ମହାରାଷ୍ଟ୍ର ସତାରାରେ ଶରଦ ପାୱାରଙ୍କ ଶକ୍ତି ପ୍ରଦର୍ଶନ : ଦଳୀୟ ବିଧାୟକ ଓ ନେତାଙ୍କ ସହ ରାଲି

କନକ ବ୍ୟୁରୋ : ସରଗରମ ହେଲା ମହାରାଷ୍ଟ୍ର ରାଜନୀତି । ପୁନେ ସତାରାରେ ଶରଦ ପାୱାରଙ୍କ ଶକ୍ତି ପ୍ରଦର୍ଶନ । ଦଳୀୟ ବିଧାୟକଙ୍କୁ ନେଇ ଶରଦ ପାୱାର ରାଲି କରିଛନ୍ତି । ସେପଟେ ଅଜିତ ପାୱାରଙ୍କ ଘରେ ଏନସିପି ନେତାଙ୍କ ବୈଠକ । ବରିଷ୍ଠ ନେତା ପ୍ରଫୁଲ୍ଲ ପଟେଲ କହିଲେ, ପୂରା ଏନସିପିର ସମର୍ଥନ ରହିଛି । ଅନ୍ୟପକ୍ଷରେ ପ୍ରଥମେ ଶିବସେନା ଆଉ ଏବେ ଏନସିପିରେ ବିଦ୍ରୋହ । ଏନସିପିରେ ୫୩ ବିଧାୟକ ରହିଥିଲେ । ତେଣୁ ବିଦ୍ରୋହ କରିବା ଏତେ ସହଜ ନଥିଲା ।

ଏଥିପାଇଁ ତତ୍କାଳୀନ ବିରୋଧୀ ଦଳ ନେତା ଅଜିତ ପାୱାର ଦୁଇ ମାସ ହେବ ଗୋପନ ଷଡଯନ୍ତ୍ର କରିଥିଲେ ବୋଲି ସୂଚନା ରହିଛି । ଏଥିପାଇଁ ଦଳର ପ୍ରମୁଖ ନେତାଙ୍କୁ ନିଜ ପଟକୁ ଆଣିବାକୁ ଯୋଜନା କରିଥିଲେ । ଆଉ ଏହି ଯୋଜନା ବାବଦରେ ସେ ମୁଖ୍ୟମନ୍ତ୍ରୀ ଏକନାଥ ସିନ୍ଦେ ଓ ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସଙ୍କୁ ଅବଗତ କରାଉଥିଲେ ।

ଏଥିପାଇଁ ପ୍ରଥମେ ଛଗନ ଭୁଜବଳ ପରେ ଦଳର କାର୍ଯ୍ୟକାରୀ ସଭାପତି ପ୍ରଫୁଲ ପଟେଲଙ୍କୁ ଭିତିରିଆ ନିଜ ପକ୍ଷକୁ ଆଣିଥିଲେ ଅଜିତ ପାୱାର । ଜୁନ ୨୯ ତାରିଖରେ ଫଡନାଭିସ ଓ ଏକନାଥ ସିନ୍ଦେ ଦିଲ୍ଲୀ ଆସିଥିଲେ । ଆଉ ଯୋଜନା ବାବଦରେ ଗୃହମନ୍ତ୍ରୀ ଅମିତ ଶାହଙ୍କୁ ଭେଟି ଅବଗତ କରାଇଥିଲେ । ଆଉ ଶାହ ସଙ୍କେତ ଦେବା ପରେ ବିଦ୍ରୋହ ଆରମ୍ଭ ହୋଇଥିଲା ।