କନକ ବ୍ୟୁରୋ : କରୋନା ସଂକ୍ରମଣ ଲଗାତାର କମିବା କାରଣରୁ ଦେଶବାସୀ କିଛି ମାତ୍ରାରେ ଆଶ୍ୱସ୍ତ ହୋଇଥିଲେ । କିନ୍ତୁ ଏବେ ପୁଣିଥରେ ବିଭିନ୍ନ ରାଜ୍ୟରୁ କରୋନା ସଂକ୍ରମଣ ବୃଦ୍ଧିର ଖବର ଚିନ୍ତା ବଢାଇଲାଣି । କର୍ଣ୍ଣାଟକ ଏସଡିଏମ ମେଡିକାଲ କଲେଜରେ କରୋନାର ଭୟଙ୍କର ରୂପ ଦେଖିବାକୁ ମିଳିଛି । ଏକାଥରକେ କଲେଜର ୬୬ ଜଣ ଛାତ୍ରଛାତ୍ରୀ କରୋନାରେ ସଂକ୍ରମିତ ହୋଇଛନ୍ତି । ଏକାସଙ୍ଗେ ଏତେ ସଂଖ୍ୟକ ଛାତ୍ରଛାତ୍ରୀ କରୋନାରେ ସଂକ୍ରମିତ ହେବା ପରେ ସ୍ଥାନୀୟ ପ୍ରଶାସନର ଚିନ୍ତା ବଢିଯାଇଛି । ଆଉ ଏହି ଖବର ସାମ୍ନାକୁ ଆସିବା ମାତ୍ରେ ତୁରନ୍ତ କଲେଜର ଦୁଇଟି ହଷ୍ଟେଲକୁ ସିଲ୍ କରି ଦିଆଯାଇଛି । ଏହି କଲେଜରେ ପାଖାପାଖି ୪୦୦ ଜଣ ଛାତ୍ରଛାତ୍ରୀ ପାଠ ପଢୁଥିବା ବେଳେ ସଂକ୍ରମିତ ହୋଇଥିବା ଅଧିକାଂଶ ଛାତ୍ରଛାତ୍ରୀ ପ୍ରଥମ ବର୍ଷର ବୋଲି ସୂଚନା ମିଳିଛି ।
Kanak News is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ମୁତାବକ, ଗତ କିଛି ଦିନ ହେବ ଏହି କଲେଜର କିଛି ଛାତ୍ରଛାତ୍ରୀ କରୋନାରେ ସଂକ୍ରମିତ ହୋଇଥିଲେ । ଯେହେତୁ ସଂକ୍ରମିତ ଛାତ୍ରଛାତ୍ରୀ କଲେଜର ଅନ୍ୟ ଛାତ୍ରଛାତ୍ରୀଙ୍କ ସଂସ୍ପର୍ଶରେ ଆସିଥିଲେ ତେଣୁ କଲେଜର ଅଧିକାଂଶ ଛାତ୍ରଛାତ୍ରୀଙ୍କର କରୋନା ଟେଷ୍ଟ ହୋଇଥିଲା । ପାଖାପାଖି ୩୦୦ ଛାତ୍ରଛାତ୍ରୀଙ୍କର କରୋନା ଟେଷ୍ଟ ହୋଇଥିବା ବେଳେ ଏଥିମଧ୍ୟରୁ ୬୬ ଜଣଙ୍କର ରିପୋର୍ଟ ପଜିଟିଭ ଆସିଥିଲା । ଏବେ ମଧ୍ୟ ଆହୁରି ୧୦୦ ଜଣ ଛାତ୍ରଛାତ୍ରୀଙ୍କର କରୋନା ଟେଷ୍ଟ ହେବା ବାକି ରହିଛି । ତେଣୁ ସଂକ୍ରମିତଙ୍କ ସଂଖ୍ୟା ଆହୁରି ବଢିପାରେ ବୋଲି କୁହାଯାଉଛି ।
