କେବଳ ଭୋକ ପାଇଁ…ଭୋକ ଟାଣିଆଣିଲା ରାସ୍ତାକଡକୁ… କଟକଣାର ଦଉଡି ଫିଟାଇ ପେଟ ପାଇଁ ନାଟ କଲେ ବୃଦ୍ଧା । ୮୫ ବର୍ଷର ବୁଢୀ ମାଆଙ୍କ ଲାଠି ଚାଳନା ଦେଖି ତାଜୁବ ହେଲା ଦେଶ । ଭୋକ ପାଇଁ ଭିକ ନମାଗି କଳା ଦେଖାଇଥିବାରୁ ବୁଢୀ ମାଉସୀଙ୍କୁ କଥା ଦେଲେ ସୋନୁ ସୁଦ୍ । କହିଲେ ମାଉସୀ ! ତମକୁ ନେଇ ମୁଁ ଖୋଲିବି ଆତ୍ମରକ୍ଷାର ଟ୍ରେନିଂ ସେଣ୍ଟର…
କନକ ବ୍ୟୁରୋ: ରାସ୍ତାକଡକୁ ଟାଣି ଆଣିଲା ଭୋକ । ପେଟ ପାଇଁ ନାଟ କଲେ ବୃଦ୍ଧା । ଟୁଇଟ କରି ସୋନୁ ଖୋଜିଲେ ଠିକଣା । ମୁଣ୍ଡ ଉପରେ ଠୋ ଠୋ ଖରା । ଚାରିଆଡେ ଦୋକାନ ବଜାର ବନ୍ଦ । ଆଉ ରାସ୍ତାରେ ଚାଲୁଛି କାଁ ଭାଁ ଗାଡିମଟର । କରୋନା ପାଇଁ ବୟସ୍କ ଲୋକଙ୍କୁ ଘରେ ରହିବାକୁ କୁହାଯାଉଥିବା ବେଳେ ରାସ୍ତାକୁ ଓହ୍ଲାଇ ଆସିଛନ୍ତି ଏ ବୃଦ୍ଧା ଜଣଙ୍କ । ପେଟ ପାଇଁ ଦାନା ଯୋଗାଡ କରିବାକୁ ଫୁଟପାଥକୁ ଆସିଛନ୍ତି ୭୫ ବର୍ଷର ଏ ବୁଢୀମା ଜଣଙ୍କ । ଯେତେବେଳେ ଭୋକର ନିଆଁରେ ପେଟ ପୋଡିବାକୁ ଲାଗିଲା ସେତେବେଳେ ସବୁ କଟକଣାର ଦଉଡି ଛିଡାଇ ଧାଇଁଲେ ଅସହାୟ ବୃଦ୍ଧା ।
Kanak News is now on WhatsApp
Join and get latest news updates delivered to you via WhatsApp
ପୁଣେର ଆଜି ମାଆ ନାଁରେ ସୋସିଆଲ ମିଡିଆରେ ଭାଇରାଲ ହେଉଥିବା ବୃଦ୍ଧା ଭୋକ ଜ୍ୱାଳା ଆଗରେ ନିଜ ବାର୍ଦ୍ଧକ୍ୟ, ଶରୀରର ଥକାପଣକୁ ଆହୁତି ଦେଇଛନ୍ତି । ଆଉ ପେଟ ଚାଖଣ୍ଡେ ପାଇଁ ନାଟ କରୁଛନ୍ତି । ବୃଦ୍ଧା ଜଣଙ୍କ ଚାହିଁଥିଲେ ଭୋକ ଆଗରେ ଆତ୍ମସମର୍ପଣ କରି ଭିକ ମାଗିପାରିଥାନ୍ତେ । ହେଲେ ତାହା ନକରି ରାସ୍ତାକଡରେ କଳାକୌଶଳ ଦେଖାଇ ଟଙ୍କା ମାଗୁଛନ୍ତି । ଭଲରେ ଦେଖନ୍ତୁ କେମିତି ବୁଢିମା ହାତଯୋଡି ପେଟରେ ହାତ ବୁଲାଇ କରୁଣ ଚାହାଣୀରେ ଖାଇବା ମାଗୁଛନ୍ତି । ସତରେ ଏ ଦୃଶ୍ୟ ଯିଏ ବି ଦେଖିବ ତା ଆଖିରେ ଲୁହ ଜକେଇ ଆସିବ ।
