ଓଡିଶାରେ ପୁଣି ବିରଳ କିଡନୀ ଅସ୍ତ୍ରୋପଚାର । ବ୍ରେନଡେଡ୍ ଘୋଷିତ ସୁଚିତ୍ରାଙ୍କ କିଡନୀ ୨ ଜଣଙ୍କଠାରେ ପ୍ରତିରୋପଣ । ହେଲେ ଫେଲ୍ ମାରିଲା ହୃତପିଣ୍ଡ ଓ ଯକୃତ ଟ୍ରାନ୍ସପ୍ଲାଂଟ
ଆଜି ସ୍ୱର୍ଗଦ୍ୱାରରେ ଶେଷକୃତ୍ୟ
କନକ ବ୍ୟୁରୋ: ଓଡିଶାରେ ପୁଣି ବିରଳ କିଡନୀ ଅସ୍ତ୍ରୋପଚାର । କିଛିଦିନର ବ୍ୟବଧାନ ପରେ ଓଡିଶାରେ ପୁଣି ଏକ କାଡାଭେରିକ କିଡନୀ ପ୍ରତିରୋପଣ ହୋଇଛି । ସୁଚିତ୍ରା ଦାସ ନାମକ ଜଣେ ୫୬ ବର୍ଷିୟ ମହିଳାଙ୍କ କିଡନୀ ଅନ୍ୟ ଦୁଇଜଣଙ୍କଠାରେ ପ୍ରତିରୋପଣ କରାଯାଇଛି । ଭୁବନେଶ୍ୱରର ଆପୋଲୋ ହସ୍ପିଟାଲ ଏବଂ ଆମ୍ରି ହସ୍ପିଟାଲରେ ହୋଇଛି ଏହି ଅପରେସନ । ଆପୋଲୋ ହସ୍ପିଟାଲର ଏକ ସ୍ୱତନ୍ତ୍ର ଆମ୍ବୁଲାନ୍ସରେ ଗୋଟିଏ କିଡନୀ ଆମ୍ରି ହସ୍ପିଟାଲ ପହଂଚି ଥିବା ବେଳେ ଆପୋଲୋ ହସ୍ପିଟାଲରେ ଆଉ ଗୋଟିଏ କିଡନୀ ଅପରେସନ କରି ପ୍ରତିରୋପଣ କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଭୁବନେଶ୍ୱର ପୋଖରୀପୁଟ ଅଂଚଳର ସୁଚିତ୍ରା ଦାସ ଚିକିତ୍ସାଧିନ ଅବସ୍ଥାରେ ପ୍ରାଣ ହରାଇବା ପରେ ତାଙ୍କର ଦୁଇଟି କିଡନୀକୁ ଆବଶ୍ୟକ କରୁଥିବା ରୋଗୀଙ୍କ ଦେହରେ ପ୍ରତିରୋପଣ କରାଯାଇଛି । ଗତ ୨୩ ତାରିଖରେ ଦୁର୍ଘଟଣାରେ ଗୁରୁତର ସୁଚିତ୍ରାଙ୍କୁ ଆପୋଲୋ ହସପିଟାଲରେ ଭର୍ତି କରାଯାଇଥିଲା । ଆପୋଲୋ ହସ୍ପିଟାଲରେ ଚିକିତ୍ସାଧିନ ଥିବା ବେଳେ ସୁଚିତ୍ରା ଦାସଙ୍କ ବ୍ରେନ ଡେଡ ଘୋଷଣା କରିଥିଲେ ଡାକ୍ତର । ଏହା ପରେ ପରିବାର ଲୋକ ଅଙ୍ଗଦାନ ପାଇଁ ନିଷ୍ପତି ନେଇଥିଲେ । ପରେ ଡାକ୍ତରଖାନା କର୍ତ୍ତୃପକ୍ଷ ଏହାର ପ୍ରକିୟା ଆରମ୍ଭ କରିଥିଲେ । ସୁଚିତ୍ରାଙ୍କ ଗୋଟିଏ କିଡନୀ ଆପୋଲୋରେ ହିଁ ଜଣେ ରୋଗୀଙ୍କ ଦେହରେ ପ୍ରତିରୋପଣ ହୋଇଥିଲା । ଆଉ ଗୋଟିଏ କିଡନୀକୁ ଆମ୍ରି ହସପିଟାଲ ନିଆଯାଇଥିଲା ।
ବଡକଥା ହେଉଛି, ସ୍ୱତନ୍ତ୍ର ଆମ୍ବୁଲାନ୍ସରେ ସୁରକ୍ଷିତ ଭାବେ ଆପୋଲୋ ହସ୍ପିଟାଲରୁ ଆମ୍ରି ହସ୍ପିଟାଲକୁ ଏହି କିଡନୀ ନିଆଯାଇଥିଲା । ସେଠାରେ ଜଣେ ରୋଗୀଙ୍କ ଦେହରେ ଏହି କିଡନୀ ପ୍ରତିରୋପଣ କରାଯାଇଛି । ତେବେ ଉଭୟ ଅପରେସନ ସଫଳ ହୋଇଛି କି ନାହିଁ ତାହା ଆଉ କିଛି ସମୟ ପରେ ଡାକ୍ତର ସ୍ପଷ୍ଟ କରିବେ । ଏହାରି ଭିତରେ କିନ୍ତୁ ସୁଚିତ୍ରାଙ୍କ ହୃତପିଣ୍ଡ ଓ ଯକୃତକୁ ମଧ୍ୟ ରାଜ୍ୟ ବାହାରେ ରୋଗୀଙ୍କ ଠାରେ ପ୍ରତିରୋପଣ ପାଇଁ ଡାକ୍ତର ଉଦ୍ୟମ କରିଥିଲେ । ତେବେ ତାହା ସଫଳ ହୋଇପାରିନାହିଁ । କିଛି ଦିନ ପୂର୍ବରୁ କଟକ ବଡ ମେଡିକାଲ ଓ ଆପୋଲୋରେ ସମାନ ଢଙ୍ଗରେ ଗଂଜାମର ୨୨ ବର୍ଷିୟ ପ୍ରିୟଙ୍କାଙ୍କ ଅଙ୍ଗଦାନ ସହ କିଡନୀ ପ୍ରତ୍ୟାରୋପଣ କରାଯାଇଥିଲା । ସେହି ସମୟରେ ମଧ୍ୟ ଭୁବନେଶ୍ୱର ଆପୋଲୋ ହସ୍ପିଟାଲରୁ କଟକ ବଡମେଡିକାଲକୁ ସ୍ୱତନ୍ତ୍ର ଆମ୍ବୁଲାନ୍ସରେ କିଡନୀ ସ୍ଥାନାନ୍ତର କରାଯାଇଥିଲା । ତେବେ ଆପୋଲୋରେ ହୋଇଥିବା ରାଜ୍ୟର ଦ୍ୱିତୀୟ କାଡାଭେରିକ କିଡନୀ ପ୍ରତିରୋପଣ ସଫଳ ହୋଇଥିବାରୁ ବିଭିନ୍ନ ମହଲରୁ ପ୍ରଶଂସାର ସୁଅ ଛୁଟିଛି ।