ପେଟ୍ରୋଲ ଦରବୃଦ୍ଧି ! ମେଂଟ ସରକାରରୁ ଓହରିଯିବାକୁ ଶିବସେନାର ଧମକ
କନକ ବ୍ୟୁରୋ : ଦିନକୁ ଦିନ ଦେଶରେ ପେଟ୍ରୋଲ ଓ ଡିଜେଲ ଦରବୃଦ୍ଧି ଘଟୁଥିବାରୁ ଏହାକୁ ତୀବ୍ର ବିରୋଧ କରିଛି ଶିବସେନା । ଏପରିକି କେନ୍ଦ୍ରରେ ଏବଂ ମହାରାଷ୍ଟ୍ରରେ ମେଂଟ ସରକାରରୁ ଓହରିଯିବାକୁ ଧମକ ଦେଇଛି ଦଳ । ତୁରନ୍ତ କେନ୍ଦ୍ର ସରକାର ପେଟ୍ରୋଲ ଓ ଡିଜେଲ ଦରବୃଦ୍ଧି ରୋକିବା ଉପରେ ଠୋସ ପଦକ୍ଷେପ ନନେଲେ ଶିବସେନା ଆନ୍ଦୋଳନ କରିବାକୁ ଚେତାବନୀ ମଧ୍ୟ ଦେଇଛି । ତେବେ ଶେଷ ନିଷ୍ପତି ଶିବସେନା ଅଧ୍ୟକ୍ଷ ଉଦ୍ଧବ ଠାକରେ ନେବେ ବୋଲି କହିଛନ୍ତି ଶିବସେନା ନେତା ସଂଜୟ ରାଉତ ।
Kanak News is now on WhatsApp
Join and get latest news updates delivered to you via WhatsApp
ଅଶୋଧିତ ତେଲ ଦର ବ୍ୟାରେଲ ପ୍ରତି ୫୦ ଡଲାର ପାଖାପାଖି କିଣା ପଡ଼ୁଥିବାବେଳେ ଦେଶରେ ପେଟ୍ରୋଲ ଦର ୮୦ ଟଙ୍କା ପାଖାପାଖି ପହଁଚିଲାଣି । ଯାହାକି ୩ ବର୍ଷ ଭିତରେ ସବୁଠୁ ଅଧିକ ହୋଇଛି । ୟୁପିଏ ସରକାର ସମୟରେ ବ୍ୟାରେଲ ପ୍ରତି ତେଲ ଦର ୧୦୦ ଡଲାର ଥିବାବେଳେ ଯେତିକି ତେଲ ଦର ଥିଲା ଏବେ ତାହାଠାରୁ ବହୁ ଅଧିକ ରହିଛି । ପେଟ୍ରୋଲ,ଡିଜେଲ ଦରବୃଦ୍ଧି ହେଲେ ବିଜେପି ନେତାମାନେ ରାଜରାସ୍ତାରେ ହଂଗାମା କରୁଥିଲେ । ଏବେ କେନ୍ଦ୍ରମନ୍ତ୍ରୀ ଥିବା ରାଜନାଥ ସିଂହଙ୍କ ଠାରୁ ଆରମ୍ଭ କରି ସୁଷମା ସ୍ୱରାଜ, ସ୍ମୃତି ଇରାନିଙ୍କ ସହ ହଜାର ହଜାର କର୍ମୀ ଆନ୍ଦୋଳନରେ ସାମିଲ ହୋଇ ଦରବୃଦ୍ଧି କରିବାକୁ ଚାପ ପକାଉଥିଲେ ।
ଏବେ ସେମାନେ କିଭଳି ଚୁପ ହୋଇ ରହିଛନ୍ତି ବୋଲି ଶିବସେନା ତାର ମୁଖପତ୍ରରେ ପ୍ରଶ୍ନ ଉଠାଇଛି । ପେଟ୍ରୋଲର ଅତ୍ୟଧିକ ଦରବୃଦ୍ଧି ଗରିବ ଓ ମଧ୍ୟବିତ୍ତ ପରିବାର ଉପରେ ବୋଝ ଭଳି ହୋଇଛି । ତୈଳ ଦରବୃଦ୍ଧି ଯୋଗୁଁ ବଜାରରେ ସବୁ ଦ୍ରବ୍ୟର ଦର ବୃଦ୍ଧି ଘଙ୍କୁଛି । ଏପରିକି କୃଷକଙ୍କ ଆତ୍ମହତ୍ୟାର ମୂଳ କାରଣ ତୈଳ ଦରବୃଦ୍ଧି ବୋଲି କହିଛି ଶିବସେନା । ସାଧାରଣ ଜନତାର ସେବା କରିବାକୁ କହି ଶାସନ କରୁଥିବା ବିଜେପି ଏବେ ସବୁ ପ୍ରତିଶ୍ରୁତି ଭୁଲି ଯାଇଥିବା ଶିବସେନା ପକ୍ଷରୁ କୁହାଯାଇଛି ।