ବିଜୟ ମହାପାତ୍ର ଓ ଦିଲ୍ଲୀପ ରାୟଙ୍କ ଇସ୍ତଫା ନେଇ ବିଜେଡିର ପ୍ରତିକ୍ରିୟା: ‘ପାର୍ଟି ନୁହେଁ ମାଟିକୁ ଦେଇଛନ୍ତି ଗୁରୁତ୍ୱ’ ।
ବିଜେଡି ମୁଖପାତ୍ର ସସ୍ମିତ ପାତ୍ର, ବିଜୟ ମହାପାତ୍ର ଏବଂ ଦିଲ୍ଲୀପ ରାୟଙ୍କ ଇସ୍ତଫାକୁ ନେଇ ଏକ ବଡ ବୟାନ ଦେଇଛନ୍ତି ।
କନକ ବ୍ୟୁରୋ: ବିଜେପିର ଦୁଇ ବରିଷ୍ଠ ନେତା ଦିଲ୍ଲୀପ ରାୟ ଓ ବିଜୟ ମହାପାତ୍ରଙ୍କ ଇସ୍ତଫା ଦେବା ନେଇ ଚାଲିଥିବା କଳ୍ପନା ଜଳ୍ପନାର ଆଜି ଅନ୍ତ ଘଟିଛି । ଏହି ଦୁଇ ବରିଷ୍ଠ ନେତା ଆଜି ବିଜେପିରୁ ଇସ୍ତଫା ଦେବା ପରେ ସରଗରମ ହୋଇଛି ରାଜ୍ୟ ରାଜନୀତି । ସେ ଆଗକୁ କେଉଁ ଦଳରେ ମିଶିବେ ଏବଂ ଆଗକୁ କଣ ସବୁ ପଦକ୍ଷପ ନେବେ ସେନେଇ ମଧ୍ୟ ଚର୍ଚ୍ଚା ଜୋର ଧରିଛି ।
Kanak News is now on WhatsApp
Join and get latest news updates delivered to you via WhatsApp
ତେବେ ଏସବୁ ଭିତରେ ବିଜେଡି ମୁଖପାତ୍ର ସସ୍ମିତ ପାତ୍ର, ବିଜୟ ମହାପାତ୍ର ଏବଂ ଦିଲ୍ଲୀପ ରାୟଙ୍କ ଇସ୍ତଫାକୁ ନେଇ ଏକ ବଡ ବୟାନ ଦେଇଛନ୍ତି । ପାର୍ଟି ପାଇଁ ନୁହେଁ ମାଟି ପାଇଁ ଦଳ ଛାଡିଛନ୍ତି ଉଭୟ ନେତା । ଭାରତୀୟ ଜନତା ପର୍ଟିର ବରିଷ୍ଠ ନେତା ଦିଲ୍ଲୀପ ରାୟ ଏବଂ ବିଜୟ ମହାପାତ୍ର ଯେଉଁ ସବୁ ପ୍ରସଙ୍ଗ ନେଇ ଦଳ ଛାଡିଛନ୍ତି ତାହା ସମ୍ପୁର୍ଣ୍ଣ ଯୁକ୍ତିଯୁକ୍ତ । ମହାନଦୀ ପ୍ରସଙ୍ଗ ହେଉ ଅବା ବ୍ରାହ୍ମଣୀର ଦ୍ୱିତୀୟ ସେତୁ ନିର୍ମାଣ ପ୍ରସଙ୍ଗ ହେଉ, ତାଙ୍କର ଏହି ନିଷ୍ପତିକୁ ଆମେ ସ୍ୱାଗତ କରୁଛୁ ବୋଲି କହିଛନ୍ତି ସସ୍ମିତ । ଏହି ଦୁଇ ନେତା ବିଜେପିରୁ ଇସ୍ତଫା ଦେଇ ପାର୍ଟିକୁ ପଛରେ ପକାଇ ମାଟିକୁ ଆଗକୁ ଆଣିଛନ୍ତି । ଦଳରେ ନିଜର ସ୍ୱାର୍ଥ ନଦେଖି ଜନତାଙ୍କ କଥା ଚିନ୍ତା କରିଛନ୍ତି ଯାହା ବାସ୍ତବରେ ପ୍ରଂଶସାଯୋଗ୍ୟ । ଏବଂ ଭାରତୀୟ ଜନତା ପାର୍ଟିରେ ଏପରି ଅନେକ ନେତା ଅଛନ୍ତି ଯେଉଁମାନେ କି, ମାଟିକୁ ଆଗକୁ ଆଣିବାକୁ ଚାହୁଁଛନ୍ତି କିନ୍ତୁ ଦଳରେ କୋଣଠେସା ହୋଇ ରହିଥିବାରୁ ଆଗକୁ ଆସି ତାଙ୍କ ବକ୍ତବ୍ୟ ରଖିପାରୁ ନାହାଁନ୍ତି । କିନ୍ତୁ ବିଜୟ ଏବଂ ଦିଲ୍ଲୀପଙ୍କ ଇସ୍ତଫା ପରେ ଆଗାମୀ ଦିନରେ ଦଳରେ କୋଣଠେସା ହୋଇ ରହିଥିବା ନେତା ମଧ୍ୟ ମୁହଁ ଖୋଲିବେ ବୋଲି କହିଛନ୍ତି ସସ୍ମିତ ।