ଭୁବନେଶ୍ୱର ପାଇଁ ଭଲ ଖବର । ୫୦ ପ୍ରତିଶତ ଲୋକଙ୍କ ଦେହରେ ସୃଷ୍ଟି ହୋଇସାରିଛି ରୋଗ ପ୍ରତିରୋଧକ ଶକ୍ତି  । ସର୍ଭେ ରିପୋର୍ଟ ସମ୍ପର୍କରେ ସୂଚନା ଦେଲେ ଆରଏମଆରସି ନିର୍ଦେଶିକା ।

କନକ ବ୍ୟୁରୋ: ରାଜ୍ୟରେ କରୋନାରେ ସବୁଠୁ ଅଧିକ ପ୍ରଭାବିତ ହୋଇଥିବା ଭୁବନେଶ୍ୱର ବାସିନ୍ଦାଙ୍କ ପାଇଁ ଭଲ ଖବର ଆସିଛି । ଭୁବନେଶ୍ୱରର ପାଖାପାଖି ୫୦ ପ୍ରତିଶତ ଲୋକଙ୍କଠାରେ ସୃଷ୍ଟି ହୋଇଛି ଆଂଟିବଡି । ଅର୍ଥାତ ଅଧା ଭୁବନେଶ୍ୱରବାସୀ କରୋନା ଭୂତାଣୁ ସଂସ୍ପର୍ଶରେ ଆସି ସୁସ୍ଥ ହୋଇଛନ୍ତି । ତୃତୀୟ ସିରୋ ସର୍ଭେ ରିପୋର୍ଟରୁ ଏହି ଆଶ୍ୱସ୍ତ କଲାଭଳି ତଥ୍ୟ ସାମନାକୁ ଆସିଛି । ଆରଏମଆରସି, ବିଏମସି ଓ ସ୍ୱାସ୍ଥ୍ୟ ବିଭାଗ ମିଳିତ ଭାବେ ସିରୋ ସର୍ଭେ କରିଥିଲେ । ୫୦ ପ୍ରତିଶତ ଲୋକଙ୍କ ଠାରେ ଆଂଟିବଡି ସୃଷ୍ଟି ହୋଇଥିବାରୁ ଭୁବନେଶ୍ୱର ହର୍ଡ ଇମ୍ୟୁନିଟି ଆଡକୁ ଗତି କରୁଛି ବୋଲି କହିଛନ୍ତି ବିଶେଷଜ୍ଞ । ଆଗକୁ କରୋନା ମୁକାବିଲା ନେଇ ସରକାରଙ୍କ ରୋଡମ୍ୟାପ କିପରି ରହିବ, ସ୍ଥିର କରିବ ଏହି ସିରୋ ସର୍ଭେ ରିପୋର୍ଟ ।

କରୋନା ଟିକା ଆସିବା ପୂର୍ବରୁ ଯେଉଁ ଗୋଷ୍ଠୀ ବା ସାମୁହିକ ରୋଗ ପ୍ରତିରୋଧ ଶକ୍ତି ବୃଦ୍ଧି ନେଇ ଅପେକ୍ଷା ରହିଥିଲା, ସେହିଭଳି ସ୍ଥିତି ଆଡକୁ ଇଙ୍ଗିତ କରୁଛି ଭୁବନେଶ୍ୱରର ସିରୋ ସର୍ଭେ ରିପୋର୍ଟ । ଭୁବନେଶ୍ୱରରେ ୧୧ ଲକ୍ଷ ବାସିନ୍ଦା । ସିରୋ ସର୍ଭେ ଅନୁସାରେ ପାଖାପାଖି ୫୦ ପ୍ରତିଶତ ଲୋକଙ୍କ ଶରୀରରେ କରୋନା ଭୂତାଣୁ ବିରୋଧରେ ଲଢ଼ିବା ପାଇଁ ରୋଗ ପ୍ରତିରୋଧ ଶକ୍ତି ସୃଷ୍ଟି ହୋଇଛି । ଅର୍ଥାତ ସାଢ଼େ ୫ ଲକ୍ଷ ଲୋକ କରୋନା ଭୂତାଣୁ ସଂସ୍ପର୍ଶରେ ଆସିଛନ୍ତି ।

ଜୁଲାଇ ୧୧ରେ ଭୁବନେଶ୍ୱରରେ ହୋଇଥିଲା ପ୍ରଥମ ସିରୋ ସର୍ଭେ

୧.୪୨ ପ୍ରତିଶତ ଲୋକଙ୍କ ଶରୀରରେ ଆଂଟିବଡି ଚିହ୍ନଟ ହୋଇଥିଲା

ଅଗଷ୍ଟ ୨୮ରେ ହୋଇଥିଲା ଦ୍ୱିତୀୟ ସିରୋ ସର୍ଭେ

୫.୧ ପ୍ରତିଶତ ଲୋକଙ୍କ ଶରୀରରେ ସୃଷ୍ଟି ହୋଇଥିଲା ଆଂଟିବଡି

ଏବେ ତୃତୀୟ ସିରୋ-ସର୍ଭେ ରିପୋର୍ଟ କହୁଛି ପାଖାପାଖି ୫୦ ପ୍ରତିଶତ ଲୋକ କରୋନା ଭୂତାଣୁ ସଂସ୍ପର୍ଶରେ ଆସିଛନ୍ତି ଏବଂ ସେମାନଙ୍କ ଦେହରେ ଆଂଟିବଡି ସୃଷ୍ଟି ହୋଇଛି । ଏହାର ଆଉ ଏକ ଅର୍ଥ ହେଉଛି ଏବେ ବି ୫୦ ପ୍ରତିଶତ ଲୋକଙ୍କ କରୋନା ଛୁଇଁନାହିଁ । ତେଣୁ କରୋନା କଟକଣା ପୂର୍ବଭଳି ମାନିବା ପାଇଁ ପରାମର୍ଶ ଦେଇଛନ୍ତି ରାଜ୍ୟ ସରକାର ।

ଭୁବନେଶ୍ୱରରେ ୧୧ ଲକ୍ଷ ଲୋକ ରହୁଥିବା ବେଳେ ସାଢ଼େ ୩ ଲକ୍ଷ ଲୋକ ଅର୍ଥାତ୍ ୩୦ ପ୍ରତିଶତ ଲୋକଙ୍କର କରୋନା ପରୀକ୍ଷା ହୋଇଛି । ଶୀତ ଦିନରେ ଥଣ୍ଡା କାଶ ବଢ଼ିବା ଆଶଙ୍କା ଥିବାରୁ ମାସ୍କ ପିନ୍ଧିବା, ହାତ ଧୋଇବା ଓ ସାମାଜିକ ଦୂରତା ରଖିବା ସହ ସାମାନ୍ୟତମ ଲକ୍ଷଣ ଥିଲେ କୋଭିଡ ପରୀକ୍ଷା କରାଇନେବାକୁ ପରାମର୍ଶ ଦିଆଯାଇଛି ।