କାଶ୍ମୀରର ବିଚ୍ଛିନ୍ନତାବାଦୀ ନେତା ସୈୟଦ୍ ଅଲି ଶାହ ଗିଲାନୀଙ୍କ ଦେହାନ୍ତ । କାଶ୍ମୀରରେ ସୁରକ୍ଷା କଡାକଡି । ପାକିସ୍ତାନରେ ଦିନିକିଆ ଶୋକ ଦିବସ ଘୋଷଣା
କନକ ବ୍ୟୁରୋ: କାଶ୍ମୀର ବିଚ୍ଛିନ୍ନତାବାଦୀ ନେତା ସୈୟଦ୍ ଅଲି ଶାହ ଗିଲାନିଙ୍କର ପରଲୋକ ହୋଇଛି । ବୁଧବାର ରାତି ପାଖାପାଖି ସାଢେ ୧୦ଟାରେ ଶ୍ରୀନଗର ହାଇଦରପଡା ବାସଭବନରେ ଦେହାନ୍ତ ହୋଇଯାଇଛି । ମୃତ୍ୟୁ ବେଳକୁ ତାଙ୍କୁ ୯୦ ବର୍ଷ ହୋଇଥିଲା । ଦୀର୍ଘ ୨୦ ବର୍ଷ ଧରି ସେ କିଡନୀ ଜନିତ ସମସ୍ୟାରେ ପୀଡିତ ଥିଲେ । କିଛି ଦିନ ଧରି ଅସୁସ୍ଥତା କାରଣରୁ ଲୋକ ଲୋଚନକୁ ଆସୁନଥିଲେ । ଗିଲାନୀଙ୍କ ମୃୃତ୍ୟୁରେ ପାକିସ୍ତାନରେ ଦିନିକିଆ ଶୋକ ଦିବସ ଘୋଷଣା କରିଛନ୍ତି ଇମ୍ରାନ୍ ସରକାର ।
Kanak News is now on WhatsApp
Join and get latest news updates delivered to you via WhatsApp
ଗିଲାନୀଙ୍କ ମୃତ୍ୟୁ ପରେ କାଶ୍ମୀରରେ ସୁରକ୍ଷା କଡାକଡି କରାଯାଇଛି ।୧୯୨୯ ସେପ୍ଟେମ୍ବର ୨୯ ତାରିଖରେ ଜନ୍ମ ହୋଇଥିବା ଗିଲାନୀ ଭାରତୀୟ କେନ୍ଦ୍ର ଶାସିତ ଅଂଚଳ ଜାମ୍ମୁ-କାଶ୍ମୀରର ବିଚ୍ଛିନ୍ନତାବାଦୀ ନେତା ଥିଲେ । ଜମାତ୍-ଏ- ଇସ୍ଲାମି କାଶ୍ମୀର ଦଳର ସଦସ୍ୟ ରହିବା ସହ ତେହରିକ-ଏ- ହୁରିୟାତ୍ ନାମକ ଦଳ ଗଠନ କରିଥିାଲେ । ସେ କ୍ରମାଗତ ଭାବେ ୧୯୭୨, ୧୯୭୭,୧୯୮୭ରେ ଜାମ୍ମୁ-କାଶ୍ମୀରର ସୋପୋର୍ ନିର୍ବାଚନ ମଣ୍ଡଳୀରୁ ବିଧାୟକ ଭାବେ ନିର୍ବାଚିତ ହୋଇଥିଲେ ।
୨୦୧୦ରେ ବିଭିନ୍ନ ଦଙ୍ଗାରେ ସମ୍ପୃକ୍ତ ଥିବା ନେଇ ତାଙ୍କୁ ବିଦ୍ରୋହୀ ଘୋଷଣା କରାଯିବା ପରେ ସେ ଗୃହବନ୍ଦୀ ଭାବେ ଥିଲେ । ସବୁଠୁ ଗୁରୁତ୍ୱପୂୁର୍ଣ୍ଣ କଥା ହେଲା ସେ ଆତଙ୍କବାଦୀକୁ ସମର୍ଥନ କରୁଥିବାରୁ ଆତଙ୍କବାଦୀଙ୍କୁ ଆର୍ଥିକ ସହାୟତା କରୁଥିବା ଭଳି ଅଭିଯୋଗ ମଧ୍ୟ ତାଙ୍କ ବିରୋଧରେ ଆସିଥିଲା । ୨୦୨୦ରେ ଗିଲାନୀଙ୍କୁ ପାକିସ୍ତାନର ସର୍ବୋଚ୍ଚ ବେସାମରିକ ସମ୍ମାନ’ ନିଶନ-ଏ-ପାକିସ୍ତାନ’ରେ ସମ୍ମାନୀତ କରାଯାଇଥିଲା । ତାଙ୍କର ମୃତ୍ୟୁରେ ପାକିସ୍ତାନରେ ଦିନକ ପାଇଁ ଶୋକ ଦିବସ ଘୋଷଣା କରାଯାଇଛି ।