ସମୟ ସହ ତାଳଦେଇ ଆଗକୁ ବଢୁଛନ୍ତି ମହିଳା, ପଡିଆ ଜମିରେ ସୁନା ଫଳାଇ ରେକର୍ଡ କଲେ ସ୍ୱୟଂ ସହାୟକ ଗୋଷ୍ଠୀର ମହିଳା

କନକ ବ୍ୟୁରୋ : ଧର୍ମଶାଳା ବ୍ଲକ ପାଟପୁର ଗାଁର ମା ଶାରଳା ସ୍ୱୟଂ ସହାୟକ ଗୋଷ୍ଠୀର ସଦସ୍ୟା । ସମୟ ସହ ତାଳ ଦେଇ ଏମାନେ କିପରି ଆଗକୁ ବଢିବା ସହ ଆର୍ଥିକ ଦୃଷ୍ଟିରୁ ସମୃଦ୍ଧ ହେବେ ସେନେଇ ଆରମ୍ଭ କରିଛନ୍ତି ପ୍ରୟାସ । ମାତ୍ର ୧୨ ଜଣ ସଦସ୍ୟାଙ୍କୁ ନେଇ ଆରମ୍ଭ ହୋଇଥିବା ଏହି ମହିଳା ଗୋଷ୍ଠୀର ସଦସ୍ୟାମାନେ ଦୁଇ ମାସତଳୁ ଆରମ୍ଭ କରିଛନ୍ତି ପରିବା ଚାଷ । ସ୍ଥାନୀୟ ଜଣେ ବ୍ୟକ୍ତିଙ୍କ ପଡିଆ ପଡିଥିବା ଏକ ଏକର ଜମିକୁ ଲିଜ୍ ସୂତ୍ରରେ ଆଣି ଆରମ୍ଭ କରିଛନ୍ତି ପରିବା ଚାଷ । ପ୍ରାଥମିକ ପର୍ଯ୍ୟାୟରେ ପରୀକ୍ଷା ମୂଳକ ଭାବେ ଚଳିତବର୍ଷ ସେମାନେ କାକୁଡି, କଲାରା,ଜହ୍ନୀ ଭଳି ପରିବା ଚାଷକରିଛନ୍ତି । ଉନ୍ନତ ମାନର ବିହନ ସାଙ୍ଗକୁ ସାର ଓøଷଧ ବ୍ୟବହାର କରି ପଡିଆ ଜମିକୁ ସବୁଜିମାରେ ଭରିବା ସହ ବେଶ୍ ଭଲ ଅମଳ କରିବାକୁ ସକ୍ଷମ ହୋଇଛନ୍ତି ।

ଏହି ଚାଷ ପାଇଁ ୬୦ ହଜାର ଟଙ୍କା ଖର୍ଚ୍ଚ କରିଛନ୍ତି ମହିଳା । ଏବେ ପରିବା ଦର ଅଧିକ ରହିଥିବାରୁ ୨ଲକ୍ଷରୁ ଅଧିକ ଟଙ୍କା ରୋଜଗାର ହେଲାଣି । ଏହି ମହିଳାମାନଙ୍କ ଚାଷରେ ସଫଳତା ଦେଖି ଅନ୍ୟମହିଳାମାନେ ପରିବା ଚାଷ ପ୍ରତି ଆଗ୍ରହ ପ୍ରକାଶ କରି ସେମାନଙ୍କ ପରାମର୍ଶ ନେଉଥିବା ଗ୍ରୁପର ସଦସ୍ୟାମାନେ କହିଛନ୍ତି । ଅନ୍ୟପଟେ ଉପଯୁକ୍ତ ବଜାର ନଥିବାରୁ ଅକ୍ଳାନ୍ତ ପରିଶ୍ରମ କରି ଉତ୍ପାଦିତ ପରିବାକୁ ସଠିକ ମୂଲ୍ୟରେ ବିକ୍ରି କରିପାରୁନାହାନ୍ତି ମହିଳା । ଯାହାକୁ ନେଇ ସେମାନଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି ।

ତେବେ ବର୍ତମାନର ମହଙ୍ଗା ସମୟରେ ଏହି ସ୍ୱୟଂ ସହାୟକ ଗୋଷ୍ଠୀର ସଦସ୍ୟା ମାନଙ୍କର ପରିବା ଚାଷରେ ସଫଳତା ନିଶ୍ଚୟ ଅନ୍ୟମାନଙ୍କୁ ରୋଜଗାର ପାଇଁ ବାଟ ଦେଖାଇବ ।