ମହାରାଷ୍ଟ୍ରରେ କିଏ ଗଢିବ ସରକାର, ମୁଖ୍ୟମନ୍ତ୍ରୀ ଆସନରେ ବସିବ କିଏ? ଏହାକୁ ନେଇ ଜୋରଦାର ଚର୍ଚ୍ଚା ହେଉଥିବା ବେଳେ ଉଭୟ ଶିବସେନା ଓ ବିଜେପି ସତ୍ତାର ଚାବି ଧରିବା ପାଇଁଁ କସରତ ଜାରି ରଖିଛନ୍ତି । ଆଉ ଏସବୁ ଭିତରେ ଶିବସେନା ପୁରୁଣା ସହଯୋଗୀ ବିଜେପିକୁ ବାଏ ବାଏ କରିବା ସହ ଏନସିପିକୁ ସାଥୀ କରି ମହାରାଷ୍ଟ୍ରରେ ସରକାର ଗଢିବାକୁ ଉଦ୍ୟମ ଆରମ୍ଭ କରିଛି । ଏପରିକି ଶିବସେନା ନେତା ସଞ୍ଜୟ ରାୱତ ବାରମ୍ବାର କହି ଆସୁଛନ୍ତି ଯେ, ଦଳ ସହ ଏବେ ୧୭୫ ବିଧାୟକଙ୍କ ସମର୍ଥନ ରହିଛି । ତେବେ ଏଭଳି ରାଜନୈତିକ ମାହୋଲ ଭିତରେ ଏନସିପି-କଂଗ୍ରେସ ଏଯାଏଁ ନିଜର କାର୍ଡ ଖୋଲି ନାହାନ୍ତି ।
Kanak News is now on WhatsApp
Join and get latest news updates delivered to you via WhatsApp
କିନ୍ତୁ ସବୁଠୁ ବଡ ପ୍ରଶ୍ନ ହେଉଛି, ଏନସିପି ଠାରୁ ସମର୍ଥନ ହାସଲ କରି ଶିବସେନା ସରକାର ଗଢିଲେ ମୁଖ୍ୟମନ୍ତ୍ରୀ ଆସନରେ ବସିବ କିଏ । ଶରଦ ପାୱାରଙ୍କୁ ମୁଖ୍ୟମନ୍ତ୍ରୀ ଆସନରେ ବସାଇବାକୁ ଶିବସେନା ଆଗରେ ସର୍ତ୍ତ ରଖିବନି ତ ଏନସିପି । ତେବେ ଏଭଳି ପ୍ରଶ୍ନର ବୁଲେଇ ବଙ୍କେଇ ଉତ୍ତର ରଖିଛନ୍ତି ଶିବସେନା ନେତା ସଞ୍ଜୟ ରାଉତ । ଶରଦ ଦିଲ୍ଲୀ ରାଜନୀତିର ଜଣେ ଜଣାଶୁଣା ଚେହେରା । ତେଣୁ ତାଙ୍କୁ ମହାରାଷ୍ଟ୍ରକୁ କାହିଁକି ଅଣାଯିବ । ଏହାସହ ସରକାର ଗଠନ ନେଇ ଏନସିପି ସହ ଆଲୋଚନା ହୋଇଛି, ଅନ୍ୟ ଦଳ ମଧ୍ୟ ଆମ ସହ ଯୋଗାଯୋଗରେ ଅଛନ୍ତି ବୋଲି କହିଛନ୍ତି ସଞ୍ଜୟ ।
ଏହାପୂର୍ବରୁ ମହାରାଷ୍ଟ୍ରରେ ଶିବସେନା-ଏନସିପି ସାଥୀ ହୋଇ ସରକାର ଗଢିବେ ବୋଲି ଚର୍ଚ୍ଚା ହେଉଥିଲା । ଆଉ କଂଗ୍ରେସ ଏହି ସରକାରକୁ ବାହ୍ୟ ସମର୍ଥନ ଦେଇପାରେ ବୋଲି ରାଜନୀତି କରିଡରରେ ଚର୍ଚ୍ଚା ଜୋର ଧରିଥିଲା । ତେବେ ବିରୋଧୀ ଆସନରେ ବସିବା ପାଇଁ ଜନମତ ମିଳିଛି ବୋଲି ଏନସିପି ବାରମ୍ବାର କହିବା ପରେ ଏହି ଚର୍ଚ୍ଚାରେ ବିରାମ ଲାଗିଛି ।