ହୋଟେଲ ଭିତରୁ ‘ପାୱାର’ ସୋ’ । ଏକାଠି ସାମ୍ନାକୁ ଆସିଲେ ଶିବସେନା-ଏନସିପି ଓ କଂଗ୍ରେସ । ହୋଟେଲରେ କରାଇଲେ ୧୬୨ ବିଧାୟକଙ୍କ ପରେଡ୍, ଟୁଇଟ କରି କହିଲେ ‘ଆମେ ଏକ’
ମହାରାଷ୍ଟ୍ରରେ ଚାଲିଛି ରାଜନୀତିର ମହାଭାରତ
କନକ ବ୍ୟୁରୋ: ମହାରାଷ୍ଟ୍ର ରାଜନୀତିକୁ ନେଇ ସୁପ୍ରମିକୋର୍ଟଙ୍କ ରାୟ ଆସିବା ପୂର୍ବରୁ ସରକାର ଗଠନ ନେଇ ଆସିଥିବା ନେତାଙ୍କ ବୟାନବାଜୀ ଏକ ରୋଚକ ସ୍ଥିତି ସୃଷ୍ଟି କରିଛି । ଶିବସେନା ସାଂସଦ କିଛି ସମୟ ତଳେ ଟୁଇଟ୍ କରି ଲେଖିଛନ୍ତି ଆମେ ଏକ, ଆମେ ଏକାଠି । ଯେଉଁଥିରେ ସରକାର ଗଠନ ପାଇଁ ତାଙ୍କ ପାଖରେ ୧୬୨ ବିଧାୟକଙ୍କ ସମର୍ଥନ ଥିବା ଟୁଇଟରେ ଲେଖିଛନ୍ତି । ଏମିତି କି ଏହାକୁ ମହାରାଷ୍ଟ୍ର ରାଜ୍ୟପାଳଙ୍କ ଟ୍ୟାଗକରି ଲେଖିଛନ୍ତି- ଆସନ୍ତୁ ଆଉ ଥରେ ଦେଖି ଯାଆନ୍ତୁ । ସୂଚନା ଅନୁସାରେ ଶିବସେନା, ଏନ୍ସିପି ଏବଂ କଂଗ୍ରେସର ବିଧାୟକମାନେ ଗ୍ରାଣ୍ଡ ହାୟତ ହୋଟେଲରେ ଏକାଠି ହେଉଛନ୍ତି । ଏହା ପୂର୍ବରୁ ରାଜ୍ୟପାଳଙ୍କୁ ଏହି ଗୋଷ୍ଠୀ ପାଖରେ ସରକାର ଗଠନ ପାଇଁ ଆବଶ୍ୟକ ବିଧାୟକ ଥିବା ନେଇ ଜଣାଇ ଦିଆଯାଇଛି । ଅନ୍ୟପଟେ ବିଜେପି ରଖିଛି ସମାନ ଦାବି । ଏପଟେ ବିଜେପି ପକ୍ଷରୁ କୁହାଯାଇଛି- ଗୃହରେ ବହୁମତ ସାବ୍ୟସ୍ତ କରିବା ପାଇଁ ଦଳ ପାଖରେ ଯଥେଷ୍ଟ ସଂଖ୍ୟା ରହିଛି । ସେହିପରି ଅପରେସନ୍ ଲୋଟସ୍ କିମ୍ବା ଅନ୍ୟଦଳର ବିଧାୟକଙ୍କୁ ଧମକ୍-ଚମକ୍ ଦେବା ନେଇ ଯେଉଁ ଅଭିଯୋଗ ହେଉଛି, ତାହା ଭିତିହୀନ । ରାଜନୀତିର ଏହି ବୟାନ ଭିତରେ ମହାରାଷ୍ଟ୍ର ରାଜନୀତିକୁ ନେଇ ସୁପ୍ରିମକୋର୍ଟରେ କେମିତି ଥିଲା ବିତର୍କ ପଢନ୍ତୁ ଏହି ରିପୋର୍ଟ ।
Kanak News is now on WhatsApp
Join and get latest news updates delivered to you via WhatsApp
