ମହାରାଷ୍ଟ୍ର ମେଂଟରେ ଫାଟ : ଗୃହମନ୍ତ୍ରୀ ଅନୀଲ ଦେଶମୁଖଙ୍କ ବିରୋଧରେ ହୋଇଥିବା ଅଭିଯୋଗ ଉପରେ ଆଜି ନିଷ୍ପତ୍ତି
ଶିବସେନା ସାଂସଦ ସଂଜୟ ରାଉତଙ୍କ ଟୁଇଟକୁ ନେଇ ବଢିଲା ଚର୍ଚ୍ଚା
କନକ ବ୍ୟୁରୋ : ମହାରାଷ୍ଟ୍ରରେ ବରିଷ୍ଠ ପୁଲିସ ଅଧିକାରୀଙ୍କ ଚିଠିକୁ ନେଇ ହଇଚଇ ଖେଳିଯାଇଛି । ସ୍ଥିତି ଏପରି ହୋଇଛି ଯେ ଏବେ ମହାରାଷ୍ଟ୍ର ମହାବିକାଶ ଅଘାଡି ମେଂଟରେ ଫାଟ ସୃଷ୍ଟି ହେବାକୁ ବସିଲାଣି । ଗୃହମନ୍ତ୍ରୀ ଅନୀଲ ଦେଶମୁଖଙ୍କ ବିରୋଧରେ ପୂର୍ବତନ ମୁମ୍ବାଇ ପୁଲିସ କମିସନର ପରମବୀର ସିଂ ଶହେ କୋଟି ଟଙ୍କା ବଟି ଆଦାୟ ନିର୍ଦ୍ଦେଶ ଅଭିଯୋଗ ପରେ ତାଙ୍କ ମନ୍ତ୍ରୀ ପଦ ବିପଦରେ ପଡିଛି । ଗୃହମନ୍ତ୍ରୀ ଅନୀଲ ଦେଶମୁଖଙ୍କୁ ତୁରନ୍ତ ପଦରୁ ହଟାଇବା ପାଇଁ ମେଂଟର କିଛି ନେତା ଖୋଲାଖୋଲି ଦାବି କରୁଥିବା ବେଳେ କିଛି ନେତା ସପକ୍ଷରେ ମତ ଦେଉଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଅନ୍ୟପଟେ ଗତକାଲି ଶରଦପାୱାର କହିଥିଲେ, ଦେଶମୁଖ ପଦରେ ରହିବେ ନା ଯିବେ ସେନେଇ ନିଷ୍ପତ୍ତି ନେବା କ୍ଷମତା ମୁଖ୍ୟମନ୍ତ୍ରୀଙ୍କ ରହିଛି । ତେଣୁ ଆଜି ଅନୀଲ ଦେଶମୁଖଙ୍କ ପଦକୁ ନେଇ ନିଷ୍ପତ୍ତି ନେଇପାରନ୍ତି ମୁଖ୍ୟମନ୍ତ୍ରୀ ଉଦ୍ଧବ ଠାକରେ । ମେଂଟରେ ଅସନ୍ତୋଷ ବଢୁଥିବାରୁ ଆଜି ମହାବିକାଶ ଅଘାଡି ମେଟର ବୈଠକ ବସିବ ଓ ଦେଶମୁଖଙ୍କ ବାବଦରେ ନିଷ୍ପତ୍ତି ନିଆଯିବ ବୋଲି ସୂଚନା ମିଳିଛି । ଅନ୍ୟପଟେ ଦେଶମୁଖ ଇସ୍ତଫା ଦେବେ ନାହିଁ ବୋଲି ଶରଦ ପାୱାରଙ୍କ ବାସଭବନରେ ନିଷ୍ପତ୍ତି ହୋଇଥିବା ଗଣମାଧ୍ୟମରେ ଚର୍ଚ୍ଚା ହେଉଛି । ଆଉ ଏପରି ସ୍ଥିତିରେ ଯଦି ଅନୀଲ ଦେଶମୁଖଙ୍କୁ ଉଦ୍ଧବ ଠାକରେ ଗୃହମନ୍ତ୍ରୀ ପଦରୁ ହଟାଇ ଦିଅନ୍ତି, ତେବେ ମେଂଟରେ ଫାଟ ସୃଷ୍ଟି ହେବା ସମ୍ଭାବନା ରହିଛି ।
ମହାରାଷ୍ଟ୍ର ଗୃହମନ୍ତ୍ରୀ ଅନୀଲ ଦେଶମୁଖଙ୍କୁ ନେଇ ମହାବିକାଶ ଅଘାଡି ମେଂଟରେ ଅସନ୍ତୋଷ ବଢିଥିବା ବେଳେ ଶିବସେନା ସାଂସଦ ସଂଜୟ ରାଉତଙ୍କ ଏକ ଟୁଇଟ କରିଛନ୍ତି । ବଲିଉଡ ସଙ୍ଗୀତକାର ଜାଭେଦ ଅଖତାରଙ୍କ ଏକ ସାୟରୀକୁ ଟୁଇଟ କରିଛନ୍ତି ସଂଜୟ ରାଉତ୍ । ଟୁଇଟରେ ସେ ଲେଖିଛନ୍ତି ସୁପ୍ରଭାତ, “ହମକୋ ତୋ ବସ ତଲାସ ନୟେ ରାସ୍ତେ କି ହୈ, ହମ ହେ ମୁସାଫିର ଐସେ ଯୋ ମଞ୍ଜିଲ ସେ ଆୟେ ହୈଁ” । ସଂଜୟଙ୍କ ଏହି ଟୁଇଟ ପରେ ଶିବସେନା ପୁଣି ନିଜ ପୁରୁଣା ମେଂଟର ସାଥୀ ବିଜେପି ସହ ଯାଇପାରେ ବୋଲି ଚର୍ଚ୍ଚା ହେଉଛି । ବିଜେପି ସହ ମେଂଟ ତୁଟିବା ପରେ ସଂଜୟ ରାଉତ ହିଁ ମହାବିକାଶ ଅଘାଡି ମେଂଟ ପାଇଁ ଦଳ ପକ୍ଷରୁ ନିରନ୍ତର ଏନସିପି ଓ କଂଗ୍ରେସ ସହ ଯୋଗାଯୋଗ କରିଥିଲେ । ତେଣୁ ସଂଜୟ ରାଉତଙ୍କ ଏହି ଟୁଇଟ ଭିନ୍ନ ବାର୍ତ୍ତା ଦେଉଥିବା ଗଣମାଧ୍ୟମରେ ଚର୍ଚ୍ଚା ହେଉଛି ।