ଏସସିବିରେ ପୁଣି ଅବ୍ୟବସ୍ଥା ଅଭିଯୋଗ : ଅଲଟ୍ରାସାଉଣ୍ଡ କରିବାକୁ ହେଲେ ଅପେକ୍ଷା କରିବାକୁ ପଡ଼ୁଛି ଏକମାସ
କନକ ବ୍ୟୁରୋ : କଟକ ବଡ଼ ମେଡିକାଲରେ ପୁଣି ଥରେ ଅବ୍ୟବସ୍ଥା ଅଭିଯୋଗ ସାମ୍ନାକୁ ଆସିଛି । ଏସସିବିରେ ଅଲଟ୍ରାସାଉଣ୍ଡ କରିବାକୁ ହେଲେ ମାସେ ଅପେକ୍ଷା କରିବାକୁ ପଡ଼ିବ । ଯାଜପୁର ଅଞ୍ଚଳର ଜଣେ ରୋଗୀଙ୍କ କ୍ଷେତ୍ରରେ ଏପରି ଘଟିଛି । ଯାଜପୁରର ରେବତୀ ନାମକ ଜଣେ ମହିଳା ଅସୁସ୍ଥା ଅନୁଭବ କରି ଏସସିବି ଆସିଥିଲେ । ଡାକ୍ତର ତାଙ୍କୁ ଅଲଟ୍ରାସାଉଣ୍ଡ କରିବାକୁ କହିଥିଲେ ।
Kanak News is now on WhatsApp
Join and get latest news updates delivered to you via WhatsApp
ହେଲେ ଅଲଟ୍ରାସାଉଣ୍ଡ କରିବା ପାଇଁ ତାଙ୍କୁ ମାସେ ଅପେକ୍ଷା କରିବାକୁ ପଡ଼ିବ ବୋଲି କୁହାଯାଇଥିବା ସେ ଅଭିଯୋଗ କରିଛନ୍ତି । ଏଥିରେ ନିରାଶ ହୋଇ ସେ ଘରୋଇ ହସ୍ପିଟାଲକୁ ଯାଇଛନ୍ତି । ଏଠାରେ ପ୍ରଶ୍ନ ଉଠୁଛି, ସାମାନ୍ୟ ଅଲଟ୍ରାସାଉଣ୍ଡ ପାଇଁ ଯଦି ରୋଗୀଟିଏ ମାସେ ଅପେକ୍ଷା କରିବ, ରିପୋର୍ଟ ଆସିବା ବେଳକୁ ତାଙ୍କ ସ୍ବାସ୍ଥ୍ୟାବସ୍ଥା କେମିତି ଥିବ ? ରୋଗ ବଢ଼ିଯିବାର ଅବା ଜୀବନ ବିପନ୍ନ ହେବାର ବି ଆଶଙ୍କା ରହିଛି। କେବଳ ଅଲ୍ଟ୍ରାସାଉଣ୍ଡ୍ ନୁହେଁ, ଅନ୍ୟ ଅନେକ ପରୀକ୍ଷା ପାଇଁ ରୋଗୀଙ୍କୁ ଏଭଳି ଦିନ ଦିନ ଧରି ଏସ୍ସିବିରେ ପ୍ରତୀକ୍ଷା କରିବାକୁ ପଡୁଛି । ଆଚାର୍ଯ୍ୟ ହରିହର କର୍କଟ କେନ୍ଦ୍ରରେ ବି ଏଭଳି ସ୍ଥିତି ଦେଖିବାକୁ ମିଳୁଛି। ଯାହାକୁ ମାଗଣା ଚିକିତ୍ସା ନାଁରେ ଯାତନା ବୋଲି ରୋଗୀ ଓ ସଂପର୍କୀୟମାନେ ଅଭିଯୋଗ କରୁଛନ୍ତି ।
ମିଳିଥିବା ସୂଚନା ଅନୁଯାୟୀ ପ୍ରତିଦିନ ପ୍ରାୟ ୫୦୦ ରୋଗୀଙ୍କୁ ଅଲଟ୍ରାସାଉଣ୍ଡ ପାଇଁ ଡାକ୍ତର ପରାମର୍ଶ ଦିଅନ୍ତି । ଏସ୍ସିବିରେ ମାତ୍ର ଦୁଇଟି ମେସିନ ଥିବାରୁ ଦୈନିକ ଶହେରୁ ଦେଢ ଶହ ରୋଗୀଙ୍କର ଅଲଟ୍ରାସାଉଣ୍ଡ ପରୀକ୍ଷା କରାଯାଉଛି । ଯେତିକି ପରିମାଣରେ ରୋଗୀ ଆସୁଛନ୍ତି, ସେହି ଅନୁସାରେ ମେସିନ୍ ନାହିଁ । ତେଣୁ ଏସସିବିରେ ଏପରି ସମସ୍ୟା ସୃଷ୍ଟି ହେଉଛି ।