ସଂଖ୍ୟା ନଥାଇ ବିଜେପିକୁ ସରକାର ଗଠନ ପାଇଁ ସୁଯୋଗ ଦେବା, ସକାଳ ୫ଟାରେ ରାଷ୍ଟ୍ରପତି ଶାସନ ଉଚ୍ଛେଦ କରିଦେବା ଓ ସକାଳ ୮ଟା ସୁଦ୍ଧା ଦେବେନ୍ଦ୍ର ଫଡନଭିସଙ୍କୁ ମୁଖ୍ୟମନ୍ତ୍ରୀ ଏବଂ ଅଜିତ ପାୱାରଙ୍କୁ ଉପମୁଖ୍ୟମନ୍ତ୍ରୀ କରିଦେବା ବିରୋଧରେ ସୁପ୍ରିମକୋର୍ଟରେ ଶୁଣାଣି ହୋଇଛି । କୋର୍ଟରୁମ୍… ଶିବସେନା-ଏନସିପି-କଂଗ୍ରେସ ପକ୍ଷରୁ ହୋଇଥିବା ରିଟ୍ ପିଟିସନର ଶୁଣାଣି ସର୍ବୋଚ୍ଚ ନ୍ୟାୟାଳୟଙ୍କ ୨ ନମ୍ବର କୋର୍ଟରେ ଜଷ୍ଟିସ ଏନଭି ରମନ୍ନା, ଜଷ୍ଟିସ ଅଶୋକ ଭୂଷଣ ଓ ଜଷ୍ଟିସ ସଂଜୀବ ଖାନ୍ନାଙ୍କ ସ୍ୱତନ୍ତ୍ର ଖଣ୍ଡପୀଠରେ କରାଯାଇଛି । ଅଚାନକ ରାଷ୍ଟ୍ରପତି ଶାସନ ଉଚ୍ଛେଦ କରି ବିଜେପିକୁ ସରକାର ଗଠନ ପାଇଁ ରାଜ୍ୟପାଳ ଆମନ୍ତ୍ରଣ କରିବା ବେଆଇନ ବୋଲି ଦର୍ଶାଇଥିଲେ ଶିବସେନା-ଏନସିପି-କଂଗ୍ରେସ । ଏହାକୁ ପ୍ରଥମେ ସୁପ୍ରିମକୋର୍ଟରେ ବିରୋଧ କରିଥିଲେ ରାଜ୍ୟପାଳ ଭଗତ ସିଂ କୋଶିୟାରୀଙ୍କ ପକ୍ଷରୁ ମାମଲା ପରିଚାଳନା କରୁଥିବା ସଲିସିଟର ଜେନେରାଲ ତୁଷାର ମେହଟା ।
– ବିଜେପିର ୧୦୫, ଏନସିପିର ୫୪ ଓ ୧୧ ସ୍ୱାଧୀନ ବିଧାୟକଙ୍କ ସମର୍ଥନ ଥିବା ପତ୍ର ରାଜ୍ୟପାଳଙ୍କୁ ଦେଇଥିଲେ ଦେବେନ୍ଦ୍ର ଫଡନଭିସ
– ଏନସିପିର ୫୪ ବିଧାୟକଙ୍କ ସମର୍ଥନ ରହିଥିବା ଚିଠିରେ ଜଣାଇଥିଲେ ଏନସିପି ବିଧାୟକ ଦଳ ନେତା ଅଜିତ ପାୱାର
– ସରକାର ଗଠନ ପାଇଁ ୧୪୫ ବିଧାୟକଙ୍କ ସମର୍ଥନ ଦରକାର ହେଉଥିବାବେଳେ ୧୭୦ ବିଧାୟକଙ୍କ ସମର୍ଥନ ସଂବଳିତ ପତ୍ର ଥିବାରୁ ରାଜ୍ୟପାଳ ସରକାର ଗଠନ ପାଇଁ ଫଡନଭିସଙ୍କୁ ଆମନ୍ତ୍ରଣ କଲେ
ଶିବସେନା-ଏନସିପି-କଂଗ୍ରେସ ମହାରାଷ୍ଟ୍ରରେ ସରକାର ଗଢିବା ପାଇଁ ପ୍ରସ୍ତୁତ ହେଉଥିବାବେଳେ ବିଜେପିକୁ କାହିଁକି ତରବରିଆ ଭାବେ ସରକାର ଗଠନ ପାଇଁ ଆମନ୍ତ୍ରଣ କରାଗଲା, ତାକୁ ହିଁ ପ୍ରସଙ୍ଗ କରିଥିଲେ ବିରୋଧୀ ମେଂଟ ପକ୍ଷରୁ ମାମଲା ପରିଚାଳନା କରୁଥିବା ବରିଷ୍ଠ ଆଇନଜୀବୀ କପିଲ ଶିବଲ ।
– ୨୨ ତାରିଖ ରାତିରେ ଶିବସେନା-ଏନସିପି ଓ କଂଗ୍ରେସ ମିଳିତ ସାମ୍ବାଦିକ ସମ୍ମିଳନୀ କରି ସରକାର ଗଢିବାକୁ ଦାବି କଲେ
– ଉଦ୍ଧବ ଠାକରେଙ୍କୁ ମେଂଟ ସରକାରର ମୁଖ୍ୟମନ୍ତ୍ରୀ କରିବା ଲାଗି ମଧ୍ୟ ଘୋଷଣା ହୋଇଥିଲା
– କିନ୍ତୁ ଏମିତି କ’ଣ ଜରୁରୀ ପରିସ୍ଥିତି ଉପୁଜିଲା ଯେ, ସକାଳ ୫ଟାରେ ରାଷ୍ଟ୍ରପତି ଶାସନ ଉଚ୍ଛେଦ କରି ଫଡନଭିସଙ୍କୁ ଶପଥପାଠ କରାଗଲା?