ସେପଟେ ସମୟ ଆଗରେ ହାରି ନଯାଇ ସଂଘର୍ଷ କରୁଥିବା ବୁଢି ମାଆଙ୍କ ଏହି ଭିଡିଓ ଭାଇରାଲ ହେବା ପରେ ତାଙ୍କୁ ସାହାଯ୍ୟ କରିବାକୁ ଠିକଣା ଖୋଜିଛନ୍ତି ଶ୍ରମିକଙ୍କ ଭଗବାନ ସୋନୁ ସୁଦ୍ । ଟୁଇଟ୍ କରି ବୁଢିମା ବାବଦରେ ଜାଣିବାକୁ ଚାହିଁଛନ୍ତି ସୋନୁ । ଆଉ ଭୋକ ପାଇଁ ନିଜ ଭିତରର କଳାକୌଶଳ ଦେଖାଇଥିବା ବୃଦ୍ଧାଙ୍କୁ ନେଇ ମଧ୍ୟ ଏକ ସୁନ୍ଦର ସ୍ୱପ୍ନ ଦେଇଛନ୍ତି । ନିଜ ଟୁଇଟରରେ ସୋନୁ ସୁଦ ଲେଖିଛନ୍ତି ବୁଢିମାଆଙ୍କୁ ନେଇ ମୁଁ ଗୋଟେ ସ୍କୁଲ ଖୋଲିବାକୁ ଯାଉଛି । ଯେଉଁଠି ଏ ସେ ମହିଳାମାନଙ୍କୁ ଆତ୍ମରକ୍ଷାର ପାଠ ପଢାଇବେ । ପ୍ରଶିକ୍ଷଣ ଶିବିରରେ ବୁଢିମାଆଙ୍କ ଠାରୁ ମହିଳାମାନେ କଳାକୌଶଳ ଶିଖି ନିଜକୁ ସୁରକ୍ଷା ଦେଇପାରିବେ ।
ତେବେ ଭୋକ ପାଇଁ ରାସ୍ତାକଡରେ ବସିଥିବା ଏ ବୃଦ୍ଧା ଜଣଙ୍କ ୩ଟି ହିନ୍ଦୀ ସିନେମାରେ ମଧ୍ୟ କାମ କରିଥିବା କୁହାଯାଉଛି । ଏଥିସହ ନିଜ ଅଭିନୟ ପାଇଁ ବିଭିନ୍ନ ସ୍ଥାନରୁ ସେ ଅନେକ ସମ୍ମାନ ମଧ୍ୟ ପାଇଥିବା କୁହାଯାଉଛି । କରୋନା ପାଇଁ ସମସ୍ତେ କାମଧନ୍ଦା ହରାଉଥିବାରୁ ବଞ୍ଚିବା ପାଇଁ ବିଭିନ୍ନ ବାଟ ଆପଣାଇବାକୁ ବାଧ୍ୟ ହେଉଛନ୍ତି । କିଏ ଘର ଚଳାଇବାକୁ ରଙ୍ଗମଞ୍ଚରୁ ରାସ୍ତାକଡକୁ ଆସିଛି ତ କିଏ ବଡ ପରଦାରୁ ପରିବାବିକାଳୀ ବନିଛି । ପେଟ ପୋଷିବାକୁ ରିଙ୍କିଙ୍କ ଭଳି ଅଭିନେତ୍ରୀ ଫଳ ବେପାର କରୁଛନ୍ତି ତ କାର୍ତ୍ତିଙ୍କ ଭଳି ଅଭିନେତା ବଲିଉଡରୁ ପରିବାର ବିକାଳି ବନିଛନ୍ତି । ଆଉ ଏ ବୁଢିମା ବି ଦିନେ ଅଭିନେତ୍ରୀ ଥିଲେ ହେଲେ ଆଜି ଭୋକ ପାଇଁ ହାତ ପାତୁଛନ୍ତି ।