ଚାଲୁ ଚାଲୁ ଟଳିପଡିଲେ ପ୍ରବାସୀ । କୋଲକାତାରୁ କାକଟପୁର ଫେରିବା ବେଳେ ବାଲେଶ୍ୱର ଲକ୍ଷ୍ମଣନାଥ ତନଖି ଫାଟକ ନିକଟରେ ଚାଲିଗଲା ଜୀବନ, ଡାକ୍ତରଖାନାରେ ମୃତ ଘୋଷଣା କଲେ ଡାକ୍ତର ।
କନକ ବ୍ୟୁରୋ: କରୋନା ସଙ୍କଟ ବେଳେ ଅଭାବନୀୟ ଘଟଣା । ରାସ୍ତାରେ ଚାଲୁ ଚାଲୁ ଟଳିପଡିଲେ ପ୍ରବାସୀ ଶ୍ରମିକ । କୋଲକାତାରୁ ଫେରୁଥିବାବେଳେ ୬୦ ନମ୍ବର ଜାତୀୟ ରାଜପଥର ବାଲେଶ୍ୱର ଲକ୍ଷ୍ମଣନାଥ ତନଖି ଫାଟକଠାରୁ ଅଳ୍ପ କିଛି ଦୂରରେ ଘଟିଛି ଏହି ଘଟଣା ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଅନୁଯାୟୀ ପୁରୀ ଜିଲ୍ଲା କାକଟପୁର ଥାନା ଟିକରପଡା ଗାଁର ଧୁବେଇ ଚରଣ ମହାନ୍ତି କୋଲକାତାରେ ଏକ ଘରୋଇ କମ୍ପାନୀରେ କାମ କରନ୍ତି । ତାଲାବନ୍ଦ ଯୋଗୁଁ ସେ କୋଲକାତାରେ ଅଟକି ରହିଥିଲେ । ହେଲେ ଆଜି ଘରକୁ ଫେରିବା ନେଇ ଘରକୁ ଫୋନ୍ ଯୋଗେ ସୂଚନା ଦେଇଥିଲେ ।
ପ୍ରତ୍ୟକ୍ଷଦର୍ଶୀଙ୍କ କହିବା ଅନୁଯାୟୀ ସେ ଚାଲି ଚାଲି ଆସୁଥିବାବେଳେ ହଠାତ୍ ତଳେ ପଡି ଯାଇଥିଲେ । ସ୍ଥାନୀୟ ଲୋକେ ତାଙ୍କୁ ଉଦ୍ଧାର କରି ଗଛ ମୂଳକୁ ନେବା ସହ ଜଳେଶ୍ୱର ପୋଲିସକୁ ଖବର ଦେଇଥିଲେ । ପୋଲିସ ପହଁଚି ଧୁବେଇଙ୍କୁ ଜଳେଶ୍ୱର ଜିକେ ଭଟ୍ଟର ହସପିଟାଲକୁ ଆଣିଥିବାବେଳେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ତାଙ୍କ ପକେଟରୁ ମୋବାଇଲ୍, ଭୋଟର କାର୍ଡ, ଆଧାର କାର୍ଡ ଓ କିଛି ଟଙ୍କା ମିଳିଥିବା ଜଣାପଡିଛି ।