କନକ ବ୍ୟୁରୋ : ମାଲକାନଗିରି ଜିଲ୍ଲାର ଉପାନ୍ତ କାଲିମେଳା ବ୍ଲକରେ ଥିବା ବିଭିନ୍ନ ସ୍ୱଂୟ ସହାୟକ ଗୋଷ୍ଠୀକୁ ଓଡ଼ିଶା ଜୀବିକା ମିଶନ ମିଠା ମକା ମଂଜି ଦେଇ ଠକି ଦେଇଥିବାର ଅଭିଯୋଗ ହୋଇଛି । କାଲିମେଳା ପଂଚାୟତର ପୁଶୁଗୁଡ଼ା ଗାଁରେ ଥିବା ମହାତ୍ମା ଓ ଜୟଶ୍ରୀ ମହିଳା ସ୍ୱଂୟ ସହାୟକ ଗୋଷ୍ଠୀର ମହିଳାମାନେ ଏଭଳି ଅଭିଯୋଗ ଆଣିଛନ୍ତି  । ଏମାନଙ୍କ କହିବା କଥା, ମକା ଗଛ ବଦଳରେ କେବଳ ଘାସ ଗଛ ହୋଇଛି ।

Advertisment

 ୨୦୨୦ ମସିହାରେ ଓଡ଼ିଶା ଜୀବିକା ମିଶନ ତରଫରୁ କାଲିମେଳା ବ୍ଲକରେ ଥିବା କାଲିମେଳା , ଗମ୍ପାକୋଣ୍ଡା , କାଙ୍ଗୁରୁକୋଣ୍ଡା , କୋଇମେଟଲା ଓ ଭେଂକଟପଲମ ପଂଚାୟତର କିଛି ସ୍ୱଂୟ ସହାୟକ ଗୋଷ୍ଠୀକୁ ମେରିଟି ୪୫୧୩ କିସମର ହାଇବ୍ରିଡ଼ ମିଠା ମକା ମଂଜି ଚାଷ କରିବାକୁ ଦିଆଯାଇଥିଲା । ୧୦୦ ଗ୍ରାମର ମକା ମଂଜିର ଦାମ ଥିଲା ୪୬୮ ଟଙ୍କା । ଓଡ଼ିଶା ଜୀବିକା ମିଶନ କୋଏମ୍ବାଟୁରର ଏକ କଂପାନୀଠାରୁ ମକା ମଂଜି ଆଣି ସ୍ୱଂୟ ସହାୟିକା ଗୋଷ୍ଠୀକୁ ଦେଇଥିଲା । ମହିଳାମାନେ ନିଜ ବାଡ଼ିରେ ନିଜେ ପରିଶ୍ରମ କରି ବାଡ଼ କରି ମକା ଚାଷ କରିଥିଲେ । ହେଲେ ମକା ଗଛ ବଦଳରେ କେବଳ ଘାସ ଗଛ ହୋଇଥିଲା ବୋଲି ମହିଳାମାନେ ଅଭିଯୋଗ କରିଛନ୍ତି ।

ଏବେ ସେମାନଙ୍କୁ ୮୦ ହଜାର ଟଙ୍କାର ଋଣ ପରିଶୋଧ କରିବାକୁ କୁହାଯିବାରୁ ସେମାନଙ୍କ ଚିନ୍ତା ବଢିଯାଇଛି ।  ଏ ସମ୍ପର୍କରେ ଉପରିସ୍ଥ ଅଧିକାରୀଙ୍କ ଦୃଷ୍ଟି ଆକର୍ଷଣ କରାଯିବ ବୋଲି କହିଛନ୍ତି ଓଡିଶା ଜୀବିକା ମିଶନ କାଲିମେଳା ପଞ୍ଚାୟତର ଏମବିକେ ।