କୋଟି କୋଟି ଟଙ୍କା ବାକି ପଡିଥିବା ବେଳେ ସାମନ୍ୟ ୫୦ ପଇସା ପାଇଁ ବ୍ୟାଙ୍କର ନୋଟିସ , ବାକି ଥିବା ପଇସା ଜମା ନକଲେ ହେବ କାର୍ଯ୍ୟାନୁଷ୍ଠାନ

ଲକ୍ଷ ଲକ୍ଷ କିମ୍ବା କୋଟି କୋଟି ଟଙ୍କା ପାଇଁ ବ୍ୟାଙ୍କରୁ ନୋଟିସ ଆସିବା ସ୍ୱାଭାବିକ । କିନ୍ତୁ ମାତ୍ର ୫୦ ପଇସାର ବାକି ଥିବା ନେଇ ନୋଟିସ ନିଶ୍ଚିତ ଭାବେ ଆଶ୍ଚଯ୍ୟର ବିଷୟ । ଶୁଣିବାକୁ ବିଚିତ୍ର ଲାଗୁଥିଲେ ବି ଏଭଳି ଏକ ଘଟଣା ରାଜସ୍ଥାନର ଝୁନଝୁନ ଜିଲ୍ଲାରେ ଘଟିଛି । ବ୍ୟାଙ୍କ ଜଣେ ବ୍ୟକ୍ତିଙ୍କୁ ନୋଟିସ ପଠେଇଛି କାରଣ ତାଙ୍କ ଉପରେ ବ୍ୟାଙ୍କର ମାତ୍ର ୫୦ ପଇସା ବାକି ରହିଯାଇଛି ।

ବ୍ୟକ୍ତିଙ୍କ ନାଁ ଜିତେନ୍ଦ୍ର ସିଂହ । ଜିତେନ୍ଦ୍ର ଏବେ ଅସୁସ୍ଥ ଅଛନ୍ତି । ତେଣୁ ସେ ନିଜେ ଲୋକ ଅଦାଲତ ଯାଇ ଏହି ବାକି ପଇସାକୁ ଶୁଝିବା ପାଇଁ ଅସମର୍ଥ । ତେଣୁ ତାଙ୍କ ବାପା ବିନୋଦ ସିଂହ ବ୍ୟାଙ୍କ ଅଧିକାରୀମାନଙ୍କୁ ଭେଟି ବାକି ପଇସା ଦେବା ପାଇଁ ଉଦ୍ୟମ କରିଥିଲେ । କିନ୍ତୁ ବ୍ୟାଙ୍କ ଅଧିକାରୀମାନେ ତାଙ୍କ ଠାରୁ ପଇସା ନେବାକୁ ମନା କରିଦେଇଥିଲେ । ଏବେ ଜିତେନ୍ଦ୍ର ମଧ୍ୟ ବ୍ୟାଙ୍କ ବିରୋଧରେ ନୋଟିସ ପଠାଇବାକୁ ଚିନ୍ତା କରୁଛନ୍ତି । ବ୍ୟାଙ୍କର ଏଭଳି ମନଇଚ୍ଛା ନୀତି ବିରୋଦ୍ଧରେ କୋର୍ଟକୁ ଯିବେ ବୋଲି କହିଛନ୍ତି ଜିତେନ୍ଦ୍ରଙ୍କ ଓକିଲ ବିକ୍ରମ ସିଂହ । ଜିତେନ୍ଦ୍ର କହିଛନ୍ତି , ରାତିରେ ବ୍ୟାଙ୍କ ପକ୍ଷରୁ ତାଙ୍କ ଘର ବାହାରେ ଏକ ପୋଷ୍ଟର ଲଗାଯାଇଥିଲା । ୫୦ ପଇସା ପରିଶୋଧ ନ କଲେ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଏଥିରେ ଧମକ ଦିଆଯାଇଛି । ଅସୁସ୍ଥ ଥିବାରୁ ସେ ନିଜ ବାପାଙ୍କୁ ବାକି ପଇସା ଜମା କରିବାକୁ ବ୍ୟାଙ୍କ ପଠାଇଥିଲେ । କିନ୍ତୁ ବ୍ୟାଙ୍କ ଅଧିକାରୀମାନେ ଏହାକୁ ଗ୍ରହଣ କରିନଥିଲେ । ଯାହା ଫଳରେ ତାଙ୍କ ବାପା ବ୍ୟାଙ୍କ ବିରୁଦ୍ଧରେ ମାମଲା ରୁଜୁ କରିବାକୁ ଚାହୁଁଛନ୍ତି ।