ରାଉରକେଲାରେ ଗ୍ୟାଙ୍ଗୱାର : ଘର ଆଗରେ ଆଖିବୁଜା ଗୁଳିମାଡ଼ କଲେ ଦୁବୃର୍ତ୍ତ
ଜଣେ ମୃତ, ଜଣେ ଆହାତ; ୮ରୁ ୧୦ ରାଉଣ୍ଡ ଗୁଳିମାଡ଼ ହୋଇଥିବା ସୂଚନା
କନକ ବ୍ୟୁରୋ : ଗ୍ୟାଙ୍ଗୱାରର କରୁଣ ପରିଣତି । ଆଖିବୁଜା ଗୁଳିମାଡରେ ଆହତ ଯୁବକଙ୍କ ମୃତ୍ୟୁ । ରାଉରକେଲାରେ ରେଲୱେ କଲୋନୀରେ ଘଟିଥିଲା ଏହି ଗୁଳିକାଣ୍ଡ । ସୂଚନା ଅନୁସାରେ ଜିତେନ୍ଦ୍ରଙ୍କୁ ପ୍ରଥମେ ଧାରୁଆ ଅସ୍ତ୍ରରେ ଆକ୍ରମଣ କରିବା ପରେ ତାଙ୍କ ଉପରକୁ ୪ରୁ ୫ ରାଉଣ୍ଡ ଗୁଳିମାଡ଼ କରିଥିଲେ ଦୁବୃର୍ତ୍ତ । ଗୁରୁତର ଅବସ୍ଥାରେ ଆଇଜିଏଚ ଆଇସିୟୁରେ ଯୁବକଙ୍କୁ ଭର୍ତ୍ତି କରାଯାଇଥିଲା । ହେଲେ ବିଳମ୍ବିତ ରାତିରେ ତାଙ୍କର ମୃତ୍ୟୁ ହୋଇଛି । ଆକ୍ରମଣରେ ଜିତେନ୍ଦ୍ରଙ୍କ ଜଣେ ସମ୍ପର୍କୀୟ ମଧ୍ୟ ସାମାନ୍ୟ ଆହତ ହୋଇଥିଲେ ।
Kanak News is now on WhatsApp
Join and get latest news updates delivered to you via WhatsApp
ରାତି ଅଧିଆ ସାମ୍ବାଦିକ ସମ୍ମିଳନୀ କରି ଏସ୍ପି ଏହି ସୂଚନା ଦେଇଛନ୍ତି। ସେ କହିଛନ୍ତି ଗୁଳିକାଣ୍ଡ ଘଟଣାରେ ଅମିତ ନାମକ ଯୁବକକୁ ଅଟକ ରଖାଯାଇଛି। ଅନ୍ୟ ୪ ଯୁବକ ଫେରାର ଅଛନ୍ତି । ସେମାନଙ୍କୁ ଖୁବ୍ଶୀଘ୍ର ଧରାଯିବ ବୋଲି ଶ୍ରୀ ଭାମୁ କହିଛନ୍ତି । ସେପଯେ ଘଟଣାସ୍ଥଳରେ ସାଇଣ୍ଟିଫିକ୍ ଟିମ୍ ସହ ଅତିରିକ୍ତ ଏସ୍ପି ସଂଗ୍ରାମ କେଶରୀ ବେହେରା ଓ ପ୍ଲାଣ୍ଟସାଇଟ୍ ପୁଲିସ ଅଧିକାରୀମାନେ ଘଟଣାସ୍ଥଳ ଓ ଆଇଜିଏଚ୍ରେ ପହଞ୍ଚି ଘଟଣାର ତଦନ୍ତ ଚଳାଇଛନ୍ତି । ସେପଟେ ଗୁଳିମାରି ଫେରାର ହୋଇ ଯାଇଥିବା ଯୁବକମାନଙ୍କୁ ଧରିବାକୁ ପୁଲିସ ସହରର ପ୍ରମୁଖ ଛକ ଓ ବାହାର ରାଜ୍ୟକୁ ସଂଯୋଗ କରୁଥିବା ରାସ୍ତାକୁ ସିଲ୍ କରି ଯାଞ୍ଚ ଚଳାଇଛି ।
