ମୁକ୍ତ ହେଲା ମାଲବାହୀ ଜାହାଜ ଏଭର ଗିଭେନ୍ । ସୁଏଜ କେନାଲରୁ ହଟିଲା ଅଚଳାବସ୍ଥା । ବିଶ୍ୱର ସବୁଠୁ ବ୍ୟସ୍ତବହୁଳ ଜଳପଥରେ ସ୍ୱାଭାବିକ ହେଲା ଜାହାଜ ଗମନାଗମନ
କନକ ବ୍ୟୁରୋ: ଇଜିପ୍ଟର ସୁଏଜ କେନାଲରେ ଅଚଳବାସ୍ଥାରେ ସୁଧାର ଆସିଛି । ସୋମବାର ଦିନ କେନାଲରେ ଫସିଥିବା ତାଇୱାନ ଜାହାଜ ଗନ୍ତବ୍ୟସ୍ଥଳକୁ ଯିବା ଆରମ୍ଭ କରିଛି । ହେଲେ ଗତ ୬ ଦିନ ହେଲା ସୁଏଜ କେନାଲରେ ବିଶାଳକାୟ ଏଭର ଗିଭେନ ଜାହାଜ ଫସିଥିବାରୁ କେନାଲର ଦୁଇ ମୁଣ୍ଡରେ ସାଢେ ତିନିଶହରୁ ଅଧିକ ଜାହାଜ ଅଟକି ରହିଛି । ତେଣୁ ସୁଏଜ କେନାଲରେ ସ୍ୱଭାବିକତା ଫେରାଇ ଆଣିବାକୁ ୩ରୁ ୪ ଦିନ ସମୟ ଲାଗିବ ବୋଲି କହିଛନ୍ତି କେନାଲ କର୍ତୃପକ୍ଷ ।
Kanak News is now on WhatsApp
Join and get latest news updates delivered to you via WhatsApp
ସୁଏଜ କେନାଲରୁ ପଣ୍ୟବାହୀ ଜାହାଜ ଏଭର ଗିଭେନ ବାହାରିଯାଇଛି, ଜାହାଜରେ ଥିବା ସମସ୍ତ ୨୫ ଜଣ ଭାରତୀୟ କ୍ରୁ ମେମ୍ବର ସୁରକ୍ଷିତ ଅଛନ୍ତି । ତେବେ ଜାହାଜର କ୍ରୁ ମେମ୍ବରଙ୍କ ଉପରେ ବିପଦର ଖଣ୍ଡା ଝୁଲୁଛି । କାରଣ ୭ ଦିନ କାଳ ଅବରୋଧ ଯୋଗୁଁ ଜାହାଜର କ୍ରୁ ମେମ୍ବର ଉପରେ ଅପରାଧିକ ମାମଲା ରୁଜୁ ହେବା ଆଶଙ୍କା ରହିଛି । କାରଣ ପୁର୍ବରୁ କେନାଲ ପ୍ରାଧିକରଣ ମୁଖ୍ୟ କହିଥିଲେ, ବିଶାଳକାୟ ଜାହାଜ ଅବରୋଧ ପାଇଁ କେବଳ ଘୂର୍ଣ୍ଣିଝଡ ପବନକୁ ଦାୟୀ କରାଯାଇ ପାରିବ ନାହିଁ । ଏହା ମନୁଷ୍ୟକୃତ ତ୍ରୁଟି ନା କେନାଲର ପରିଚାଳନାରେ ଅବହେଳା ତାହାର ଯାଂଚ କରାଯାଇ କାର୍ଯ୍ୟାନୁଷ୍ଠାନ ନିଆଯିବ ।
ସେପଟେ ଜାହାଜ କର୍ତୃପକ୍ଷ ଜାହାଜରେ ଥିବା ଭାରତୀୟ କର୍ମଚାରୀଙ୍କ ପ୍ରଶଂସା କରିଛନ୍ତି । ଫସିରହିଥିବା ଜାହାଜକୁ ବାହାର କରିବାରେ ଭାରତୀୟ କର୍ମଚାରୀଙ୍କ ଗୁରୁତ୍ୱପୂର୍ଣ୍ଣ ଭୂମିକା ଥିବା କୁହାଯାଇଛି ।
ଏଭର ଗିଭେନ ଜାହାଜଟି ସୁଏଜ କେନାଲରେ ଅବରୋଧ କରିଥିବା ଯୋଗୁଁ କୋଟି କୋଟି ଟଙ୍କାର କ୍ଷତି ହେଉଥିଲା । ଏପରିକି ପ୍ରତିଦିନ ୯.୬ଅରବ ଡଲାରର କ୍ଷତି ହେଉଥିଲା । ପ୍ରତି ବର୍ଷ ଏହି ଜଳପଥ ଦେଇ ୧୯ହଜାର ଜାହାଜ ଅତିକ୍ରମ କରିଥାଏ । ଏହି ଜଳପଥ ବନ୍ଦ ହୋଇଗଲେ ଅଧିକ ୫ହଜାର କିଲୋମିଟର ଅତିକ୍ରମ କରି ୟୁରୋପ ଯିବାକୁ ପଡିବ । ଏଠାରେ ଟ୍ରାଫିକ ଜାମ ଯୋଗୁଁ ଗଲ୍ଫ ଦେଶଗୁଡିକରୁ ତେଲ ରପ୍ତାନୀ ମଧ୍ୟ ହୋଇପାରୁନଥିଲା ।
ଗତ ୨୩ତାରିଖରେ ସୁଏଜ କେନାଲରେ ଏହି ଜାହାଜଟି ଫସିଯାଇଥିଲା । ୭ ଦିନ ସୁଏଜ କେନାଲ ଅବରୋଧ ଯୋଗୁଁ କୋଟି କୋଟି ଟଙ୍କା କ୍ଷତି ସହିଛନ୍ତି ସୁଏଜ କେନାଲ କର୍ତୃପକ୍ଷ । ତେଣୁ ଭାରତୀୟ ନାଗରିକ ତଥା କ୍ରୁ ମେମ୍ବରଙ୍କ ଉପରେ ଅପରାଧିକ ମାମଲା ରୁଜୁ କରିବା ସମ୍ଭାବନା ରହିଛି ।