ବଡ ବିପଦରୁ ରକ୍ଷା ପାଇଲେ ନବଜୋତ ସିଂହ ସିଦ୍ଧୁ । ପ୍ରଚାର ପାଇଁ ହେଲିକପ୍ଟରରେ ଯାଉଥିଲେ, ଉଡାଣର ୧୦ ମିନିଟ୍ ମଧ୍ୟରେ ଖୋଲିଗଲା ହେଲିକପ୍ଟର କବାଟ

ନିର୍ବାଚନୀ ପ୍ରଚାର କରିବାକୁ ଯାଉଥିବା ସମୟରେ କଂଗ୍ରେସ ନେତା ତଥା ପୂର୍ବତନ କ୍ରିକେଟର ନବଜୋତ୍ ସିଂହ ସିଦ୍ଧୁ ଏକ ବଡ଼ ଦୁର୍ଘଟଣାରୁ ବର୍ତ୍ତି ଯାଇଥିବା ଜଣା ପଡ଼ିଛି । ମଝି ଆକାଶରେ ହଠାତ୍ ତାଙ୍କ ହେଲିକପ୍ଟରର କବାଟ ଖୋଲିଯିବାରୁ ଭିତରେ ବସିଥିବା ସିଦ୍ଧୁ ଡ଼ରି ଯାଇଥିଲେ । ତେବେ ପାଖରେ ବସିଥିବା ସହଯାତ୍ରୀ ନିଜ ବୁଦ୍ଧି ଖଟାଇ ତୁରନ୍ତ କବାଟକୁ ବନ୍ଦ କରି ଦେଇଥିଲେ । ଯାହା ଫଳରେ ଏକ ବଡ଼ ଦୁର୍ଘଟଣା ଟଳି ଯାଇଥିଲା ।

ସୂଚନା ମୁତାବକ, ସିଦ୍ଧୁ ନିର୍ବାଚନୀ ପ୍ରଚାର ପାଇଁ ମୁଙ୍ଗେର ଜିଲ୍ଲାର ବାଲାପୁରକୁ ଯାଉଥିଲେ । ଏହି ସମୟରେ ତାଙ୍କ ହେଲିକପ୍ଟରର କବାଟ ଖୋଲି ଯାଇଥିଲା । ହେଲିକପ୍ଟରରେ ସିଦ୍ଧୁଙ୍କ ସହ ବସିଥିବା ଅବସରପ୍ରାପ୍ତ ବ୍ରିଗେଡେୟର ପ୍ରଦୀପ ଯାଦବ ତୁରନ୍ତ ଯାଇ କବାଟ ବନ୍ଦ କରି ଦେଇଥିଲେ । କିନ୍ତୁ କଥା ଏଇଠି ସାରି ନଥିଲା । ବାଲାପୁରରୁ ରାୟପୁର ଆସି ସେଠାରୁ ଡୋଙ୍ଗରାଗାଓଁକୁ ନିର୍ବାଚନୀ ପ୍ରଚାର କରିବା ପାଇଁ ବାହରିବା ପରେ ପାଗ ଖରାପ ହେତୁ ମଝି ଆକାଶରେ ସିଦ୍ଧୁଙ୍କ ହେଲିକପ୍ଟର ଜୋରରେ ହଲିବାକୁ ଲାଗିଥିଲା । ଯାହା ପାଇଁ ପାଇଲଟ୍ ବାଧ୍ୟ ହୋଇ ହେଲିକପ୍ଟରକୁ ପୁଣି ଥରେ ରାୟପୁରକୁ ଫେରାଇ ଆଣିଥିଲେ ବୋଲି ଜଣା ପଡ଼ିଛି ।

ତେବେ ନିର୍ବାଚନ ସଭାକୁ ଯାଇନଥିଲେ ମଧ୍ୟ ଜନସାଧରଣଙ୍କୁ ଉଦବୋଧନ ଦେବାକୁ ପଛାଇ ନଥିଲେ ସିଦ୍ଧୁ । ମୋବାଇଲରେ କଲ କରି ଜନସାଧାରଣଙ୍କୁ ସମ୍ବୋଧନ ଦେଇଥିଲେ ସିଦ୍ଧୁ । କିନ୍ତୁ ଏଭଳି ଅବ୍ୟବସ୍ଥା ପାଇଁ ନିର୍ବାଚନ ଦାୟିତ୍ୱରେ ଥିବା ଦଳର ନେତାଙ୍କ ଉପରେ ରାଗିଥିଲେ ସିଦ୍ଧୁ ।