ଜିତେନ୍ଦ୍ର ସାହା ପରିବାର ସହ ରେଲୱେ କଲୋନି ରିମ୍ଝିମ୍ ବସ୍ତିରେ ରହନ୍ତ। ସ୍ଥାନୀୟ ଲୋକଙ୍କ କହିବାମୁତାବକ, ସନ୍ଧ୍ୟା ପ୍ରାୟ ସାଢ଼େ ୭ଟାରେ ଘରେ ଆଗରେ ଗଣେଶ ପୂଜା ହେଉଥିବାରୁ ଜିତେନ୍ଦ୍ର, ତାଙ୍କ ମାଉସୀ ଲକ୍ଷ୍ମୀ ଦେବୀ ଓ ପରିବାର ଅନ୍ୟ ସଦସ୍ୟମାନେ ସେଠାରେ ଛିଡା ହୋଇଥିଲେ । ହଠାତ୍ ୩ଟି ମୋଟରବାଇକ୍ରେ ୫-୬ ଜଣ ଯୁବକ ପହଞ୍ଚି ଜିତେନ୍ଦ୍ରଙ୍କ ଉପରକୁ ଆଖିବୁଜା ଗୁଳି ଚଳାଇ ସେଠାରୁ ଫେରାର ହୋଇଯାଇଥିଲେ । ଜିତେନ୍ଦ୍ରଙ୍କ ହାତ, ଛାତି, କାନ୍ଧ ଓ ପାଖରେ ଛିଡା ହୋଇଥିବା ଲକ୍ଷ୍ମୀ ଦେବୀଙ୍କ ଗୋଡରେ ଗୁଳି ବାଜିବାରୁ ଦୁହେଁ ବେହୋସ ହୋଇ ତଳେ ପଡିଯାଇଥିଲେ ।
ଉଲ୍ଲେଖନୀୟ ଯେ ଗତ ୨୦୨୦ ଜୁନ୍ ୭ ରେଲୱେ କଲୋନି ବଡ ପାର୍କରେ ଦିଲ୍ସାଦ୍ ଖାନ ହତ୍ୟା ଘଟଣାରେ ଜିତେନ୍ଦ୍ର ଗିରଫ ହୋଇ ଜେଲ ଯାଇଥିଲେ। ଏହା ପୂର୍ବରୁ ବାସନ୍ତୀ କଲୋନିରେ ପୂର୍ବତନ କାଉନ୍ସିଲ୍ର ବୁଲୁ ମହାନ୍ତିଙ୍କୁ ଦିଲ୍ସାଦ୍ ଖାନ୍ ଓ ତାଙ୍କର କିଛି ସହଯୋଗୀ ବୋତଲବୋମା ଫିଙ୍ଗି ହତ୍ୟା ଉଦ୍ୟମ କରିଥିଲେ। ମାତ୍ର ବୁଲୁ ମହାନ୍ତି ଅଳ୍ପକେ ବର୍ତ୍ତି ଯାଇଥିଲେ। ଉଲ୍ଳେଖଯୋଗ୍ୟ, ଦିଲ୍ସାଦ୍ ଖାନ୍ ହତ୍ୟା ଘଟଣାରେ ଜିତେନ୍ଦ୍ର ଓ ସରୋଜଙ୍କ ସମେତ ୯ରୁ ଅଧିକ ଅଭିଯୁକ୍ତଙ୍କୁ ପ୍ଲାଣ୍ଟସାଇଟ୍ ପୁଲିସ ଗିରଫ କରି କୋର୍ଟ ଚାଲାଣ କରିଥିଲା। କିଛି ମାସ ଜେଲ୍ରେ ରହିବାପରେ ସେ ଜାମିନରେ ଆସିଛନ୍ତି। ଦିଲ୍ସାଦ ଓ ଜିତେନ୍ଦ୍ର ଦୁଇ ଗୋଷ୍ଠୀ ମଧ୍ୟରେ ପୂର୍ବ ଥିବା ଶତ୍ରୁତାର ପ୍ରତିଶୋଧ ନେବାକୁ ମୁଖ୍ୟ ଅଭିଯୁକ୍ତ ଓ ତା’ର ସହଯୋଗୀମାନେ ପିଟି ପିଟି ଦିଲ୍ସାଦ ଖାଁଙ୍କୁ ହତ୍ୟା କରିଥିଲେ ବୋଲି ତତ୍କାଳୀନ ରାଉରକେଲା ଏସ୍ପି କେ. ଶିବା ସୁବ୍ରମଣି ଆୟୋଜିତ ସାମ୍ବାଦିକ ସମ୍ମିଳନୀରେ କହିଥିଲେ ।