ଲକଡାଉନରେ କାମ କରିଥିବା କର୍ମଚାରୀଙ୍କୁ ମିଳିବ ଅତିରିକ୍ତ ଦରମା: ଏସବିଆଇରେ କାମ କରୁଥିବା କର୍ମଚାରୀ ପାଇବେ ଅଧିକ ବେତନ

କନକ ବ୍ୟୁରୋ: ଲକଡାଉନ ପାଇଁ ସାରା ଦେଶରେ ତାଲା ପଡ଼ିଥିବାରୁ କାର୍ଯ୍ୟାଳୟ, ବିଦ୍ୟାଳୟ, ବଜାର, ଦୋକାନ, ମଲ୍, ରେଷ୍ଟୁରାଣ୍ଟ ଇତ୍ୟାଦି ସବୁ ବନ୍ଦ ରହିଛି। ତେବେ ବ୍ୟାଙ୍କଗୁଡିକ ସେମାନଙ୍କ କାର୍ଯ୍ୟକୁ ସୁରୁଖୁରୁରେ କରିବାକୁ କୁହାଯାଇଛି ଯାହା ଦ୍ୱାରା ଲୋକମାନେ ଲକଡାଉନ୍ ହେତୁ କୌଣସି ଆର୍ଥିକ ସମସ୍ୟାର ସମ୍ମୁଖୀନ ହେବେ ନାହିଁ । ବ୍ୟାଙ୍କର କର୍ମଚାରୀମାନେ ମଧ୍ୟ ଅବିରତ ସେମାନଙ୍କର ସେବା ଯୋଗାଉଛନ୍ତି। ଏଭଳି ପରିସ୍ଥିତିରେ ଷ୍ଟେଟ୍ ବ୍ୟାଙ୍କ ଅଫ୍ ଇଣ୍ଡିଆ ଏହାର କର୍ମଚାରୀଙ୍କ ପାଇଁ ଏକ ବଡ ଘୋଷଣା କରିଛି।

ଦେଶର ସର୍ବବୃହତ ବ୍ୟାଙ୍କ ଷ୍ଟେଟ୍ ବ୍ୟାଙ୍କ ଅଫ୍ ଇଣ୍ଡିଆ ଲକଡାଉନରେ କାମ କରୁଥିବା ବ୍ୟାଙ୍କ କର୍ମଚାରୀଙ୍କୁ ଏକ ଖୁସି ଖବର ଦେଇଛି। ଏହାର କର୍ମଚାରୀମାନଙ୍କ ପାଇଁ ଏକ ପଦକ୍ଷେପ ଗ୍ରହଣ କରି ବ୍ୟାଙ୍କ ସେମାନଙ୍କୁ ଅତିରିକ୍ତ ଦରମା ଦେବାକୁ ନିଷ୍ପତ୍ତି ନେଇଛି। ଏସବିଆଇରେ କାମ କରୁଥିବା କର୍ମଚାରୀମାନେ ଚଳିତ ମାସ ଆରମ୍ଭ ଅପେକ୍ଷା ଅଧିକ ବେତନ ପାଇବେ।

ଷ୍ଟେଟ ବ୍ୟାଙ୍କ ଅଫ୍ ଇଣ୍ଡିଆ ଏକ ସର୍କୁଲାର ଜାରି କରି ଏହା ଘୋଷଣା କରିଛି। ବ୍ୟାଙ୍କ ଏକ ସର୍କୁଲାର ଜାରି କରି କହିଛି ଯେ ଯେଉଁମାନେ ଲକଡାଉନ୍ ସମୟରେ ବ୍ୟାଙ୍କର ଶାଖାରେ କାମ କରନ୍ତି ସେମାନଙ୍କୁ ପ୍ରତି ଛଅ ଦିନର କାମ ପାଇଁ ଗୋଟିଏ ଦିନ ଅତିରିକ୍ତ ବେତନ ଦିଆଯିବ । ଏଠାରେ ସୂଚନା ଥାଉ କି କରୋନା ପାଇଁ ୨୩ ମାର୍ଚ୍ଚରୁ ୧୪ ଏପ୍ରିଲ ପର୍ଯ୍ୟନ୍ତ ଲକଡାଉନ୍ ଘୋଷଣା କରାଯାଇଛି।