କନକ ବ୍ୟୁରୋ : ତାଳଗୁଡ ପ୍ରସ୍ତୁତ କରି ସ୍ୱାବଲମ୍ବୀ ହେଉଛନ୍ତି ସଉରା ଆଦିବାସୀ । ଗଜପତି ଜିଲ୍ଲା ଆର ଉଦୟଗିରି ବ୍ଳକ ଏକ ଆଦିବାସୀ ଅଧ୍ୟୁଷିତ ଅଂଚଳ ହୋଇଥିବା ବେଳେ ଏହି ଅଂଚଳର ଲୋକଙ୍କ ରୋଜଗାର କହିଲେ ମକା ଏବଂ ଧାନ ଚାଷ । କିନ୍ତୁ ୧୯୫୯ ମସିହାରୁ କ୍ଷୁଦ୍ର ଚାଷୀଙ୍କ ପାଇଁ ସରକାର ଲୁବୁରର୍ସିଂ ଠାରେ ଏକ ପ୍ରକଳ୍ପ ନିର୍ମାଣ କରିଛନ୍ତି । ଏହି ପ୍ରକଳ୍ପ ଦ୍ୱାରା ପ୍ରାୟ ୧୨ଶହରୁ ଅଧିକ ଚାଷୀ ଲାଭବାନ ହୋଇପାରୁଛନ୍ତି । ଏଠାକାର ଆଦିବାସୀ ଲୋକ ମାନେ ପୂର୍ବରୁ ଖଜୁରୀ ରସକୁ ମଦ ଭାବେ ବ୍ୟବହାର କରୁଥିଲେ । ପ୍ରକଳ୍ପ ନିର୍ମାଣ ହେବା ପରେ ସେହି ଖଜୁରୀ ରସରୁ ତାଳଗୁଡ଼ ପ୍ରସ୍ତୁତ କରି ରୋଜଗାର ପାଇପାରୁଛନ୍ତି । ସଂଧ୍ୟା ସମୟରେ ଗଛର ଅଗ୍ରଭାଗକୁ କାଟି ସେଥିରେ ଏକ ହାଣ୍ଡି ଲଗାଇଥାଆନ୍ତି । ଭୋର ସକାଳୁ ସେହି ହାଣ୍ଡିରେ ଭରି ହୋଇଥିବା ଖଜୁରୀ ରସକୁ ବାହାରକରି ଜୈବିକ ପ୍ରଣାଳୀରେ ଗୁଡ଼ ତିଆରି କରନ୍ତି ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
ଏହି ଗୁଡ଼କୁ ଚାଷୀ କିଲୋ ପିଛା ୧୦୦ ଟଙ୍କାରେ ତାଳଗୁଡ଼ ସମବାୟ ସମିତିରେ ବିକ୍ରି କରୁଥିବା ବେଳେ ଏହାର ବଜାର ଦର ୨୦୦ଟଙ୍କା ରହିଛି । ଏହି ଗୁଡ଼ ପ୍ରସ୍ତୁତ କରି ଦୈନିକ ୭୦୦ରୁ ୮୦୦ ଟଙ୍କା ପର୍ଯ୍ୟନ୍ତ ରୋଜଗାର କରୁଛନ୍ତି ଚାଷୀ । ଖଜୁରୀ ରସରୁ ପାଣି ଗୁଡ଼, ପାଉଡର ଗୁଡ଼ ଓ ଚେକା ଗୁଡ଼ ପ୍ରସ୍ତୁତ କରୁଛନ୍ତି ଚାଷୀ । ଏହାର ରଙ୍ଗ କଳା ଓ ଧୂସର ରଙ୍ଗ ହୋଇଥିବା ବେଳେ ଏହାର ସ୍ୱାଦ ଖୁବ୍ ନିଆରା । ଏହି ଗୁଡ଼ରୁ ପ୍ରଚୁର ପରିମାଣର ଆଇରନ୍ ଓ ଭିଟାମିନ୍ ମିଳିଥାଏ । ଏହାର ଔଷଧୀୟ ଗୁଣ ଅଧିକ ରହିଥିବାରୁ ଚାହିଦା ମଧ୍ୟ ଅଧିକ ରହିଛି ।