ଏପ୍ରିଲ ୨୦ ପରେ ସର୍ତ୍ତମୂଳକ କଟକଣା ମୁକ୍ତ ହେବ ନିର୍ମାଣ କାର୍ଯ୍ୟ । ସତର୍କତା ପାଇଁ ଗାଇଡଲାଇନ୍ ଜାରି, ସମସ୍ତ ଜିଲ୍ଳାପାଳଙ୍କୁ ଚିଠି ଲେଖିଲେ ଏସଆରସି, ସେପଟେ ସହରାଂଚଳର ଶ୍ରମିକଙ୍କ ପାଇଁ ୧୦୦ କୋଟି ଟଙ୍କାର ଯୋଜନା ଘୋଷଣା କଲେ ମୁଖ୍ୟମନ୍ତ୍ରୀ ।
କନକ ବ୍ୟୁରୋ: କରୋନା ମୁକାବିଲା ପାଇଁ ମେ ୩ ତାରିଖ ପର୍ଯ୍ୟନ୍ତ ଲକଡାଉନ ବଢ଼ିବା ପରେ ଶ୍ରମିକ ଶ୍ରେଣୀକୁ ଫୋକସ କରିଛନ୍ତି ସରକାର । ଦିନ ମଜୁରିଆଙ୍କ ରୋଜିରୋଟି ପାଇଁ କିଛି ସର୍ତ ସହ ନିର୍ମାଣ କାର୍ଯ୍ୟକୁ ଅନୁମତି ଦେଇଛନ୍ତି ସରକାର । ୧୨ ସୂତ୍ରୀ ରଣନୀତି ସହିତ ଉଭୟ ସରକାରୀ ଓ ବେସରକାରୀ ସ୍ତରରେ କାର୍ଯ୍ୟକୁ ଆଗକୁ ବଢ଼ାଇବା ପାଇଁ ଜାରି ହୋଇଛି ଗାଇଡଲାଇନ୍ ।
Kanak News is now on WhatsApp
Join and get latest news updates delivered to you via WhatsApp
ଉଭୟ ସରକାରୀ ଏବଂ ବେସରକାରୀ ନିର୍ମାଣ କାର୍ଯ୍ୟ ସମୟରେ କରୋନା ସଂକ୍ରମଣ ରୋକିବା ପାଇଁ ଜାରି ହୋଇଛି ସ୍ୱତନ୍ତ୍ର ନିର୍ଦ୍ଦେଶାବଳୀ । ଏହାକୁ ମାନି ନିର୍ମାଣ କାର୍ଯ୍ୟ ଚାଲୁ ରଖିବାକୁ ରାଜ୍ୟର ସମସ୍ତ ଜିଲ୍ଳାପାଳଙ୍କୁ ନିର୍ଦ୍ଦେଶ ଦିଆଯାଇଛି
ରାଜ୍ୟ ବିପର୍ଯ୍ୟୟ ପରିଚାଳନା ବିଭାଗ ଦ୍ୱାରା ଜାରି ହୋଇଥିବା ଗାଇଡଲାଇନ ଅନୁସାରେ
– ନିର୍ମାଣ କାର୍ଯ୍ୟ ଚାଲିଥିବା ବେଳେ ସମସ୍ତ ଶ୍ରମିକ ଓ କର୍ମଚାରୀ ସାମାଜିକ ଦୂରତା ରକ୍ଷା କରିବେ
– ନିର୍ମାଣ ସ୍ଥାନରେ କାର୍ଯ୍ୟ କରୁଥିବା ସମୟରେ ମାସ୍କ ପିନ୍ଧିବା ଜରୁରୀ
– ବାହାରୁ ଆସୁଥିବା ଶ୍ରମିକଙ୍କ ପାଇଁ ଠିକାଦାର ବା ନିର୍ମାଣ ସଂସ୍ଥା ସ୍ୱତନ୍ତ୍ର ପରିବହନ ବ୍ୟବସ୍ଥା କରିବେ
– କାମ କରିବା ଜାଗା, ଶୋଇବା ଘର ଏବଂ ଭୋଜନ କରିବା ଜାଗାରେ ସାମାଜିକ ଦୂରତା ନିୟମ ମାନିବେ
– ଶ୍ରମିକମାନେ ଏକାଠି ବସିବା ବା ନିକଟତର ହେବାକୁ ଅନୁମତି ଦିଆଯିବ ନାହିଁ
– କାର୍ଯ୍ୟସ୍ଥଳରେ ବାଲଟି, ମଗ୍, ସାବୁନ୍, ଓ ଟାୱେଲ ରଖିବେ ନିର୍ମାଣ ସଂସ୍ଥା
– କୋଭିଡ-୧୯ ରୋକିବା ପାଇଁ କଣ କରିବେ , କଣ ନକରିବେ ତାହାର ଏକ ଡିସପ୍ଲେ ବୋର୍ଡ ଲଗାଇବେ
– ତେବେ ନିିର୍ମାଣ କାର୍ଯ୍ୟ ଚାଲିବା ସମୟରେ ଗୁଟଖା, ତମାଖୁ ଖାଇବା ଓ ଛେପ ପକାଇବା ସମ୍ପୂର୍ଣ୍ଣ ନିଷେଧ କରାଯାଇଛି
ସେହିପରି କୌଣସି ଅସୁସ୍ଥ , ବୃଦ୍ଧ ଏବଂ ଥଣ୍ଡା, କାଶ, ଛିଙ୍କ ବା ଫ୍ଲୁର ଲକ୍ଷଣ ଥିବା ଲୋକଙ୍କୁ କାମ କାମ ନଦେବାକୁ କୁହାଯାଇଛି । ଏବଂ ଶ୍ରମିକଙ୍କ ନିକଟରେ ଏଭଳି କୌଣସି ଲକ୍ଷଣ ଦେଖାଦେଲେ ନିର୍ମାଣକାରୀ ସଂସ୍ଥା ସ୍ୱାସ୍ଥ୍ୟକେନ୍ଦ୍ରର ପରାମର୍ଶ କରାଇବା ପାଇଁ ବ୍ୟବସ୍ଥା କରିବାକୁ ଏଥିରେ କୁହାଯାଇଛି ।
ଦେଶରେ ତଥା ରାଜ୍ୟରେ ଶ୍ରମିକଙ୍କ ସାଂଘାତିକ ସ୍ଥିତି ନେଇ ବାରମ୍ବାର ରିପୋର୍ଟ
ଆସିବା ପରେ ଉଭୟ ଜୀବନ ଓ ଜୀବିକା ଉପରେ କେନ୍ଦ୍ର ଓ ରାଜ୍ୟ ଗୁରୁତ୍ୱ ଦେଇ ଆସୁଛନ୍ତି । ପୂର୍ବରୁ କେବଳ ସରକାରୀ କ୍ଷେତ୍ରରେ କଟକଣା ଯୁକ୍ତ କାର୍ଯ୍ୟ ପାଇଁ ଅନୁମତିଥିବାବେଳେ ଏବେ ବେସରକାରୀ ନିର୍ମାଣ କ୍ଷେତ୍ରରେ ଅନୁମତି ପ୍ରଦାନ କରି ଏକ ବଡ ଧରଣର ଆହ୍ୱାନକୁ ମୁକାବିଲା କରିବା ପାଇଁ ସରକାର ପ୍ରସ୍ତୁତ ହୋଇଥିବା ଚର୍ଚ୍ଚା କରାଯାଉଛି ।