ନିଜ ନିଜ ସ୍ତରରେ ପ୍ରଚାର ଆରମ୍ଭ କଲେଣି ନେତା । ଲୋକ ସମ୍ପର୍କ ବଜାୟ ରଖିବାକୁ ଆଦିବାସୀଙ୍କ ସହ ନାଚିଲେ ଶ୍ରୀମୟୀ ମିଶ, ଦୁଇ ଦିନ ଧରି ବର୍ଷାରେ ଭିଜି ଭିଜି ଲୋକଙ୍କୁ ଭେଟିଲେ ଅପରାଜିତା
କନକ ବ୍ୟୁରୋ : ରାଜ୍ୟରେ ବିଜେପି ଓ ବିଜେଡି ମଧ୍ୟରେ ମେଂଟ ହେବା ନେଇ ଚର୍ଚ୍ଚା ଏବେ ବି ଥମିନାହିଁ । ତଥାପି ଜନସଂପର୍କ ରକ୍ଷା କରିବାକୁ ଜୋରଦାର ପ୍ରୟାସ ଚଳାଇଛନ୍ତି ଆଶାୟୀ ପ୍ରାର୍ଥୀ । ବର୍ତମାନର ଭୁବନେଶ୍ୱର ସାଂସଦ ଅପରାଜିତା ଷଡଙ୍ଗୀ ପୁଣିଥରେ ବିଜେପି ଟିକେଟରେ ଲୋକସଭା ଲଢେଇକୁ ଓହ୍ଲାଇବା ପାଇଁ ଆଗ୍ରହୀ । ସେପଟେ ଭୁବନେଶ୍ୱର ଲୋକସଭା କ୍ଷେତ୍ର ପର୍ଯ୍ୟବେକ୍ଷକ ଦାୟିତ୍ୱ ପାଇଥିବା ଶ୍ରୀମୟୀ ମିଶ୍ର ମଧ୍ୟ ଭୁବନେଶ୍ୱରରୁ ବିଜେଡି ଟିକେଟ୍ ପାଇବା ନେଇ ଆଶାବାଦୀ ଥିବା କୁହାଯାଉଛି ।
Kanak News is now on WhatsApp
Join and get latest news updates delivered to you via WhatsApp
ଦୁଇଦିନ ତଳେ ଭୁବନେଶ୍ୱର ନୀଳାଦ୍ରିବିହାର ଅଂଚଳରେ ଥିବା ଆଦିବାସୀମାନଙ୍କ ବାହାବଙ୍ଗା ପର୍ବରେ ସାମିଲ ହୋଇଛନ୍ତି ବିଜେଡିର ଭୁବନେଶ୍ୱର ପର୍ଯ୍ୟବେକ୍ଷକ ଶ୍ରୀମୟୀ ମିଶ୍ର । ଆଦିବାସୀ ମହିଳାଙ୍କ ପାଦରେ ପାଦ ମିଶାଇ ନାଚିଛନ୍ତି । କେବଳ ଏତିକି ନୁହେଁ ଜନସଂପର୍କ ବଜାୟ ରଖିବାକୁ କ୍ରିକେଟ୍ ପ୍ରତିଯୋଗିତା, ଶ୍ରଦ୍ଧାଞ୍ଜଳି ଉତ୍ସବ ପରି ସାମାଜିକ କାର୍ଯ୍ୟକ୍ରମ ଓ ଉତ୍ସବରେ ସାମିଲ ହେଉଛନ୍ତି ଶ୍ରୀମୟୀ । କୁହାଯାଉଛି ଭୁବନେଶ୍ୱର ସଂସଦୀୟ କ୍ଷେତ୍ର ପାଇଁ ସେ ଟିକେଟ ଆଶାୟୀ ଅଛନ୍ତି । ତାଙ୍କ ସହ ସ୍ଥାନୀୟ ବିଧାୟକମାନେ ମଧ୍ୟ ବୁଲୁଥିବାରୁ ଶ୍ରୀମୟୀଙ୍କ ଟିକେଟ ଆଶା ଉଜ୍ୱଳ ଥିବା କୁହାଯାଉଛି ।
ଏପଟେ ଚିରାଚରିତ ଢଙ୍ଗରେ ରାଜଧାନୀର ବିଭିନ୍ନ ଅଂଚଳ ବୁଲୁଛନ୍ତି ଭୁବନେଶ୍ୱର ସାଂସଦ ଅପରାଜିତା ଷଡଙ୍ଗୀ । ଗତ ଦୁଇଦିନ ହେଲା ଭୁବନେଶ୍ୱରରେ ବର୍ଷା ସତ୍ୱେ ଭିଜିଭିଜି ବିଭିନ୍ନ ଅଂଚଳ ବୁଲୁଛନ୍ତି ଅପରାଜିତା । ବୁଧବାର ଏକାମ୍ର ଭୁବନେଶ୍ୱର ଏବଂ ଜଟଣୀ ବିଧାନସଭା ଅଂଚଳରେ ଜନସଂପର୍କ ପଦଯାତ୍ରା କରିଛନ୍ତି ଭୁବନେଶ୍ୱର ସାଂସଦ । ନିକଟରେ ବିଜେଡି ଛାଡି ବିଜେପି ଶିବିରରେ ସାମିଲ ହୋଇଥିବା ପ୍ରଶାନ୍ତ ଜଗଦେବଙ୍କୁ ମଧ୍ୟ ସାଂସଦଙ୍କ ସହ ବୁଲୁଥିବା ଦେଖିବାକୁ ମିଳିଛି । ବିଜେପି-ବିଜେଡି ମେଂଟ ଚର୍ଚ୍ଚା ଓ ଭୁବନେଶ୍ୱର ଆସନ କାହା ଭାଗରେ ପଡିବ ଆଶଙ୍କା ଭିତରେ ସାଂସଦ ଅପରାଜିତାଙ୍କ ଜନସଂପର୍କ ଯାତ୍ରା ଭିନ୍ନ ବାର୍ତା ଦେଇଛି ।