କନକ ବ୍ୟୁରୋ: ବିଶ୍ୱର ଶହେ ଦେଶକୁ ୧.୧ ବିଲିୟନ କୋଭିଡ୍ ଟିକା ଯୋଗାଇବ ସେରମ୍ ଇନଷ୍ଟିଚ୍ୟୁଟ୍ । ଏନେଇ ସେରମ୍ ଇନଷ୍ଟିଚ୍ୟୁଟ୍ ଅଫ୍ ଇଣ୍ଡିଆ ଏବଂ ୟୁନିସେଫ୍ ଭିତରେ ବୁଝାମଣାପତ୍ର ସ୍ୱାକ୍ଷର ହୋଇଛି । ଭାରତ ବର୍ତ୍ତମାନ ପରିସ୍ଥିତିରେ ବିଶ୍ୱର ଏକ ଆଗଧାଡିର କୋଭିଡ୍ ଟିକା ନିର୍ମାତା ଦେଶ ହୋଇଥିବାରୁ ଦୁଇ ଅନୁଷ୍ଠାନ ଭିତରେ ଏପରି ବୁଝାମଣା ପତ୍ର ସ୍ୱାକ୍ଷର ହେବା ସମ୍ଭବ ହୋଇପାରିଛି ବୋଲି କୁହାଯାଇଛି ।
ସେରମ୍ ଇନଷ୍ଟିଚ୍ୟୁଟ୍ ବର୍ତ୍ତମାନ ବିଶ୍ୱର ବିଭିନ୍ନ ଦେଶକୁ କୋଭିସିଲ୍ଡ ଟିକା ଯୋଗାଉଛି । ଆଗକୁ କମ୍ପାନୀ ନୋଭାଭାକ୍ସ ଟିକା ମଧ୍ୟ ପ୍ରସ୍ତୁତ କରିବାକୁ ଯାଉଛି । ଯାହାକୁ ବିଶ୍ୱର ଶହେ ଦେଶକୁ ପ୍ରଦାନ କରାଯିବ ।
Kanak News is now on WhatsApp
Join and get latest news updates delivered to you via WhatsApp
ୟୁନିସେଫର କାର୍ଯ୍ୟକାରୀ ନିର୍ଦ୍ଦେଶକ ହେନରିଟା ଫାରେଙ୍କ କହିବା ମୁତାବକ, ସେ ପାନ୍ ଆମେରିକାନ୍ ହେଲଥ୍ ଅନୁଷ୍ଠାନ ଏବଂ ବିଭିନ୍ନ ଅନୁଷ୍ଠାନ ସହ ମିଶି ଏହି ଟିକା ପାଇଁ ଅର୍ଡର ଦେଇଛନ୍ତି । ଏହି ଟିକାକୁ ବିଶ୍ୱର ନିମ୍ନ ଓ ମଧ୍ୟମ ଆୟ କରୁଥିବା ଲୋକଙ୍କୁ ଦିଆଯିବ । ୟୁନିସେଫ୍ ଜରିଆରେ ଏହି ଟିକାକୁ ବଣ୍ଟାଯିବ ।
ସୂଚନାଯୋଗ୍ୟ ଯେ, ବିଶ୍ୱର ଏକ ଆଗଧାଡିର କୋଭିଡ୍ ଟିକା ନିର୍ମାତା କମ୍ପାନି ଭାବେ ସେରମ୍ ଇନଷ୍ଟିଚ୍ୟୁଟ୍ ଅଫ୍ ଇଣ୍ଡିଆ କୋଭିସିଲ୍ଡ ଟିକା ଉତ୍ପାଦନ କରୁଛି । ଆଗାମୀ ଦିନରେ କମ୍ପାନି ନୋଭାଭାକ୍ସ ଟିକା ମଧ୍ୟ ଆଣିବାକୁ ଯାଉଛି । ଭାରତରେ ଏହାର ପରୀକ୍ଷଣ ପାଇଁ କମ୍ପାନି ଅନୁମତି ମାଗିଛି । ପରୀକ୍ଷଣ ଶେଷ ହେବା ପରେ ଏହାର ବ୍ୟବହାର ଆରମ୍ଭ ହେବ ।