ଶିବସେନା-ଏନସିପି ଓ କଂଗ୍ରେସର କହିବା ହେଲା ବିଜେପି ସଂଖ୍ୟାଲଘୁ ସରକାର ହୋଇଥିବାରୁ ପ୍ରଥମେ ସଂଖ୍ୟାଗରିଷ୍ଠତାର ପ୍ରମାଣ କରିବା ପାଇଁ ନିର୍ଦ୍ଦେଶ ଦିଅନ୍ତୁ କୋର୍ଟ । ଏଥିପାଇଁ ଅଧିକ ସମୟ ଦେଲେ ଘୋଡା ବେପାର ହେବାର ଆଶଙ୍କା ରହିଛି । ତେଣୁ ଏନସିପି ପକ୍ଷରୁ ଅଭିଶେକ ମନୁ ସିଂଘଭିଙ୍କ ଯୁକ୍ତି ଥିଲା ।
– ଉଭୟ ପକ୍ଷ ଫ୍ଲୋର ଟେଷ୍ଟ ପାଇଁ ପ୍ରସ୍ତୁତ ଥିବାରୁ ତୁତନ୍ତ ସଂଖ୍ୟା ଗରିଷ୍ଠତାର ପ୍ରମାଣ ପାଇଁ ନିର୍ଦ୍ଦେଶ ଦିଆଯାଉ
– ଏଥିପାଇଁ ପ୍ରୋଟେମ ସ୍ପିକର ନିଯୁକ୍ତି କରିବାକୁ ରାଜ୍ୟପାଳଙ୍କୁ ନିର୍ଦ୍ଦେଶ ଦିଅନ୍ତୁ ସୁପ୍ରିମକୋର୍ଟ
ମହାବିକାଶ ଆଘାଡି ତୁରନ୍ତ ଫ୍ଲୋର ଟେଷ୍ଟ ପାଇଁ ଯୁକ୍ତି କରିଥିବାବେଳେ ଏହାକୁ ବିରୋଧ କରିଥିଲେ ଆଟର୍ଣ୍ଣି ଜେନେରାଲ ମୁକୁଲ ରହତୋଗି । ଏହା ରାଜ୍ୟପାଳଙ୍କ ସାମ୍ବିଧାନିକ ଅଧିକାର ହୋଇଥିବାରୁ ଏଥିରେ କୋର୍ଟ ହସ୍ତକ୍ଷେପ ନକରିବାକୁ ଅନୁରୋଧ କରିଥିଲେ ।
– ଗୃହରେ ସଂଖ୍ୟା ଗରିଷ୍ଠତାର ପ୍ରମାଣ ପାଇଁ ରାଜ୍ୟପାଳ ୧୪ ଦିନର ମହଲତ ଦେଇଛନ୍ତି
– ପ୍ରୋଟେମ ସ୍ପିକର ନିଯୁକ୍ତି ପରେ ବିଧାୟକଙ୍କ ଶପଥ ଗ୍ରହଣ ହେବ ଓ ସ୍ଥାୟୀ ବାଚସ୍ପତି ନିଯୁକ୍ତି ପରେ ସଂଖ୍ୟା ପ୍ରମାଣ ଦିଆଯିବ
ତେବେ ସବୁ ପକ୍ଷର ଜବାବ ସୁଆଲ ଶୁଣିବା ପରେ ସୁପ୍ରିମକୋର୍ଟ ରାୟ ସଂରକ୍ଷିତ ରଖିଛନ୍ତି । ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନଭିସଙ୍କ ନେତୃତ୍ୱଧୀନ ସରକାର କେବେ ସଂଖ୍ୟା ଗରିଷ୍ଠତାର ପ୍ରମାଣ ଦେବେ, ତାହା ମଙ୍ଗଳବାର ଦିନ ସାଢେ ୧୦ଟାରେ ସ୍ଥିର କରିବେ ଦେଶର ସର୍ବୋଚ୍ଚ ନ୍ୟାୟାଳୟ ।