ଭେରିଫିକେସନରେ ସଂପୃକ୍ତ ବ୍ୟକ୍ତିଙ୍କୁ ଲୋନ ଆପ୍ରୁଭ୍ କରାଇଦେଇଥିବା ନେଇ ମହିଳା ଜଣକ ଅଭିଯୋଗ ଆଣିଛନ୍ତି । ଏନେଇ ସେ ପୁଲିସରେ କମ୍ପେ୍ଲନ ମଧ୍ୟ କରିଥିଲେ ତେବେ ଘଟଣାକୁ ଇତି ମଧ୍ୟରେ ୨ ମାସ ବିତି ଯାଇଥିଲେ ସୁଦ୍ଧା ନା ପୋଲିସ୍ କିଛି କରିପାରୁଛି ନା ବ୍ୟାଙ୍କ ।