୧୯ କୁରୁକ୍ଷେତ୍ର ପାଇଁ ବିଜେପିକୁ ଲୋଡ଼ା ବିଜୟଙ୍କ ସାଥ୍ । ବିଜୟଙ୍କୁ ଘର ବାହୁଡା଼ଇବା ପାଇଁ ଆଜି ରାତିରେ ବସିବ ଚୂଡ଼ାନ୍ତ ବୈଠକ ।
କନକ ବ୍ୟୁରୋ: ନିର୍ବାଚନ ତାରିଖ ଯେତେ ପାଖଉଛି ରାଜନୀତି ପାଣିପାଗ ସେତେ ବଦଳିବାରେ ଲାଗିଛି । ଆଉ ରାଜନୀତି ସମୀକରଣ କେତେବେଳେ କ’ଣ ହେବ ତାହା ଆକଳନ କରିବା ମୁସ୍କିଲ । ଏହାର ଉଦାହରଣ ହେଉଛି ଯେ, ନିକଟରେ ବିଜେପିକୁ ବାଏ ବାଏ କହିଥିବା ରାଜ୍ୟ ରାଜନୀତିର ଟାଣୁଆ ନେତା ବିଜୟ ମହାପାତ୍ର ପୁଣି ଘର ବାହୁଡ଼ିବେ ବୋଲି ଶୁଣିବାକୁ ମିଳୁଛି । ଆଉ ବିଜୟଙ୍କୁ ମନାଇବା ପାଇଁ ଆଜି ରାତିରେ ଚୂଡ଼ାନ୍ତ ବୈଠକ ବସିବ ବୋଲି ଚର୍ଚ୍ଚା ହେଉଛି । ଏପରିକି ବିଜେପିକୁ ପୁଣି ବିଜୟ ଫେରିବେ କି ନାହିଁ ତାକୁ ନେଇ ରାଜ୍ୟ ବିଜେପି ହେଭିୱେଟ୍ ଆଜି ରାତିରେ ଗୁପ୍ତମନ୍ତ୍ରଣା କରିବେ । ଏହାପରେ ବିଜୟଙ୍କୁ ବିଜେପି ଫେରାଇ ଆଣିବ ନା ନାହିଁ ତାହା ସ୍ପଷ୍ଟ ହୋଇଯିବ ।
Kanak News is now on WhatsApp
Join and get latest news updates delivered to you via WhatsApp
ଗତ କିଛି ଦିନ ତଳେ ଓଡ଼ିଶା ବିଜେପି ପ୍ରଭାରୀ ଅରୁଣ ସିଂ କହିଥିଲେ ବିଜୟ ଏବଂ ଦିଲୀପ ଉଭୟ ବିଜେପିକୁ ଫେରିବେ ଏହାପରେ ରାଜ୍ୟରାଜନୀତିରେ ଅଙ୍କକଷା ଆରମ୍ଭ ହୋଇଯାଇଛି । ୨୦୧୯ ନିର୍ବାଚନୀ କୁରୁକ୍ଷେତ୍ରରେ ବିଜୟ ହାସଲ କରିବା ପାଇଁ ବିଜେପିକୁ ଲୋଡ଼ା ବିଜୟଙ୍କ ସାଥ୍ । ତେଣୁ ପୂର୍ବରୁ କୋଣଠେସା କରିଥିବା ଏହି ଟାଣୁଆ ନେତାଙ୍କୁ ମନାଇବା ପାଇଁ ବଳ କଷୁଛି ବିଜେପି । ଏପରିକି ରାଜ୍ୟ ଓ କେନ୍ଦ୍ରୀୟ ନେତୃବୃନ୍ଦ ବିଜୟଙ୍କ ସହ ଯୋଗାଯୋଗରେ ରହିଥିବା ଚର୍ଚ୍ଚା ହେଉଥିଲା । ସେପଟେ ରାଜ୍ୟ ବିଜେପି ମୁଖପାତ୍ର ଗୋଲକ ମହାପାତ୍ର ମଧ୍ୟ ବିଜେପିକୁ ବିଜୟ ଫେରିବା ନେଇ ଦେଇଥିବା ବୟାନ ହଟଚମଟ ସୃଷ୍ଟି କରିଥିଲା । ଗୋଲକ କହିଥିଲେ ଯେ, ବିଜୟ ବାବୁ ଇସ୍ତଫା ଦେଇଥିଲେ ମଧ୍ୟ ଦଳ ତାଙ୍କ ଇସ୍ତଫା ପତ୍ରକୁ ଗ୍ରହଣ କରିନାହିଁ । ତେଣୁ ଖୁବଶୀଘ୍ର ଭଲ ଖବର ଶୁଣିବେ ବୋଲି କହିଥିଲେ ଗୋଲକ ।
ବିଜେପି ଛାଡିବା ୨ ମାସରୁ ଅଧିକ ସମୟ ବିତିଯାଇଥିଲେ ମଧ୍ୟ ବିଜୟ ମହାପାତ୍ର ଏବଂ ଦିଲୀପ ରାୟ ଅନ୍ୟ କୌଣସି ଦଳରେ ଯୋଗ ଦେଇନାହାନ୍ତି । ଦିଲୀପ ରାୟ ବିଜେଡିରେ ଯୋଗଦେବା ନେଇ କୋଣସି ଅସୁବିଧା ନଥିଲାବେଳେ ବିଜୟ ମହାପାତ୍ରଙ୍କୁ ନେଇ ଗୋଟିଏ ଗୋଷ୍ଠୀ ବିରୋଧ କରୁଛନ୍ତି । ଫଳରେ ଉଭୟ ବିଜେଡିରେ ଯୋଗ ଦେବା ସମ୍ଭବ ହୋଇପାରୁନାହିଁ । ତେଣୁ ଉଭୟ ନେତା ପୁଣି ବିଜେପିକୁ ପ୍ରତ୍ୟାବର୍ତ୍ତନ ପାଇଁ ଚିନ୍ତା କରୁଥିବା ଚର୍ଚ୍ଚା ହେଉଛି । ଯାହାର ସ୍ପଷ୍ଟ ଚିତ୍ର ଆଜି ରାତି ସୁଦ୍ଧା ଜଣାପଡ଼ିବ ବୋଲି ଚର୍ଚ୍ଚା ହେଉଛି ।