କନକ ବ୍ୟୁରୋ : ଟେଲି ଜଗତରେ ବେଶ ସୁନାମ ଅର୍ଜନ କରିଥିବା ଅଭିନେତା ସିଦ୍ଧାନ୍ତ ବୀର ସୂର୍ଯ୍ୟବଂଶୀଙ୍କ ଦେହାନ୍ତ । ମାତ୍ର ୪୬ ବର୍ଷ ବୟସରେ ଆଖି ବୁଜିଛନ୍ତି ସିଦ୍ଧାନ୍ତ । ଶୁକ୍ରବାର ସକାଳେ ଜିମରେ ୱାର୍କଆଉଟ କରୁଥିବା ବେଳେ ତାଙ୍କର ମୃତ୍ୟୁ ହୋଇଛି । ଜିମରେ ୱାର୍କଆଉଟ କରୁଥିବା ବେଳେ ସିଦ୍ଧାନ୍ତ ବେହୋସ ହୋଇପଡିଥିଲେ । ପରେ ତାଙ୍କୁ ତୁରନ୍ତ ହସ୍ପିଟାଲ ନିଆଯାଇଥିଲା ଯେଉଁଠି ଡାକ୍ତର ତାଙ୍କୁ ମୃତ୍ୟୁ ଘୋଷଣା କରିଥିଲେ ।

ସୂର୍ଯ୍ୟବଂଶୀ ଟେଲିଭିଜନର ଲୋକପ୍ରିୟ ସିରିଏଲ କୁସୁମ, ବାରିସ, ସୂର୍ଯ୍ୟପୁତ୍ର କର୍ଣ୍ଣରେ ଅଭିନୟ କରି ବେଶ ପ୍ରଂଶସା ସାଉଁଟିଥିଲେ । ନିଜ ଫିଟନେସକୁ ନେଇ ବେଶ ସତର୍କ ରହୁଥିଲେ ସୂର୍ଯ୍ୟବଂଶୀ । ଜଣେ ମଡେଲ ଭାବେ କ୍ୟାରିୟର ଆରମ୍ଭ କରିଥିବା ସୂର୍ଯ୍ୟବଂଶୀ କୁସୁମ ସିରିଏଲରୁ ଟେଲି ପରଦାରେ ଡେବ୍ୟୁ କରିଥିଲେ । ତେବେ ନିଜର ବ୍ୟକ୍ତିଗତ ଜୀବନକୁ ନେଇ ବେଶ ବିବାଦୀୟ ହୋଇଥିଲେ ସୂର୍ଯ୍ୟବଂଶୀ । ପ୍ରଥମେ ଇରାଙ୍କୁ ବିବାହ କରିଥିଲେ ସିଦ୍ଧାନ୍ତ । ତେବେ ୨୦୧୫ରେ ସେମାନଙ୍କର ବିବାହ ବିଚ୍ଛେଦ ହୋଇଥିଲା । ଏହାର ଦୁଇବର୍ଷ ପରେ ଆଲିସିଆଙ୍କୁ ବିବାହ କରିଥିଲେ ସିଦ୍ଧାନ୍ତ । ଏବେ ସିଦ୍ଧାନ୍ତଙ୍କର ଗୋଟିଏ ପୁଅ ଓ ଗୋଟିଏ ଝିଅ ଅଛନ୍ତି ।