କନକ ବ୍ୟୁରୋ: ବିଜୟ, ଦିଲୀପ ଓ ସାରଦାଙ୍କୁ ନେଇ ସରଗରମ ରାଜ୍ୟ ରାଜନୀତି । ବେଶ କିଛି ଦିନ ନୀରବ ରହିବା ପରେ ବିଜୟ ମୁହଁ ଖୋଲି କହିଛନ୍ତି କେଉଁ ଦଳରେ ଯୋଗ ଦେବେ ସେନେଇ ଖୁବଶୀଘ୍ର ନିଷ୍ପତି ନେବେ । ତେବେ ଓଡିଶାରେ ୨୦୧୯ ନିର୍ବାଚନ ବେଶ ଜଟିଳ ହେବ ବୋଲି କହିଛନ୍ତି ବିଜୟ । ସେପଟେ ଗତକାଲି ନବୀନ ନିବାସରେ ମୁଖ୍ୟମନ୍ତ୍ରୀଙ୍କୁ ଭେଟିବା ପରେ ଦିଲୀପ ରାୟ ବିଜେଡିରେ ଯୋଗଦେବା ନେଇ ଜୋର ଧରିଛି ଚର୍ଚ୍ଚା । ଯଦି ଦିଲୀପ ରାଉରକେଲାରୁ ବିଧାୟକ ପ୍ରାର୍ଥୀ ହୁଅନ୍ତି ତେବେ ପ୍ରଶ୍ନ ଉଠୁଛି ସାରଦା କରିବେ କଣ । ଯାହାକୁ ନେଇ ରାଉରକେଲା ରାଜନୀତି ଉଠୁଛି ପଡୁଛି ।
Kanak News is now on WhatsApp
Join and get latest news updates delivered to you via WhatsApp
ନବୀନ ନିବାସରେ ଦିଲୀପ ରାୟ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଭେଟିବାକୁ ନେଇ ଯେତିକି ଚର୍ଚ୍ଚା, ବିଜୟ ମହାପାତ୍ରଙ୍କ ମଧ୍ୟ ଆଗାମୀ ପଦ କ୍ଷେପ କଣ ହେବ ତାକୁ ନେଇ ସେତିକି ଚର୍ଚ୍ଚା । ଦୀର୍ଘଦିନର ନିରବତା ଭାଙ୍ଗି ବିଜୟ କହିଛନ୍ତି, କେଉଁ ଦଳରେ ଯୋଗ ଦେବେ ସେ ନେଇ କିଛି ନିଷ୍ପତି ନେଇନାହାନ୍ତି । ତେବେ ଖୁବଶୀଘ୍ର ଏନେଇ ନିଷ୍ପତି ନେବେ । ବିଜେଡିରୁ କେହି ତାଙ୍କ ସହ ଯୋଗାଯୋଗ କରିନାହାନ୍ତି ବୋଲି କହିଛନ୍ତି ବିଜୟ । ବିଜୟ ଆହୁରି ମଧ୍ୟ କହିଛନ୍ତି ଓଡିଶାରେ ୨୦୧୯ ନିର୍ବାଚନ ଏକ ଜଟିଳ ନିର୍ବାଚନ ହେବ ।
ଗତକାଲି ସନ୍ଧ୍ୟାରେ ଦିଲୀପ ରାୟ ପହଂଚିଥିଲେ ନବୀନ ନିବାସରେ । ଆଉ ନବୀନ ନିବାସରେ ଦିଲୀପ ନବୀନଙ୍କ ସହିତ ଆଲୋଚନା କରିଥିଲେ । ଦୀର୍ଘ ୧୭ବର୍ଷ ପରେ ଦିଲୀପ ରାୟ ଓ ନବୀନ ପଟ୍ଟନାୟକଙ୍କ ଏହି ଆଲୋଚନା ବର୍ତମାନର ରାଜନୈତିକ ଦୃଶ୍ୟପଟରେ ବେଶ ଗୁରୁତ୍ୱପୂର୍ଣ୍ଣ ମନେ କରାଯାଉଛି । ଏହି ସାକ୍ଷାତ ପରେ ଦିଲୀପ ବିଜେଡିରେ ମିଶିବା ନେଇ ଚର୍ଚ୍ଚା ହେଉଥିଲେ ବି ଆଜି ଦିନ ତମାମ ସେନେଇ କୌଣସି ଖବର ଆସିନଥିଲା ।
ଦିଲ୍ଲୀପ ରାୟଙ୍କ ଏହି ଆଲୋଚନା ପରେ ସାରଦା ନାୟକଙ୍କୁ ନେଇ ଚର୍ଚ୍ଚା । ଟିକେଟ ରେସରେ ଥିବା ସାରଦା ଆଜି ନବୀନ ନିବାସରେ ମୁଖ୍ୟମନ୍ତ୍ରୀଙ୍କୁ ଭେଟି ଅଭିପ୍ରାୟ ଜଣାଇସାରିଛନ୍ତି । ସାରଦା କହିଛନ୍ତି ସେ ନବୀନଙ୍କ ପାଇଁ କାମ କରୁଛନ୍ତି, ଦିଲୀପଙ୍କ ସହ ତାଙ୍କର ଲଢେଇ ହେବ ନାହିଁ । ଦଳୀୟ ସୁପ୍ରିମୋ ଯାହା ନିଷ୍ପତି ନେବେ ସେଥିରେ ସେ ରାଜି । ସେ ଆହୁରି କହିଛନ୍ତି , ସାରଦା କି ଦିଲୀପ ନୁହେଁ ଲୋକେ ନବୀନଙ୍କୁ ଗ୍ରହଣ କରିଛନ୍ତି । ତେବେ ବର୍ତ୍ତମାନ ଏହି ରାଜନୈତିକ ଘଟଣାବଳି ଆଗକୁ କି ମୋଡ ନେଉଛି ତାହା ଉପରେ ସମସ୍ତଙ୍କ ନଜର ରହିଛି ।