ଗତ କିଛି ଦିନ ବିଭିନ୍ନ ଶିକ୍ଷାନୁଷ୍ଠାନରେ କରୋନା ମାମଲା ବୃଦ୍ଧି ପାଉଥିବାର ଦେଖିବାକୁ ମିଳୁଛି । କରୋନା କଟକଣାକୁ ହଟାଇ ଶିକ୍ଷାନୁଷ୍ଠାନ ଖୋଲିବା ପରେ ଏହି ମାମଲା ବଢି ଚାଲିଥିବା ଦେଖିବାକୁ ମିଳୁଛି । ପ୍ରଥମେ ରାଜସ୍ଥାନ ଉଦୟପୁରର ୧୧ ଜଣ ସ୍କୁଲ ଛାତ୍ରଛାତ୍ରୀ କରୋନାରେ ସଂକ୍ରମିତ ହୋଇଥିବା ବେଳେ ତେଲେଙ୍ଗାନାର ଏକ ସ୍କୁଲରେ ମଧ୍ୟ ୨୮ ଜଣ ଜଣ ଛାତ୍ରଛାତ୍ରୀ କରୋନା ରିପୋର୍ଟ ପଜିଟିଭ ଆସିଥିଲା । ସେହିଭଳି ଗତ ମଙ୍ଗଳବାର ସୁନ୍ଦରଗଡର ସ୍କୁଲ ଛାତ୍ରୀ ଏବଂ ବୁର୍ଲାର ଡାକ୍ତର ଛାତ୍ରଛାତ୍ରୀ ସଂକ୍ରମିତ ହୋଇଛନ୍ତି ।
ସୁନ୍ଦରଗଡ଼ର ସେଣ୍ଟ ମେରୀ ବାଳିକା ଉଚ୍ଚ ବିଦ୍ୟାଳୟର ୫୩ ଜଣ ଛାତ୍ରୀ କରୋନା ପଜିଟିଭ୍ ଚିହ୍ନଟ ହୋଇଥିଲେ । ସଂକ୍ରମିତ ହୋଇଥିବା ସମସ୍ତ ଛାତ୍ରୀ ସ୍କୁଲ ହଷ୍ଟେଲରେ ରହୁଥିଲେ । ଏକା ଥରକେ ଏତେ ଛାତ୍ରୀ ପଜିଟିଭ୍ ଚିହ୍ନଟ ହେବାରୁ ସ୍କୁଲକୁ ସାତ ଦିନ ପାଇଁ ବନ୍ଦ ଘୋଷଣା କରାଯାଇଛି । ସେପଟେ ବୁର୍ଲା ଭୀମସାରର ୨୨ ଛାତ୍ରଛାତ୍ରୀ କରୋନା ସଂକ୍ରମିତ ଚିହ୍ନଟ ହୋଇଥିଲେ । କିଛି ଦିନ ପୂର୍ବେ ସମସ୍ତେ କୌଣସି ଏକ କାର୍ଯ୍ୟକ୍ରମରେ ଏକାଠି ହୋଇଥିଲେ ଛାତ୍ରଛାତ୍ରୀ । ସେଠାରୁ କରୋନା ବ୍ୟାପିଥିବା ଅନୁମାନ କରାଯାଉଛି । ତେବେ ସଂକ୍ରମିତଙ୍କ ମଧ୍ୟରୁ କେହି ସେମିତି ଗୁରୁତର ନାହାନ୍ତି । ତେଣୁ ଏହାକୁ ନେଇ ଭୟ ନକରି ସମସ୍ତେ କୋଭିଡ ନିୟମ ମାନିବା ଦରକାର ବୋଲି ବିଶେଷଜ୍ଞ ପରାମର୍ଶ ଦେଇଛନ୍ତି । କରୋନା କଟକଣା ନମାନିଲେ, ସଂକ୍ରମଣ ବଢିବାର ଆଶଙ୍କା ରହିଛି । ତେଣୁ କରୋନାକୁ ନଡରି ସତର୍କ ରହିବା ପାଇଁ ପରାମର୍ଶ ଦେଇଛି ସ୍ୱାସ୍ଥ୍ୟ ବିଭାଗ ।